Luka

9 Mpoonya wakaita ibali Kkumi Ababili akubapa nguzu zyakugusya akutanda madaimona+ oonse alimwi akuponya malwazi.+ 2 Eelyo wakabatuma kuyookambauka Bwami bwa Leza akuponya, 3 wakati kulimbabo: “Kutabi cintu ncomutolelezya mulweendo, noiba nkoli noiba nkomo yacakulya, nociba cinkwa naaba mali;* nokuba kuba azisani zyobilo.*+ 4 Pele kufwumbwa nkomunjila muŋanda, amukkale oomo kusikila mukazwe ooko.+ 5 Alimwi kufwumbwa ooko bantu nkobatamutambuli, mwaakuzwa mumunzi ooyo, amukakunkumune lusuko kumaulu aanu kuti bukabe bumboni bwakubacenjezya.”+ 6 Mpoonya bakaunka, bakainda mucilawo coonse munzi amunzi, kabayaabwaambilizya makani mabotu akuponya bantu koonse-koonse.+

7 Lino Heroda,* mweendelezi wacilikiti,* wakamvwa zyoonse zyakali kucitika, eelyo wakakopana kapati nkaambo bamwi bakali kwaamba kuti Johane wakabusyigwa kubafwu,+ 8 pele bamwi bakali kwaamba kuti Elija walibonya, ibambi bakali kwaamba kuti umwi wabasinsimi bansiku wabuka.+ 9 Heroda wakati: “Johane ndakamukosola mutwe.+ Aboobo, ino nguni ooyu ngundimvwide kuti ucita zintu eezyo?” Eelyo wakali kuyanda kuti amubone.+

10 Lino baapostolo nobakapiluka bakaambila Jesu zintu zyoonse nzyobakacita.+ Mpoonya wakaunka ambabo kubusena butakwe bantu mumunzi uutegwa Betesaida.+ 11 Pele makamu aabantu naakazyiba akamutobela. Eelyo wakabatambula kabotu akutalika kubaambila zya Bwami bwa Leza, alimwi wakabaponya ibakali kuyandika kuponesyegwa.+ 12 Lino buzuba bwakali kuyamukumana. Mpoonya ibali Kkumi Ababili bakaboola akumwaambila kuti: “Kobaambila bantu bamwaikizyanye, kutegwa baunke muminzi amutunzi tweengelede bakaliyandawide aakoona alimwi azyakulya, nkaambo okuno tuli musyokwe.”+ 13 Pele wakabaambila kuti: “Amubape zyakulya.”+ Bakati: “Tujisi buyo zinkwa zyosanwe answi zyobilo, ccita kuti swebo tuunke tukabaulile zyakulya bantu boonse aaba.” 14 Kwakali baalumi batandila ku 5,000. Pele wakaambila basikwiiya bakwe kuti: “Amubakkazike mutukamu, kakamu akamwi kakajisi bantu batandila ku 50.” 15 Aboobo bakacita oobo akubakkazika boonse. 16 Mpoonya wakabweza zinkwa zyosanwe answi zyobilo, wakalanga kujulu akuzilongezya. Kumane wakazikomauna akupa basikwiiya bakwe kuti baabanye nkamu yabantu. 17 Aboobo boonse bakalya akukkuta, alimwi bakabwezelela zyakacaala, izyakakkwana zisuwo zili 12 zyabufwefwelenga.+

18 Ciindi cimwi naakali kupaila alikke, basikwiiya bakwe bakaboola kulinguwe, eelyo wakababuzya kuti: “Ino makamu aabantu aamba kuti ndime ni?”+ 19 Bakaingula kuti: “Johane Mubbapatizi, pele bamwi baamba kuti Elija, alimwi bamwi baamba kuti umwi wabasinsimi bansiku wabuka.”+ 20 Mpoonya wakababuzya kuti: “Ino nywebo mwaamba kuti ndime ni?” Petro wakaingula kuti: “Nduwe Kristo wa Leza.”+ 21 Lino wakabalailila cakusinizya kuti bataambili muntu uuli woonse makani aaya,+ 22 pele wakati: “Mwanaamuntu weelede kwiinda mumapenzi manji akukakwa abaalu, basilutwe babapaizi abalembi akuti uyoojaigwa,+ mpoonya akubusyigwa mubuzuba bwatatu.”+

