2 Makani
1 Lino Solomoni mwana wa Davida wakazumanana kuba anguzu kapati mubwami bwakwe, alimwi Jehova Leza wakwe wakali aanguwe alimwi wakamusumpula kapati.+
2 Solomoni wakaita bana Israyeli boonse, basilutwe babantu bali zyuulu ababantu bali myaanda, babetesi abasilutwe boonse ba Israyeli, nkokuti basilutwe baziinga zyabamausyi. 3 Kumane Solomoni ambungano yoonse bakaunka kubusena bwamujulu bwakukombela ibwakali ku Gibeoni;+ nkaambo ooko nkolyakabede tente lyakuswaanganina lya Leza mwini-mwini eelyo Musa mubelesi wa Jehova ndyaakapanga munkanda. 4 Nokuba boobo, Davida wakalilibwezede Bbokesi lya Leza mwini-mwini kuzwa ku Kiriyati-jearimu+ akulitola kubusena mbwaakalibambilide; wakaliimikila tente mu Jerusalemu.+ 5 Lino cipaililo camukuba+ eeco ncaakapangide Bezaleli+ mwana wa Uri imwana wa Huri cakabikkidwe kumbele lyatente lyakukombela lya Jehova; eelyo mbuli lyoonse Solomoni ambungano bakali kuunka kuyoopaila kumbele lyancico.* 6 Lino Solomoni wakatuula zituuzyo ooko kubusyu bwa Jehova, alimwi wakatuula zituuzyo zyuumpwa zili 1,000 acipaililo camukuba+ icakali kumbele lyatente lyakuswaanganina.
7 Masiku aayo Leza wakalibonya kuli Solomoni akumwaambila kuti: “Kondaambila ncoyanda kuti ndikupe.”+ 8 Mpoonya Solomoni wakati kuli Leza: “Wakatondezya luyando lutamani lupati kuli Davida taata,+ alimwi wandibikka kuba mwami mubusena bwakwe.+ 9 Lino O Jehova Leza, kozuzikizya cisyomezyo cako kuli Davida taata,+ nkaambo wandibikka kuba mwami kuti ndeendelezye bantu aaba banji kapati ibali mbuli musenga uuli anyika.+ 10 Kondipa busongo aluzyibo+ kutegwa ndeendelezye bantu aaba,* nkaambo ino nguni uukonzya kubeteka bantu bako aaba banji boobu?”+
11 Mpoonya Leza wakati kuli Solomoni: “Akaambo kakuti eeci ncoyandisya mumoyo wako, tiiwalomba buvwubi, lubono abulemu naa buumi bwabaabo bakusulide nokuba koongola,* pele walomba busongo aluzyibo kutegwa ubeteke bantu bangu aabo mbondakubikka kuti ube mwami wabo,+ 12 tokoopegwa buyo busongo aluzyibo pe; pele ndilakupa abuvwubi, lubono alimwi abulemu oobo bami bakakusaangunina mbobatakajisi alimwi abaabo ibayooboola musyule lyako mbobatakabi ambubo.”+
13 Aboobo Solomoni wakaboola ku Jerusalemu kuzwa kubusena bwamujulu bwakukombela ibwakali ku Gibeoni+ kumbele lyatente lyakuswaanganina; eelyo wakalela mu Israyeli. 14 Solomoni wakazumanana kuliyungizizya nkalaki amabbiza;* wakaba ankalaki zili 1,400 amabbiza* aali 12,000,+ alimwi wakazibikka muminzi yankalaki+ afwaafwi amwami mu Jerusalemu.+ 15 Mwami wakaivwuzya kapati nsiliva angolida mu Jerusalemu cakuti yakaba buyo mbuli mabwe,+ alimwi azyalo zisamu zyakkedari zyakavwula kapati cakuti zyakaba buyo mbuli zisamu zyamukuyu izili mu Sepela.+ 16 Mabbiza aa Solomoni akali kuulwa ku Egepita,+ alimwi nkamu yabasambazi bamwami mbabakali kuula mabbiza mumatanga-matanga* amuulo omwe.+ 17 Inkalaki imwi aimwi yaku Egepita yakali kuulwa mali aansiliva aali 600, bbiza lyomwe lyakali kuulwa mali aansiliva aali 150; eelyo abalo bakali kuzisambala kubami boonse babana Heti abami babana Siriya.