Intembauzyo

107 Amumulumbe Jehova, nkaambo mubotu;+

Luyando lwakwe lutamani nkoluli lyoonse mane kukabe kutamani.+

 2 Aabo mbaavwuna* Jehova abaambe boobo,

Aabo mbaavwuna kujanza lyasinkondonyina,+

 3 Aabo mbaakabunganya antoomwe kuzwa muzisi,+

Kuzwa kujwe akumbo,*

Kuzwa kunyika akumusanza.+

 4 Bakaingaila munkanda, mucimpayuma;

Tiibakajana nzila yakubatola kumunzi nkobakali kukonzya kukkala.

 5 Bakafwa nzala anyota;

Bakanetuka akaambo kakukatala.

 6 Bakali kukwiilila Jehova mumapenzi aabo;+

Wakabavwuna mumakatazyo aabo.+

 7 Wakabeenzya munzila iiluleme+

Kuti basike kumunzi nkobakali kukonzya kukkala.+

 8 Bantu abamulumbe Jehova+ akaambo kaluyando lwakwe lutamani

Alimwi akaambo kamilimo yakwe iigambya njaacitila bana babantu.+

 9 Nkaambo waimana nyota yabaabo bafwide nyota

Akubakkutya zintu zibotu aabo bafwide nzala.+

10 Ibamwi bakali kukkala mumudima uusiya mbi,

Basintolongo bapengede ibakaangidwe nsimbi.

11 Nkaambo bakakaka kutobela ijwi lya Leza;

Bakanyansya lulayo lwa Mupatikampatila.+

12 Aboobo wakabombya myoyo yabo amapenzi;+

Bakawa, alimwi kwakanyina wakubagwasya.

13 Bakakwiilila Jehova kuti abagwasye mumapenzi aabo;

Wakabafwutula mumakatazyo aabo.

14 Wakabagusya mumudima uusiya mbi,

Alimwi wakadunsaula nsimbi nzyobakaangidwe.+

15 Bantu abamulumbe Jehova akaambo kaluyando lwakwe lutamani+

Alimwi akaambo kamilimo yakwe iigambya njaacitila bana babantu.

16 Nkaambo wapwayaula zijazyo zyamukuba

Akukosaula mingwala yabutale.+

17 Bakali bafwubafwuba eelyo bakapenga+

Akaambo kazinyonyoono zyabo amilandu yabo.+

18 Tiibakacili kuyanda kulya cakulya cili coonse;

Bakasika kufwaafwi amilyango yalufwu.

19 Bakali kukwiilila Jehova kuti abagwasye mumapenzi aabo;

Wakali kubafwutula mumakatazyo aabo.

20 Wakali kubatumina jwi lyakwe akubaponya+

Akubagwisya muzilindi mobakanyikilide.

21 Bantu abamulumbe Jehova akaambo kaluyando lwakwe lutamani

Alimwi akaambo kamilimo yakwe iigambya njaacitila bana babantu.

22 Abatuule zipaizyo zyakulumba+

Akwaambilizya milimo yakwe ajwi lyakukondwa.

23 Aabo beenda mulwizi amato,

Ibacita makwebo mumaanzi manji,+

24 Baibona milimo ya Jehova

Amilimo yakwe iigambya mumpisi yamaanzi;+

25 Mbwaamba ijwi akupa kuti kutalike kubbubbula guwo pati,+

Eelyo linyamuna mayuwe aamulwizi.

26 Balaunka mujulu;

Balabbila kunsi mumpisi.

27 Baladadalika akuzemba mbuli muntu uukoledwe,

Alimwi busyaabupampu bwabo boonse buba bwabuyo.+

28 Mpoonya bakwiilila Jehova mumapenzi aabo,+

Eelyo ulabavwuna mumakatazyo aabo.

29 Ulabatamika guwo pati;

Mayuwe aamulwizi alaumuna wi.+

30 Balakondwa ciindi eezyi nozibatama,

Eelyo ulabasololela kucito ncobayanda.

31 Bantu abamulumbe Jehova akaambo kaluyando lwakwe lutamani

Alimwi akaambo kamilimo yakwe iigambya njaacitila bana babantu.+

32 Abamulumbaizye mumbungano yabantu,+

Alimwi abamutembaule munkamu* yabamanene.

33 Ulasandula milonga kuba cimpayuma,

Atusensa twamaanzi kuba nyika njumu iilunda kasuko,+

34 Nyika iizyala zilyo waisandula kuba cikula+

Akaambo kabubi bwabaabo bakkala mulinjiyo.

35 Ulasandula cimpayuma kuba zizyiba zyamaanzi zijisi matete,

Anyika njumu kuba tusensa twamaanzi.+

36 Ulapa kuti aabo bafwide nzala bakkale ooko,+

Ikutegwa bayake munzi mobakonzya kukkala.+

37 Balasyanga mbuto mumyuunda akulima myuunda yamisaansa+

Eeyo iizyala micelo minji.+

38 Ulabaleleka, eelyo balavwula kapati;

Talekeli ŋombe zyabo kuceya.+

39 Pele alimwi balaceya akuusyigwa nsoni

Akaambo kakudyaamininwa, mapenzi alimwi akuusa.

40 Ulabapoomweda masampu bantu balemekwa

Akubapa kwiingaila muzimpayuma imunyina nzila.+

41 Pele bacete ulabakwabilila* kuti batapenzyegwi+

Alimwi ulavwuzya mikwasyi yabo mbuli butanga.

42 Baluleme balacibona eeci akukondwa;+

Pele bataluleme boonse balasinka milomo yabo.+

43 Kufwumbwa muntu musongo uyoozibikkila maano zintu eezyi+

Alimwi uyooyeeyesya milimo ya Jehova yaluyando lutamani.+