23 Mpoonya wakayaambele kubaambila boonse kuti: “Ikuti umwi kayanda kunditobela, aliimye,+ akunyamuna cisamu cakwe cakupenzyezya* buzuba abuzuba akuzumanana kunditobela.+ 24 Nkaambo kufwumbwa uuyanda kufwutula buumi bwakwe uyoobusweekelwa, pele kufwumbwa uusweekelwa buumi bwakwe akaambo kandime uyoobufwutula.+ 25 Mubwini, nimpindu nzi njakonzya kujana muntu ikuti wavwuba nyika yoonse pele wasweekelwa buumi bwakwe naa wanyonyookelwa zintu zyoonse?+ 26 Nkaambo kufwumbwa uufwa nsoni akaambo kandime amajwi aangu, Mwanaamuntu uyoofwa nsoni akaambo kamuntu ooyo aakuboola mubulemu bwakwe abwa Bausyi abwabangelo basalala.+ 27 Pele ncobeni ndimwaambila kuti, nkobali bamwi ibaimvwi aano ibatakafwi kusikila bakasaangune kubona Bwami bwa Leza.”+

28 Mubwini, nokwakainda mazuba aatandila kulusele kaambide majwi aaya, wakatola Petro, Johane alimwi a Jakobo akutanta ambabo acilundu kuyoopaila.+ 29 Lino naakali kupaila, ciwa cabusyu bwakwe cakasanduka azyalo zisani zyakwe zyakatuba buu akumweka-mweka. 30 Alimwi amubone! Baalumi bobilo bakali kubandika anguwe; baalumi aabo bakali Musa a Elija. 31 Aaba bakalibonya mubulemu akutalika kubandika zyakuzwa kwakwe anyika ooko nkwaakali afwaafwi kuzuzikizya ku Jerusalemu.+ 32 Lino Petro abaabo mbaakali limwi bakafwide ŋonzi, pele nobakasinsimuka bakabona bulemu bwakwe+ abaalumi aabo bobilo ibakaimvwi anguwe. 33 Lino aaba nobakali kwaandaana anguwe, Petro wakaambila Jesu kuti: “Omwiiyi, ncibotu kuti tukkale aano. Aboobo atubikke matente otatwe, lyako, lya Musa alya Elija.” Pele tanaakacizyi pe ncaakali kwaamba. 34 Pele naakali kwaamba makani aaya kwakaba kkumbi, ilyakatalika kubavwumbilila. Lino nolyakabavwumbilila kkumbi eelyo bakayoowa. 35 Mpoonya mukkumbi mwakamvwugwa jwi+ ilyakati: “Ooyu Mwanaangu, ooyo wasalwa.+ Amumuswiilile.”+ 36 Nokwakamvwugwa jwi, Jesu wakajanika kuti uli alikke. Pele bakaumuna buyo alimwi kumazuba aayo kunyina ngobakaambila zintu eezyo nzyobakabona.+

37 Mubuzuba bwakatobela nobakaseluka acilundu, kwakamucinga nkamu yabantu mpati.+ 38 Lino amubone! Mwaalumi umwi munkamu wakoompolola wati: “Omwiiyi, ndakulomba undilangile mwanaangu musankwa, nkaambo ngomwana alikke ngondijisi.+ 39 Alimwi bona! Kuli muuya uumunjila, mpoonya aawo mwana ulakwiila, alimwi ulamusuntusya akumugusya ccovwu kumulomo, alimwi tuumuleki buyo pe ccita mane wamupenzya akumucisa. 40 Lino ndalibalombede basikwiiya bako kuti bautande, pele baalilwa.” 41 Mukwiingula Jesu wakati: “Nywebo nozyalani linyina lusyomo alimwi nobasicinguni,+ ino ndilakkala andinywe akumukkazikila moyo kwaciindi cilamfwu buti? Komuleta kuno mwanaako.”+ 42 Pele noliba leelyo naakacili kuboola, idaimona eelyo lyakamuwisizya ansi akumusuntusya. Pele Jesu wakaukalalila muuya ooyo uusofweede akumuponya mulombe ooyo akumutola kuli bausyi. 43 Bantu boonse bakagambwa kapati akaambo kanguzu zya Leza zitalivwulili.

