Jeremiya
49 Lino kujatikizya bana Amoni,+ mboobu mbwaamba Jehova:
“Sena Israyeli tajisi bana basankwa?
Sena tajisi sikukona uuli woonse?
Ino nkaambo nzi Milikomi+ ncaakonena Gadi?+
Alimwi nkaambo nzi bantu bakwe ncobakkala muminzi ya Israyeli?”
2 “‘Aboobo, amubone! mazuba alaboola,’ mbwaamba Jehova,
‘Eelyo ndiyoopa kuti kumvwugwe kucenjezya kwankondo* kwakulwana Raba+ wabana Amoni.+
Uyooba buyo mulwi wazitantaala,
Alimwi minzi yakwe misyoonto* iyakuumpwa amulilo.’
‘Israyeli uyookona cisi cabaabo bakakonede cisi cakwe,’+ mbwaamba Jehova.
3 ‘Kolila, O Hesiboni, nkaambo Ai wanyonyoonwa!
Amoongolole nywebo nominzi misyoonto ya Raba.
Amusame zisani zyamasaka.
Amulile akwiingaila akati kazyaanda zyamabwe,*
Nkaambo Milikomi uyootolwa mubuzike,
Antoomwe abapaizi bakwe alimwi abasilutwe bakwe.+
4 Nkaambo nzi yebo ncolidunda kujatikizya makkuti,*
Inzya kujatikizya cibanda cako icikunka maanzi, omwana musimbi uutasyomeki,
Yebo oosyoma lubono lwako
Akwaamba kuti: “Ino nguni utiiboole kundilwana?”’”
5 “‘Bona! Ndilakuletela cintu ciyoosya,’ mbwaamba Mwami Singuzuzyoonse, Jehova wamakamu,
‘Kuzwa kuli baabo boonse bakuzingulukide.
Nywebo muyoomwaigwa kumabazu oonse,
Eelyo takukabi muntu naba omwe uuyoobayobolola aabo batija.’”
6 “‘Pele kumbele ndiyoobayobolola baange akati kabana Amoni,’ mbwaamba Jehova.”
7 Kujatikizya Edomu, mboobu mbwaamba Jehova wamakamu:
“Sena tamucikwe busongo mu Temani?+
Sena lulayo lubotu lwamana akati kabaabo bajisi maano?
Sena busongo bwabo bwabola?
8 Amutije, amupiluke!
Kamuya, mukaakukkalile mukati musisikide, nywebo nomukkala mu Dedani!+
Nkaambo Esau ndiyoomuletela lunyonyooko
Caakusika ciindi cakuti ndimusubule.
9 Ikuti basikutebula misaansa bakusikila,
Sena tabakonzyi kusiya misaansa imwi yakuvwulula?
Ikuti babbi bakunjilila masiku,
Balakonzya kubba buyo eezyo nzyobayanda.+
10 Pele mebo Esau ndiyoomuvwumbula akumusiya buyo aatuba buu.
Ndiyoovwumbula masena aakwe aakuyubila,
Kutegwa atakacikonzyi kuyuba.
11 Amubasiye bamucaala banu,
Eelyo mebo ndilapa kuti bazumanane kupona,
Abalo bamukabafwu banu banoosyoma ndime.”
12 Nkaambo mboobu mbwaamba Jehova: “Bona! Ikuti aabo batabambilidwe kunywa nkapu bayakwiinywa, sena yebo weelede kulekwa buyo kakunyina kusubulwa? Tokalekwi buyo kakunyina kusubulwa pe, nkaambo ziyume zitete uyakwiinywa.”+
13 “Nkaambo mebo ndalikonkezya ndemwini,” mbwaamba Jehova, “kuti Bozira uyooba buyo cintu cigambya,+ cisampaulwa, icinyonyookede alimwi cisinganizyidwe; ayalo minzi yakwe yoonse iyooba matongo mane kukabe kutamani.”+
14 Ndamvwa mulumbe kuzwa kuli Jehova,
Mutumwa watumwa akati kamasi, kaamba kuti:
“Amulibunge-bunge, muboole kuzoomulwana;
Amulibambile nkondo.”+
15 “Nkaambo bona! Ndakupa kuti ube muniini kapati akati kamasi,
Uusampaulwa akati kabantu.+
16 Yebo walicenga akaambo kakuti walikuyoosya bambi,
Alimwi akulisumpula kwamoyo wako,
Yebo ookkala mumampangala aamwala,
Ookkala atala aakalundu kalamfwu kwiinda.
Nokuba kuti uyake citeente cako mujulu kapati mbuli sikwaze,
Ndiyookuselusyila ansi kuzwa waawo mpobede,” mbwaamba Jehova.
17 “Edomu uyooba cintu cigambya.+ Muntu woonse wiinda kulinguwe uyoolanga kagambidwe kapati alimwi uyoosiba mulosi akaambo kamapenzi oonse aamusikila. 18 Uyooba mbubonya mbuli kuciindi cakunyonyoonwa kwa Sodoma a Gomora antoomwe aminzi yanjiyo yakeengelede,”+ mbwaamba Jehova, “kunyina muntu uuyookkala ooko, alimwi kunyina muntu uuyooyaka munzi wakwe ooko.+
19 “Amubone! Muntu uyooboola kuzoonyonyoona macelelo aakwabilidwe mbubonya mbuli syuumbwa+ uuzwa muzyoonde zisisinkene izili kumbali aa Jordano, pele mukulaba buyo kwaliso ndiyoomupa kutija kuzwa kulinguwe. Eelyo ndiyoomubikkila muntu uusalidwe kuti amweendelezye. Nkaambo ino nguni uuli mbuli ndime, nguni uunga wandikazya? Ino mweembezi nzi uunga waima kumbele lyangu?+ 20 Aboobo nywebo nobantu, amumvwe makanze* ngajisi Jehova aakulwana Edomu, amizeezo njajisi yakulwana bantu bakkala mu Temani:+
Ncobeni bana babutanga bwambelele bayookwelwa.
