2 Makani
25 Amaziya wakali amyaka iili 25 naakaba mwami, alimwi wakalela kwamyaka iili 29 mu Jerusalemu. Banyina bakali ba Jehoadani baku Jerusalemu.+ 2 Wakazumanana kucita ziluleme mumeso aa Jehova, pele ikutali camoyo woonse. 3 Lino mbobwakabeda buyo anguzu bwami bwakwe, wakabajaya babelesi bakwe ibakajaya mwami, nkokuti bausyi.+ 4 Pele bana babo tanaakabajaya pe, nkaambo wakacita kweelana acilembedwe mu Mulawo, nkokuti mubbuku lya Musa oomo Jehova mwaakalailila kuti: “Bamausyi tabeelede kufwida zibi zyabana babo, abalo bana tabeelede kufwida zibi zyabamausyi; umwi aumwi weelede kufwida cibi cakwe.”+
5 Lino Amaziya wakabunganya ba Juda antoomwe akubaimika kweelana aziinga zyabamausyi, kweelana abasilutwe bazyuulu abasilutwe bamyaanda boonse bamu Juda a Benjamini.+ Wakababala kutalikila amyaka iili 20 kuya kumbele,+ eelyo wakajana kuti kwakali basikalumamba bayiisyidwe* kulwana nkondo ibali 300,000 ibakonzya kubelesya panga antobo mpati. 6 Kuyungizya waawo, wakabbadela basikalumamba basinguzu kuzwa ku Israyeli ibali 100,000 matalenta* aansiliva aali 100, kuti bamugwasye munkondo. 7 Pele umwi muntu wa Leza mwini-mwini wakaboola kulinguwe akumwaambila kuti: “Omwami, utalekeli mpi yabasikalumamba yabana Israyeli kuunka anduwe nkaambo Jehova tali akati kabana Israyeli,+ nkokuti bana Efraimu boonse. 8 Pele koya yebo olikke akuba sicamba munkondo. Kwataba boobo, Leza mwini-mwini ulakonzya kukupa kuti uzundwe kuli basinkondonyoko, nkaambo Leza ulijisi nguzu zyakugwasya+ alimwi akupa kuti muntu azundwe.” 9 Kumane Amaziya wakati kumuntu wa Leza mwini-mwini: “Ino tulacita buti amatalenta aali 100 ngondabbadela basikalumamba bana Israyeli?” Muntu wa Leza mwini-mwini wakaingula kuti: “Jehova ulakonzya kukupa manji kwiinda yaayo.”+ 10 Aboobo Amaziya wakabapilusya basikalumamba ibakazwa kuli Efraimu akubaambila kuti bapiluke kwabo. Pele bakanyema kapati akaambo kaba Juda cakuti bakapiluka kwabo kabakalede kapati.
11 Mpoonya Amaziya wakaliyumya akusololela bantu bakwe ku Kkuti lya Munyo,+ eelyo wakajaya baalumi baku Seiri bali 10,000.+ 12 Alimwi baalumi bana Juda bakajata ibali 10,000 kabali baumi. Eelyo bakabatola atala aandomba akubawaala mujeleele kuzwa atala aawo, aboobo boonse bakafwunzauka. 13 Pele basikalumamba ibakali munkamu Amaziya njaakapilusya kuti itaunki anguwe kunkondo,+ bakatalika kusaala minzi ya Juda, kuzwa ku Samariya+ kusikila ku Beti-horoni;+ bakajaya bantu bali 3,000 akubweza zisaalo zinji.
