2 Bami
13 Mumwaka wa 23 wabulelo bwa Jehoasi+ mwana wa Ahaziya+ imwami wa Juda, Jehoazi mwana wa Jehu+ wakaba mwami wa Israyeli mu Samariya, alimwi wakalela myaka iili 17. 2 Wakali kucita zibi mumeso aa Jehova alimwi wakakakatila kucibi ca Jeroboamu mwana wa Nebati eeco ncaakapa kuti bana Israyeli bacite.+ Tanaakacileka pe. 3 Aboobo Jehova wakabakalalila+ kapati bana Israyeli,+ eelyo wakabaaba mumaanza aa Mwami Hazaeli+ wa Siriya amumaanza aa Beni-hadadi+ mwana wa Hazaeli mumazuba aabo oonse.
4 Mukuya kwaciindi, Jehoazi wakakombelezya* Jehova kuti amufwide luzyalo, eelyo Jehova wakamuswiilila, nkaambo wakabona mwami wa Siriya mbwaakali kubadyaaminina bana Israyeli.+ 5 Aboobo Jehova wakabapa mufwutuli bana Israyeli+ kutegwa abaangulule mumaanza aabana Siriya, eelyo bana Israyeli bakalikkalila mumaanda aabo mbuli kaindi.* 6 (Nokuba boobo, tiibakacileka cibi cabamuŋanda ya Jeroboamu eeco ncaakapa kuti bana Israyeli bacite.+ Bakazumanana mucibi eeco,* alimwi musemu wacisamu wakukomba*+ wakaciliko mu Samariya.) 7 Jehoazi wakasyaala buyo ampi yabasimabbiza bali 50, nkalaki zili 10 abasikalumamba bali 10,000 beenda amaulu, nkaambo mwami wa Siriya wakabanyonyoona+ akubalyatauka mbuli lusuko lujanika kucuumino ciindi nobauma maila.+
8 Makani oonse aakaindi aamba zya Jehoazi azyoonse nzyaakacita alimwi anguzu zyakwe alilembedwe mubbuku lyaamba makani aakaindi aamba zyamazuba aabami ba Israyeli. 9 Kumane Jehoazi wakoona abamausyi alimwi bakamuzikka mu Samariya;+ eelyo Jehoasi mwanaakwe wakaba mwami mubusena bwakwe.
10 Mumwaka wa 37 wabulelo bwa Mwami Jehoasi+ wa Juda, Jehoasi mwana wa Jehoazi wakaba mwami wa Israyeli mu Samariya, alimwi wakalela myaka iili 16. 11 Wakali kucita zibi mumeso aa Jehova, tanaakaleka kuzitobela zibi zyoonse zya Jeroboamu mwana wa Nebati eezyo nzyaakapa kuti bana Israyeli bacite.+ Wakazumanana kweenda muzibi eezyo.
12 Makani oonse aakaindi aamba zya Jehoasi azyoonse nzyaakacita alimwi anguzu zyakwe, ambwaakalwana Mwami Amaziya wa Juda,+ alilembedwe mubbuku lyaamba makani aakaindi aamba zyamazuba aabami ba Israyeli. 13 Kumane Jehoasi wakoona abamausyi, mpoonya Jeroboamu*+ wakakkala acuuno cabwami. Eelyo Jehoasi wakazikkwa mu Samariya antoomwe abami bamu Israyeli.+
14 Lino Elisha+ naakaciswa bulwazi ibwakazoopa kuti afwe, Jehoasi mwami wa Israyeli wakaunka kulinguwe akulila kati: “Taata, taata! Nkalaki yankondo ya Israyeli abasimabbiza bayo!”+ 15 Mpoonya Elisha wakati kulinguwe: “Bweza buta amivwi.” Aboobo wakabweza buta amivwi. 16 Kumane Elisha wakaambila mwami wa Israyeli kuti: “Bweza buta.” Aboobo wakabweza buta, kumane Elisha wakabikka maanza aakwe atala aamaanza aamwami. 17 Mpoonya wakati: “Kojalula windo lili kujwe.” Aboobo wakalijalula. Kumane Elisha wakati: “Fwusa!” Eelyo wakafwusa. Lino wakati: “Muvwi wa Jehova waluzundo,* muvwi waluzundo wakuzunda* bana Siriya! Uyoobazunda bana Siriya ku Afeki+ kusikila ukabamane.”
18 Wakazumanana kwaamba kuti: “Koibweza mivwi,” eelyo wakaibweza. Kumane wakaambila mwami wa Israyeli kuti: “Koyasa ansi.” Aboobo wakayasa ansi ziindi zyotatwe mpoonya wakacileka. 19 Mpoonya muntu wa Leza mwini-mwini wakamunyemena akumwaambila kuti: “Waleelede kuyasa ziindi zyosanwe naa zili cisambomwe! Noocita oobo, noobazunda bana Siriya kusikila wabamana, pele lino uyoobazunda buyo ziindi zyotatwe.”+
20 Kuzwa waawo Elisha wakafwa alimwi wakazikkwa. Lino kwakali kuboola zigwebenga zisaala zyabana Moabu+ izyakali kuboola munyika kumatalikilo aamwaka.* 21 Lino baalumi bamwi nobakali kuzikka mwaalumi umwi, bakabona zigwebenga zisaala, aboobo cakufwambaana mutunta wamwaalumi ooyo bakauwaala mucuumbwe ca Elisha akutija. Lino mwaalumi ooyo naakaguma mafwuwa aa Elisha, mpoonya aawo wakabuka+ akwiimikila.
22 Lino Mwami Hazaeli+ wa Siriya wakabadyaaminina bana Israyeli+ mazuba oonse ngaakapona Jehoazi. 23 Nokuba boobo, Jehova wakabafwida luzyalo aluse+ akubabikkila maano akaambo kacizuminano ncaakapangana a Abrahamu,+ Izaka+ a Jakobo.+ Tanaakayanda kubanyonyoona nokuba kubatanda kuzwa kulinguwe kusikila sunu. 24 Mwami Hazaeli wa Siriya naakafwa, mwanaakwe Beni-hadadi wakaba mwami mubusena bwakwe. 25 Lino Jehoasi mwana wa Jehoazi wakamunyanga alimwi minzi njaakabwezede Beni-hadadi mwana wa Hazaeli munkondo kuzwa kuli Jehoazi usyi. Kwaziindi zyotatwe Jehoasi wakamuzunda,+ aboobo wakaibweza alimwi minzi ya Israyeli.