Uyoopa kuti busena bwabo bwakukkala bunyonyoonwe akaambo kambabo.+
21 Nyika yazungaana akaambo kamuzuzumo wakuwa kwabo.
Kuli kulila kupati!
Majwi alalimvwisya kusikila ku Lwizi Lusalala.+
22 Amubone! Mbubonya mbuli sikwaze, uyootanta mujulu akufwuumuka kuyaansi,+
Alimwi uyoovwungulula mababa aakwe akuvwumba Bozira.+
Mubuzuba oobo, myoyo yabasikalumamba ba Edomu
Iyooba mbuli moyo wamukaintu uutumbuka.”
23 Kujatikizya Damasiko:+
“Minzi ya Hamati+ a Aripadi yafwa nsoni,
Nkaambo yamvwa makani mabi.
Yanyenguluka akaambo kakuyoowa.
Bantu balilibilikide mbuli lwizi lukopene ilutakonzyi kubatama.
24 Damasiko wagonkelwa.
Watija, pele buyoofwu bwamujata.
Mapenzi amacise alimujisi,
Mbubonya mbuli mukaintu uutumbuka.
25 Ino caba buti kuti munzi uutembaulwa tiiwasiigwa,
Inzya munzi uuzwide kusekelela?
26 Nkaambo balombwana banguwo bayoowa mumabuwa aanguwo aabuleya,
Alimwi basikalumamba boonse bayoonyonyoonwa mubuzuba oobo,” mbwaamba Jehova wamakamu.
27 “Bwaanda bwa Damasiko ndiyoobudoneka mulilo,
Eelyo ngazi zikwabilidwe zya Beni-hadadi+ uyoozyuumpa cakumaninina.”
28 Kujatikizya Kedara+ amami aa Hazori, izyooko eezyo Mwami Nebukadinezara* wa Babuloni nzyaakazunda akunyonyoona, mboobu mbwaamba Jehova:
“Amunyamuke, muunke ku Kedara,
Mukanyonyoone bantu ba Kujwe.
29 Matente aabo amatanga aabo ayootolwa,
Milembo yabo yakumatente antoomwe alubono lwabo loonse.
Nkamela zyabo ziyootolwa,
Eelyo bayooboongolweda kuti, ‘Kuli zintu ziyoosya koonse-koonse!’”
30 “Amutije, kamuya kulamfwu!
Kamuya mukaakukkalile mukati musisikide, nywebo nomukkala ku Hazori,” mbwaamba Jehova.
“Nkaambo Mwami Nebukadinezara* wa Babuloni ulimukanzide,
Alimwi ujisi muzeezo wakumulwana.”
31 “Amunyamuke, kamuya mukalwane cisi cikkede muluumuno,
Alimwi ciliibide!” mbwaamba Jehova.
“Tacijisi zijazyo noziba mpingizyo; bakkede buyo balikke.
32 Nkamela zyabo ziyoosaalwa,
Alimwi zivwubwa zyabo zinji ziyoobwezegwa.
Ndiyoobamwaya kumyuwo yoonse,*
Inzya aabo ibagela malezu aabo mumpobe,+
Alimwi ndiyoobaletela mapenzi kumabazu oonse,” mbwaamba Jehova.
33 “Hazori uyooba buyo bwina bwabamwaaba,
Uyooba matongo mane kukabe kutamani.
Kunyina muntu uuyookkala mumo,
Alimwi kunyina muntu uuyooyaka munzi mulinguwo.”
34 Ndeeli jwi lya Jehova ilyakamusikila musinsimi Jeremiya kujatikizya Elamu+ kumatalikilo aabulelo bwa Mwami Zedekiya+ wa Juda: 35 “Mboobu mbwaamba Jehova wamakamu, ‘Amubone ndilatyolaula buta bwa Elamu,+ ikasensa* kanguzu zyabo. 36 Ndiyooletela Elamu myuwo yone kuzwa kumagolelo one aamajulu, eelyo ndiyoobamwayila kumyuwo yoonse eeyi. Takukabi cisi nociba comwe nkobatakaunki aabo bamwaikide bamu Elamu.’”
37 “Ndiyoobapwayaula bana Elamu kumbele lyabasinkondonyina akumbele lyabaabo bayanda kubajaya;* ndiyoobaletela mapenzi, inzya bukali bwangu buyaka mbuli mulilo,” mbwaamba Jehova. “Alimwi ndiyoobatumina panga kuti kaliyaabubatobela kusikila mane ndikabamane kubanyonyoona.”
38 “Ndiyoobikka cuuno cangu cabwami mu Elamu,+ eelyo ooko ndiyoojaya mwami alimwi abasilutwe,” mbwaamba Jehova.
39 “Pele kumamanino aamazuba, ndiyooyobolola baange bamu Elamu,” mbwaamba Jehova.