2 Makani
18 Lino Jehosafati wakalivwubide akulemekwa kapati,+ pele wakapanga cizuminano calukwatano amukwasyi wa Ahabu.+ 2 Aboobo nokwakainda myaka iili mboibede wakaunka kuli Ahabu ku Samariya,+ eelyo Ahabu wakatuulila Jehosafati abantu mbaakali limwi mbelele aŋombe zinji. Mpoonya wakamoongelezya* kuti aunke kuyoolwana Ramoti-gileadi.+ 3 Kumane Mwami Ahabu wa Israyeli wakati ku Mwami Jehosafati wa Juda: “Sena ulaunka andime ku Ramoti-gileadi?” Jehosafati wakamwiingula kuti: “Mebo anduwe tuli bamwi, abalo bantu bangu abantu bako mbamwi alimwi tuyookugwasya munkondo.”
4 Pele Jehosafati wakaambila mwami wa Israyeli kuti: “Kosaanguna kubuzya makani aaya kuli Jehova.”+ 5 Aboobo mwami wa Israyeli wakabunganya basinsimi, ibaalumi bali 400 akubabuzya kuti: “Sena tuunke kuyoolwana Ramoti-gileadi naa pe?” Eelyo bakati: “Kamuya, Leza mwini-mwini uyoowaaba munzi mumaanza aanu omwami.”
6 Mpoonya Jehosafati wakati: “Sena takucikwe musinsimi uumbi wa Jehova?+ Atubuzye akulinguwe.”+ 7 Eelyo mwami wa Israyeli wakaambila Jehosafati kuti: “Kucili mwaalumi omwe+ ngotukonzya kubuzya kujatikizya Jehova; pele mebo ndilimusulide nkaambo kunyina nasinsima zibotu kujatikizya ndime, pele lyoonse usinsima zibi zyalo.+ Ngu Mikaya mwana wa Yimula.” Pele Jehosafati wakati: “Mwami teelede kwaamba cintu cili boobu.”
8 Aboobo mwami wa Israyeli wakaita silutwe wababelesi bamuŋanda yamwami akumwaambila kuti: “Kofwambaana ukamulete Mikaya mwana wa Yimula.”+ 9 Lino mwami wa Israyeli a Jehosafati mwami wa Juda bakalikkede umwi aumwi acuuno cakwe cabwami; bakalikkede kucuumino camaila icakali kumulyango wamunzi wa Samariya kabasamide zisani zyabwami, alimwi basinsimi boonse bakali kusinsima kumbele lyabo. 10 Mpoonya Zedekiya mwana wa Kenana wakapanga meja aabutale akwaamba kuti: “Mboobu mbwaamba Jehova, ‘Uyoobelesya meja aaya kutonka bana Siriya kusikila ukabanyonyoone.’” 11 Basinsimi bambi boonse abalo bakali kusinsima mbubonya oobo kabati: “Koya ku Ramoti-gileadi eelyo uyoozunda;+ Jehova uyoowaaba munzi mumaanza aako omwami.”
12 Aboobo mutumwa iwakaunkide kuyakwiita Mikaya wakamwaambila kuti: “Bona! Majwi oonse basinsimi ngobaamba kujatikizya mwami mabotu. Ayebo ndakukomba waambe majwi mabotu+ mbuli mbabo.”+ 13 Pele Mikaya wakati: “Masimpe Jehova mbwali muumi, ndilaamba buyo majwi ngatiindaambile Leza wangu.”+ 14 Mpoonya wakaboola kumwami, eelyo mwami wakamubuzya kuti: “Mikaya, sena tuunke kuyoolwana Ramoti-gileadi naa pe?” Mpoonya aawo wakaingula kuti: “Kamuya eelyo muyoozunda; bayakwaabwa mumaanza aanu.” 15 Kumane mwami wakati kulinguwe: “Ino ndikupe kukonka kwaziindi zyongaye kutegwa undaambile masimpe muzina lya Jehova?” 16 Eelyo Mikaya wakati: “Ndabona bana Israyeli boonse kabamwaikide mumalundu mbuli mbelele zitakwe mweembezi.+ Jehova wakati: ‘Aaba tabajisi simalelaabo. Abapiluke muluumuno umwi aumwi kuŋanda yakwe.’”
