Jobu

 2 Nkaambo bukali bulamujaya mufwubafwuba,

Alimwi munyono ulamujaya ooyo uutakwe maano.

 3 Mebo lwangu ndalibonena mufwubafwuba kasimpa miyanda,

Pele mpoonya-mpoonya busena mbwakkala bulasinganizyigwa.

 4 Bana bakwe bali kulamfwu abusena bwakukwabililwa,

Alimwi balalyataulwa kumilyango yamunzi,+ kakunyina uubavwuna.

 5 Ooyo uufwide nzala ulya zyeezyo nzyatebula,

Ulazibweza nokuba kuzwa kumamvwa,

Alimwi lubono lwabo lulacegwa mukakole.

 6 Nkaambo zintu zibi tazizwi mulusuko,

Aalo mapenzi taazwi mubulongo pe.

 7 Nkaambo muntu uzyalilwa mapenzi,

Mbubonya nsasi mbozipasauka kuya mujulu.

 8 Pele nindali ndime, nindamukombelezya Leza,

Alimwi kaambo kangu nindakabikka mumaanza aa Leza,

 9 Ooyo uucita zintu zipati zitazyibiki,

Zintu zigambya zitakonzyi kubalwa.

10 Walo upa kuti mvwula iwe anyika

Akutuma maanzi mumyuunda.

11 Ulabikka babombe abusena busumpukide,

Alimwi muntu uuside umubusyila kulufwutuko.

12 Ulajaya makanze aabampelenge,

Kutegwa milimo yamaanza aabo itazwidilili.

13 Ulabajata basongo mubucenjezu bwabo beni,+

Cakuti makanze aabacenjezu alajaigwa.

14 Balaswaangana amudima isyikati,

Alimwi akalangabwaaseme balaampaampa mbuli kuti masiku.

15 Walo ulafwutula muntu kuzwa kupanga lili kumulomo wabo,

Akuvwuna bacete kuzwa kujanza lyabasinguzu,

16 Cakuti muntu uupengede ulaba abulangizi,

Pele milomo yabantu bataluleme ilasinkwa.

17 Bona! Ulikkomene muntu ngwasinsa Leza;

Aboobo utalukaki lulayo ndwapa Singuzuzyoonse!

18 Nkaambo walo mwini nguupa macise, pele alimwi nguucaanga cilonda;

Ulapwayaula, pele alimwi ulaponya amaanza aakwe.

19 Uyookuvwuna kumapenzi aali cisambomwe,

Naaba mapenzi aaciloba taakakucisi pe.

20 Kuciindi canzala uyookuvwuna kulufwu,

Alimwi kuciindi cankondo uyookuvwuna kunguzu zyapanga.

21 Yebo uyookwabililwa kumulaka uucisa mbuli cimboko,+

Alimwi tokaluyoowi pe lunyonyooko lwaakusika.

22 Lunyonyooko anzala uyooziseka,

Alimwi tokabayoowi banyama bamusyokwe.

23 Nkaambo mabwe aali mumuunda taakakucisi pe,*

Abalo banyama bamusyokwe bayookkala muluumuno anduwe.

24 Uyoozyiba kuti tente lyako lilikwabilidwe,*

Alimwi kunyina cintu ncoyoojana kuti cilisweekede waakulingula macelelo aako.

25 Uyooba abana banji,

Alimwi lunyungu lwako luyoovwula kapati mbuli zimena ansi.

26 Uyakuunka mucuumbwe kocijisi nguzu,

Mbubonya mbuli misunta yamaila iibungikwa muciindi cayo.