Lino bantu boonse nobakacili kugambwa zintu eezyi zyoonse nzyaakali kucita, wakaambila basikwiiya bakwe kuti: 44 “Amwaaswiililisye akwaayeeya majwi aaya, nkaambo Mwanaamuntu uyakwaabwa mumaanza aabantu.”+ 45 Pele tiibakakamvwisya kaambo nkaakali kwaamba. Atwaambe kuti kakalisisidwe kulimbabo kuti batazyibi ncokakali kwaamba, alimwi bakayoowa kumubuzya kujatikizya kaambo aaka.

46 Mpoonya bakatalika kukazyanya mulicabo kuti naa nguni wakali mupati akati kabo.+ 47 Lino mbwaanga Jesu wakalizyi mbobakali kuyeeya mumyoyo yabo, wakabweza mwana musyoonto, wamwiimika kumbali lyakwe, 48 akubaambila kuti: “Kufwumbwa uutambula mwana musyoonto ooyu muzina lyangu ulanditambula andime; alimwi kufwumbwa uunditambula ulamutambula ayooyo wakandituma.+ Nkaambo ooyo uucita zintu mbuli muniini akati kanu nyoonse, ngomupati.”+

49 Eelyo Johane wakaingula wati: “Omwiiyi, twakabona muntu umwi katanda madaimona kwiinda mukubelesya zina lyako, alimwi twakasola kumukasya, nkaambo takutobeli antoomwe andiswe.”+ 50 Pele Jesu wakamwaambila kuti: “Mutasoli kumukasya, nkaambo kufwumbwa muntu uutamulwani uli kulubazu lwanu.”

51 Lino mazuba aakuti atolwe kujulu+ naakali kuyaabuswena,* wakakanzide buyo kuya ku Jerusalemu. 52 Aboobo wakatuma batumwa kumbele lyakwe. Eelyo bakaunka akunjila mumunzi waba Samariya kuti bakamubambile zintu. 53 Pele tiibakamutambula pe,+ nkaambo wakakanzide* kuya ku Jerusalemu. 54 Aboobo basikwiiya bakwe, ba Jakobo a Johane+ nobakabona boobo bakamubuzya kuti: “Mwami, sena ulayanda kuti twaambile mulilo uboole kuzwa kujulu kutegwa ubanyonyoone?”+ 55 Pele wakacenguluka akubakalalila. 56 Aboobo bakaunka kumunzi uumbi.

57 Lino nobakali kuyaabweenda munzila, muntu umwi wakamwaambila kuti: “Ndilakutobela kufwumbwa nkounka.” 58 Pele Jesu wakamwaambila kuti: “Bamwaaba balijisi malyango abayuni bamujulu balijisi ziteente, pele Mwanaamuntu tajisi aakubikka mutwe wakwe.”+ 59 Mpoonya wakati kumuntu umbi: “Koba sikunditobela.” Imwaalumi ooyo wakati: “O Mwami, koleka saansi nduunke ndikaakuzikke bataata.”+ 60 Pele wakamwaambila kuti: “Kobaleka bafwu+ bazikke bafwu babo, pele yebo koya ukaambilizye Bwami bwa Leza koonse-koonse.”+ 61 Aumbi wakati: “Ndilakutobela Mwami, pele saansi kondizumizya ndikalaye bamuŋanda yangu.” 62 Jesu wakamwaambila kuti: “Kunyina muntu uujatide pulawu pele uulanga zintu zili musyule+ iweelela kuba mu Bwami bwa Leza.”+