17 Mpoonya mwami wa Israyeli wakaambila Jehosafati kuti: “Sena tiindakwaambila kuti, ‘Takoosinsima zibotu kujatikizya ndime, pele zibi zyalo’?”+
18 Kumane Mikaya wakati: “Aboobo, amuswiilile jwi lya Jehova: Ndabona Jehova kakkede acuuno cakwe cabwami+ alimwi amakamu oonse aakujulu+ kaayimvwi kululyo akulumwensyi lwakwe.+ 19 Mpoonya Jehova waamba kuti, ‘Ino nguni uutiimoongelezye Mwami Ahabu wa Israyeli kutegwa aunke akuyoojaigwa ku Ramoti-gileadi?’ Lino umwi wali kwaamba ceeci kakuli umbi wali kwaamba cimbi. 20 Kumane kwaboola muuya*+ umwi iwaima kumbele lya Jehova akwaamba kuti, ‘Mebo ndilamoongelezya.’ Jehova wamubuzya kuti, ‘Ino ulamoongelezya buti?’ 21 Waingula kuti, ‘Ndilaunka ndikabe muuya wabubeji mumilomo yabasinsimi bakwe boonse.’ Aboobo wati, ‘Ncobeni ulamoongelezya alimwi masimpe ulazwidilila. Koya ukacite mbubonya oobo.’ 22 Lino Jehova wabikka muuya wabubeji mumilomo yabasinsimi bako aaba,+ pele Jehova waamba kuti yebo uyoosikilwa mapenzi.”
23 Eelyo Zedekiya+ mwana wa Kenana wakaswena afwaafwi akumuuma lubayi+ Mikaya+ akwaamba kuti: “Ino muuya wa Jehova wainda nzila iili kuzwa kulindime kuti uzikwaambaule anduwe?”+ 24 Mpoonya Mikaya wakaingula kuti: “Uyakwiibona nzila eeyo mubuzuba oobo waakunjila mukaanda kamukati kuti uyube.” 25 Kumane mwami wa Israyeli wakati: “Amumubweze Mikaya akumusiya mumaanza aa Amoni silutwe wamunzi amumaanza aa Joasi mwana wamwami. 26 Mukabaambile kuti, ‘Mboobu mbwaamba mwami: “Amumubikke muntolongo mwaalumi ooyu+ alimwi kamumupa cakulya cisyoonto amaanzi aakunywa masyoonto kusikila ndikapiluke muluumuno.”’” 27 Pele Mikaya wakati: “Ikuti ukapiluke muluumuno, nkokuti Jehova kunyina naambaula andime pe.”+ Kumane wakayungizya kuti: “Kamwaayeeyede majwi aangu, nobantu nyoonse.”
28 Aboobo mwami wa Israyeli a Jehosafati mwami wa Juda bakaunka ku Ramoti-gileadi.+ 29 Mpoonya mwami wa Israyeli wakati kuli Jehosafati: “Ndilalisisa kutegwa nditalizibyi akunjila munkondo, pele yebo weelede kusama zisani zyako zyabwami.” Aboobo mwami wa Israyeli wakalisisa, eelyo bakanjila munkondo. 30 Lino mwami wa Siriya wakalailide basilutwe babasinkalaki bakwe kuti: “Mutalwani amuntu uuli woonse pe, abe mwana naa mupati, pele mulwane buyo amwami wa Israyeli alikke.” 31 Lino basilutwe babasinkalaki mbobakamubonena buyo Jehosafati, bakalyaambauzya kabati: “Ooyu ngomwami wa Israyeli.” Aboobo bakanyona akumutobela kuti bamulwane; kumane Jehosafati wakatalika koongolola kuti agwasyigwe,+ aboobo Jehova wakamugwasya. Mpoonya aawo Leza wakapa kuti bamuleke. 32 Basilutwe babasinkalaki nobakabona kuti tali mwami wa Israyeli, mpoonya aawo bakaleka kumutobela.
33 Pele muntu umwi wakafwusa muvwi cakutazyiba, eelyo wakayasa mwami wa Israyeli amaswaanganino aacibaki cankondo. Aboobo mwami wakaambila sikweenzya nkalaki yakwe kuti: “Konyona akundigwisya munkondo* nkaambo bandicisa kapati.”+ 34 Nkondo yakabbebba buzuba oobo boonse, eelyo mwami wa Israyeli bakali mwiimikizizye kabamujatilide munkalaki kalangide bana Siriya kusikila kumangolezya; mpoonya kumabbililo aazuba wakafwa.+