1 Makani
22 Mpoonya Davida wakati: “Abusena aano mpoiyooyakilwa ŋanda ya Jehova Leza mwini-mwini, alimwi cipaililo eeci ncazituuzyo zyuumpwa cabana Israyeli.”+
2 Kumane Davida wakalailila kuti beenzu+ ibakali munyika ya Israyeli bayobololwe, eelyo wakababikka kuba basikubeza mabwe aakuyasya ŋanda ya Leza mwini-mwini.+ 3 Alimwi Davida wakabamba butale bunji kapati bwakupangisya mipikili yazijazyo zyamilyango azijatilizyo, amukuba munji kapati cakuti tiiwakali kukonzya kupimwa,+ 4 alimwi amasamu aakkedari+ aatakali kukonzya kubalwa, nkaambo bana Sidoni+ abana Turo+ bakaleta masamu aakkedari manji kapati kuli Davida. 5 Davida wakaamba kuti: “Mwanaangu Solomoni ucili muniini alimwi tajisi luzyibo,*+ alimwi ŋanda iyeelede kuyakilwa Jehova yeelede kuba ŋanda yeebeka kapati,+ kutegwa mpuwo abubotu+ bwanjiyo zizyibwe kubantu bamumasi oonse.+ Aboobo ndilamubambila zibelesyo.” Eelyo Davida wakabamba zibelesyo zinji kapati katanafwa.
6 Kuyungizya waawo, wakaita mwanaakwe Solomoni akumulailila kuti ayakile Jehova Leza wa Israyeli ŋanda. 7 Davida wakaambila mwanaakwe Solomoni kuti: “Mebo ndakali kuyandisisya mumoyo wangu kuyaka ŋanda yiitwa azina lya Jehova Leza wangu.+ 8 Pele Jehova wakandaambila kuti, ‘Wakatila bulowa bunji kapati, alimwi wakalwana nkondo zipati. Tokooyaka ŋanda yiitwa azina lyangu+ nkaambo wakatila bulowa bunji anyika kubusyu bwangu. 9 Bona! Uyoozyala mwana musankwa+ ooyo uuyooba siluumuno alimwi ndiyoomupa kulyookezya kuli basinkondonyina boonse ibamuzingulukide,+ nkaambo uyakuulikwa zina lyakuti Solomoni,*+ alimwi ndiyoopa luumuno akuliiba kubana Israyeli mumazuba aakwe.+ 10 Ngonguwe uuyooyaka ŋanda yiitwa azina lyangu.+ Uyooba mwanaangu, eelyo mebo ndiyooba usyi.+ Ndiyookkazikizya bwami bwakwe mu Israyeli kukabe kutamani.’+
11 “Lino mwanaangu, Jehova abe anduwe alimwi uzwidilile akuyaka ŋanda ya Jehova Leza wako mbubonya mbwaakaamba kujatikizya nduwe.+ 12 Jehova aakakupe maano akumvwisya+ ciindi aakukupa nguzu zyakweendelezya bana Israyeli kutegwa utobele mulawo wa Jehova Leza wako.+ 13 Ikuti ukalomye kutobela milawo+ ambeta eezyo Jehova nzyaakalailila Musa kupa bana Israyeli,+ nkokuti uyoozwidilila. Koyuma akuba sicamba. Utayoowi nokuba kukankama.+ 14 Mebo ndabeleka cakulitakata mukulibambila kuyaka ŋanda ya Jehova, ndabamba matalenta* aangolida aali 100,000, matalenta aansiliva aali 1,000,000, mukuba munji abutale bunji+ cakuti tazikonzyi akupimwa, alimwi ndabamba zisamu amabwe,+ pele ayebo uyooyungizya alizyeezyi. 15 Ulijisi basikubeleka milimo banji–basikubeza mabwe,+ basikubeza mapulanga alimwi abantu bali aluzyibo mumilimo yiindene-indene.+ 16 Ngolida, nsiliva, mukuba abutale tazikonzyi akupimwa.+ Lino kotalika mulimo, Jehova abe anduwe.”+
17 Mpoonya Davida wakalailila basilutwe boonse babana Israyeli kuti bagwasye Solomoni mwanaakwe. Wakabaambila kuti: 18 “Sena Jehova Leza wanu tali andinywe, alimwi sena tanaamupa kulyookezya kumabazu oonse? Nkaambo bantu bamunyika wabaaba mumaanza aangu alimwi nyika yabombezyegwa kubusyu bwa Jehova akubusyu bwabantu bakwe. 19 Lino kolyaaba amoyo wako woonse abuumi bwako boonse kuyandaula Jehova Leza wako,+ alimwi kotalika kuyaka tempele lya Jehova Leza mwini-mwini+ kutegwa bbokesi lyacizuminano ca Jehova liletwe azibelesyo zisalala zya Leza mwini-mwini+ kuŋanda yakayakilwa izina lya Jehova.”+