Milimo
22 “Nobaalumi, bakwesu anomatata, amuswiilile ndimwaambile kaambo kangu.”+ 2 Lino nobakamvwa kuti wakali kubakananina mumwaambo wa Chihebrayo, bakaumunisya, eelyo wakati: 3 “Ndili mu Juda,+ iwakazyalilwa ku Tarso mucooko ca Kilikiya,+ pele ndakali sicikolo wa Gamaliyeli+ mumunzi ooyu, eelyo ndakayiisyigwa kuutobelesya Mulawo wabasikale,+ alimwi ndakali musungu kuli Leza mbubonya mbuli ndinywe nyoonse sunu.+ 4 Ndakabapenzya ibatobela Nzila eeyi mane akubajaya. Ndakali kwaanga baalumi abamakaintu akubatola kuntolongo,+ 5 mbubonya mupaizi mupati ankamu yabaalu boonse mbobazyi kuti ndaamba masimpe. Alimwi kuzwa kulimbabo ndakabweza magwalo aakutola kuba Judama ku Damasiko, alimwi ndakali munzila kanduunka kuyakwaanga ba Nzila eeyi ibakali kooko akubaleta ku Jerusalemu kabaangidwe kuti basubulwe.
6 “Pele nindakali kuyaabweenda akusika kufwaafwi a Damasiko, ciindi kacili afwaafwi kusika masyikati, ndilyonya eelyo kuzwa kujulu kwakamweka mumuni mupati abusena boonse mpondakabede,+ 7 eelyo ndakawida ansi alimwi ndakamvwa jwi lindaambila kuti: ‘Saulo, Saulo, ino undipenzyela nzi?’ 8 Ndakavwiila kuti: ‘Ino nduwe ni, Mwami?’ Eelyo wakandaambila kuti: ‘Ndime Jesu muna Nazareta, ooyo ngopenzya.’ 9 Lino baalumi mbotwakali limwi mubwini bakaubona mumuni, pele tiibakamvwa ncolyakali kwaamba jwi lyayooyo wakali kwaambaula andime. 10 Mpoonya ndakati: ‘Ino ncinzi ncondeelede kucita Mwami?’ Lino Mwami wakandaambila kuti: ‘Nyamuka, koya ku Damasiko, eelyo ooko uyakwaambilwa zintu zyoonse eezyo zyasalwa kuti ucite.’+ 11 Pele mbwaanga tiindakali kukonzya kubona cintu cili coonse akaambo kakumweka kwamumuni ooyo, ndakaakusika ku Damasiko kandijatilidwe kujanza abaabo mbotwakali limwi.
12 “Mpoonya mwaalumi umwi uutegwa Hananiya, mukombi kweelana a Mulawo, alimwi iwakali kulumbaizyigwa aba Juda boonse ibakali kukkala kooko, 13 wakaboola kulindime. Wakaima munsi lyangu akundaambila kuti: ‘Saulo mukwesu, kotalika kubona alimwi!’ Aciindi nciconya eeco ndakatalika kubona, eelyo ndakamubona.+ 14 Mpoonya wakati: ‘Leza wabamatata wakusala kuti uzyibe makanze aakwe akubona yooyo uululeme+ akumvwa jwi lyakumulomo wakwe, 15 nkaambo weelede kuba kamboni wakwe kubantu boonse kujatikizya zintu nzyoobona akumvwa.+ 16 Aboobo ino ucilindila nzi? Nyamuka, ubbapatizyigwe akusanzyigwa zibi zyako+ kwiinda mukwiita zina lyakwe.’+
17 “Pele nindakapiluka ku Jerusalemu+ alimwi nindakali kupaila mutempele, ndakabona cilengaano 18 eelyo ndakamubona Mwami kandaambila kuti: ‘Kofwambaana, uzwe ndilyonya lino mu Jerusalemu, nkaambo tabakoobuzumina bumboni bwako kujatikizya ndime.’+ 19 Mpoonya ndakati: ‘O Mwami, balo beni balizyi kabotu kuti ndakali kwaanga akukwibbaula baabo basyoma nduwe mucikombelo cimwi acimwi;+ 20 alimwi bulowa bwa Sitefano kamboni wako nobwakali kutilwa, mebo ndakaliimvwi munsi kandizuminizya akulindilila zisani zyaatala zyabaabo ibakali kumujaya.’+ 21 Pele wakati kulindime: ‘Koya buyo, nkaambo ndilakutuma kumasi aali kulamfwu kapati.’”+
22 Lino bakali kumuswiilila kusikila naakaamba majwi aaya. Mpoonya bakoompolola balaamba: “Amumujaye azwe anyika muntu uuli boobu, nkaambo teelede kuti kapona pe!” 23 Akaambo kakuti bakali kupozomoka, ikusowaila zisani zyabo zyaatala alimwi akumwaya mavwu mujulu,+ 24 mweendelezi wabasikalumamba wakalailila kuti Paulo atolwe kunkambi yabasikalumamba alimwi akuti weelede kubuzyigwa kwiinda mukumukwibbaula, ikutegwa azyibe kaambo keni bantu ncobakali kuyobeka boobu kujatikizya Paulo. 25 Pele nobakamwaangilila kuti batalike kumukwibbaula, Paulo wakaambila silutwe wabasikalumamba iwakaimvwi waawo kuti: “Sena cilizumizyidwe kuti nywebo nobaalumi mukwibbaule muna Roma* alimwi uutanapegwa mulandu?”*+ 26 Lino silutwe wabasikalumamba ooyu naakamvwa boobo, wakaunka kumweendelezi wabasikalumamba akuyoomwaambila kuti: “Ncinzi ncoyanda kucita? Imwaalumi ooyu muna Roma.” 27 Aboobo mweendelezi wabasikalumamba wakaunka kulinguwe akwaamba kuti: “Kondaambila, sena uli muna Roma?” Wakati: “Inzya.” 28 Imweendelezi wabasikalumamba wakati: “Ibusicisi bwakuba muna Roma ndakabuula amali manji kapati.” Paulo wakati: “Pele mebo mbwakuzyalwa abwalo buya busicisi oobu.”+
29 Aboobo ndilyonya eelyo, baalumi ibakali kuyanda kumusubula ikutegwa aambe bakamusosoloka; awalo mweendelezi wabasikalumamba wakayoowa naakazyiba kuti wakali muna Roma akuti wakamwaangide nketani.+
30 Aboobo buzuba bwakatobela, mbwaanga wakali kuyandisya kuzyiba kaambo keni ncaakali kupegwa mulandu aba Juda, wakamwaangununa akulailila basilutwe babapaizi a Nkuta Mpati Yaba Juda yoonse kuti babungane. Mpoonya wakaleta Paulo akumwiimika akati kabo.+