Ciyubunuzyo

10 Lino ndakabona mungelo umbi singuzu iwakali kuseluka kuzwa kujulu, kasamide kkumbi, kumutwe wakwe kwakali fulicoongo, ibusyu bwakwe bwakali mbuli zuba,+ imaulu aakwe akali mbuli misemu yamulilo, 2 alimwi mujanza lyakwe wakajisi kabbuku kakuvwunga kavwunguludwe. Mpoonya wakalyata alwizi akuulu kwakwe kwalulyo, pele akuulu kwakwe kwalumwensyi wakalyata anyika, 3 mpoonya wakoongolola ajwi pati mbubonya mbwalimvwisya syuumbwa navwuluma.+ Lino naakoongolola, mizumo iili ciloba yakaambaula.+

4 Lino mizumo iili ciloba noyakaambaula, ndakatiilembe, pele ndakamvwa ijwi kuzwa kujulu+ kalyaamba kuti: “Namatika zintu eezyo zyaambwa amizumo iili ciloba, alimwi utazilembi pe.” 5 Mpoonya mungelo ooyo ngondakabona kaimvwi kalyatide alwizi alimwi aanyika wakatambika janza lyakwe lyalulyo kujulu, 6 eelyo wakakonka muzina lyayooyo uupona lyoonse mane kukabe kutamani,+ ooyo wakalenga julu azintu zili mumo alimwi anyika azintu zili mumo alimwi alwizi azintu zili mumo, ikuti:+ “Kunyina limbi nokutiibe kumuka. 7 Pele mumazuba aayo imungelo waciloba+ nanooli afwaafwi kulizya mweembo wakwe,+ imaseseke aayo Leza+ ngaakaambilizya kaali makani mabotu kubazike bakwe mwini ibasinsimi+ ayoozuzikizyigwa ncobeni.”

8 Mpoonya ndakamvwa ijwi kuzwa kujulu+ ilyakaambaula andime alimwi kuti: “Koya, ubweze kabbuku aakaya kavwunguludwe ikali mujanza lyamungelo ooyo wiimvwi kalyatide alwizi alimwi aanyika.”+ 9 Aboobo ndakaunka kumungelo ooyo akumwaambila kuti andipe kabbuku aako. Wakandaambila kuti: “Kokabweza alimwi ukalye koonse,+ eelyo kalapa kuti mwida lyako mulule, pele mukanwa lyako kanoolweela mbuli buci.” 10 Eelyo ndakakabweza kabbuku aako mujanza lyamungelo ooyo akukalya koonse,+ mpoonya mukanwa lyangu kakali kulweela mbuli buci,+ pele nindakamana kukalya, mwida lyangu mwakalula. 11 Alimwi bakandaambila kuti: “Weelede kusinsima alimwi kujatikizya mikowa, masi, milaka* alimwi abami banji.”