14 Lino Amaziya naakapiluka kuzwa kukulwana bana Edomu, wakaletelezya abaleza babaalumi baku Seiri akubabikka kuti babe baleza bakwe,+ eelyo wakatalika kubakomba akubauntumwida busi bwazipaizyo. 15 Aboobo Jehova wakamunyemena kapati Amaziya, eelyo wakatuma musinsimi kulinguwe iwakamwaambila kuti: “Ino nkaambo nzi ncotobela baleza babantu ibatakafwutula bantu babo kuzwa mumaanza aako?”+ 16 Kacaambaula musinsimi, mwami wakati: “Sena kuli notwakakusala kuti ube sikulaya mwami?+ Umuna!+ Sena uyanda kuti bakujaye?” Mpoonya musinsimi wakaumuna, pele wakayungizya kuti: “Ndilizyi kuti Leza wasala kukunyonyoona akaambo kacintu eeci ncoocita alimwi akuti tonooswiilila lulayo lwangu.”+
17 Naakamana kubuzya-buzya kuli basikumulaya, Mwami Amaziya wa Juda wakatuma mulumbe kuli Jehoasi mwana wa Jehoazi mwana wa Jehu imwami wa Israyeli, kuyoomwaambila kuti: “Koboola tulwane.”*+ 18 Mwami Jehoasi wa Israyeli wakatuma mulumbe ooyu ku Mwami Amaziya wa Juda wakuti: “Nsaku yamamvwa mu Lebano yakatuma mulumbe kukkedari ilyakali mu Lebano wakuti, ‘Kondipa mwanaako musimbi kutegwa mwanaangu musankwa amukwate.’ Pele cinyama camusyokwe icakali mu Lebano cakainda akulyataula nsaku yamamvwa eeyo. 19 Yebo wakati, ‘Bona! Ndamuzunda* Edomu.’+ Aboobo moyo wako wakupa kuba antunda akuyanda kuti ulemekwe. Pele lino weelede kukkala muŋanda* yako. Ino nkaambo nzi ncoyanda kuliletela mapenzi akuzundwa, kuti yebo a Juda munyonyoonwe antoomwe?”
20 Pele Amaziya tanaakaswiilila pe,+ nkaambo Leza mwini-mwini ngowakapa kuti cicitike boobo kutegwa abaabe mumaanza aabasikondonyina+ nkaambo bakatobela baleza baku Edomu.+ 21 Aboobo Mwami Jehoasi wa Israyeli wakaunka, eelyo bakalwana walo a Mwami Amaziya wa Juda ku Beti-semesi,+ mucisi ca Juda. 22 Juda wakazundwa kubana Israyeli, aboobo umwi aumwi wakatijila kuŋanda* yakwe. 23 Mwami Jehoasi wa Israyeli wakajata Mwami Amaziya wa Juda, mwana wa Jehoasi mwana wa Jehoazi,* ku Beti-semesi. Mpoonya wakamuleta ku Jerusalemu alimwi wakamwaya bwaanda bwa Jerusalemu kuzwa ku Mulyango wa Efraimu+ mane kusikila ku Mulyango Waku Kkona,+ tukokola tuli 400.* 24 Wakabweza ngolida yoonse, nsiliva azintu zyoonse izyakajanwa muŋanda ya Leza mwini-mwini mumaanza* aa Obedi-edomu amuziyobwedo zyamuŋanda yamwami,+ kubikkilizya abaange. Kumane wakapiluka ku Samariya.
25 Amaziya+ mwana wa Jehoasi mwami wa Juda wakapona myaka iili 15 kuzwa naakafwa Jehoasi+ mwana wa Jehoazi mwami wa Israyeli.+ 26 Makani oonse aakaindi aamba zya Amaziya, kuzwa kumatalikilo kusikila kumamanino alilembedwe mu Bbuku lyamakani aa Bami ba Juda aba Israyeli. 27 Kuzwa ciindi Amaziya naakaleya akuleka kutobela Jehova, bakamuzangila+ mu Jerusalemu, eelyo wakatijila ku Lakisi, pele bakamutumina bantu ku Lakisi akumujaya ooko. 28 Aboobo bakamunyamuna amabbiza akumupilusya akuyoomuzikka ku Jerusalemu abamausyi mumunzi wa Juda.