Johane
7 Nozyakainda zintu eezyi, Jesu wakazumanana kweendeenda mu Galilaya, mbwaanga tanaakali kuyanda kucita boobo mu Judaya nkaambo ba Juda bakali kuyanda kumujaya.+ 2 Pele Pobwe lya Zivwuka+ lyaba Juda, lyakali afwaafwi. 3 Aboobo ibanabokwabo+ bakamwaambila kuti: “Kozwa kuno uunke ku Judaya, kutegwa abalo basikwiiya bako bakabone milimo njocita. 4 Nkaambo kunyina muntu uucita zintu cakusisikizya kuti kayanda kuti azyibwe caantangalala. Mbwaanga ucita zintu eezyi, koliyubununa kunyika.” 5 Mubwini ibanabokwabo tiibakali kumusyoma.+ 6 Aboobo Jesu wakabaambila kuti: “Ciindi cangu tacinasika,+ pele ciindi canu nkocili lyoonse. 7 Inyika inyina kaambo kakumusulaikila, pele mebo ilindisulide nkaambo ndipa bumboni kujatikizya njiyo kuti milimo yanjiyo mibi.+ 8 Nywebo kamuya kupobwe; mebo tanduunki lino kupobwe eeli, nkaambo ciindi cangu tacinasika cakumaninina.”+ 9 Aboobo naakamana kubaambila zintu eezyi, wakasyaala mu Galilaya.
10 Pele ibanabokwabo kabaunkide kale kupobwe, awalo wakaunka, ikutali caantangalala pele cakuyubaila. 11 Aboobo iba Juda bakatalika kumuyandaula kupobwe kabati: “Ino uli kuli muntu uulya?” 12 Alimwi bantu banji munkamu bakali kuvwiya-vwiya kujatikizya nguwe. Bamwi bakali kwaamba kuti: “Muntu uuli kabotu.” Pele bambi bakali kwaamba kuti: “Tali kabotu pe. Weena nkamu yabantu.”+ 13 Pele kunyina wakali kwaambaula caantangalala kujatikizya nguwe nkaambo bakali kuyoowa ba Juda.+
14 Lino pobwe nolyakasika akati, Jesu wakanjila mutempele akutalika kuyiisya. 15 Aboobo ba Juda bakagambwa, balaamba: “Ino muntu ooyu wakaba buti aluzyibo luli boobu lwa Magwalo*+ kakuli tanaakaiya kuzikolo?”*+ 16 Mpoonya Jesu wakabaingula akwaamba kuti: “Nzyondiyiisya tazili zyangu pe, pele nzizya yooyo wakandituma.+ 17 Ikuti muntu umwi kayanda kucita kuyanda kwa Leza, ulazyiba kujatikizya njiisyo eeyo ikuti naa izwa kuli Leza+ naa ndaamba buyo nzyondilipangila ndemwini. 18 Kufwumbwa ooyo waamba zyakwe mwini uliyandauda bulemu bwakwe mwini; pele kufwumbwa ooyo uuyandaula bulemu bwayooyo wakamutuma,+ ooyu ngomwini-mwini, alimwi kunyina kutalulama mulinguwe. 19 Sena Musa tanaakamupa Mulawo?+ Pele kunyina naba omwe wandinywe uutobela Mulawo ooyo. Ncinzi ncomuyanda kundijaila?”+ 20 Inkamu yabantu yakaingula kuti: “Ulaadaimona yebo. Nguni uuyanda kukujaya?” 21 Mukwiingula Jesu wakati kulimbabo: “Ndakacita buyo cintu comwe, eelyo nyoonse mucigambidwe. 22 Nkakaambo kaako Musa wamupa mulawo wabupalule+—ikutali kuti wakazwa kuli Musa, pele wakazwa kuli bamauso+—alimwi mulapalula muntu musabata. 23 Ikuti naa muntu ulapalulwa musabata kutegwa Mulawo wa Musa utatyolwi, sena mebo mulandikalalila akaambo kakuti ndakaponya muntu musabata?+ 24 Amuleke kubeteka kweelana ambwalibonya muntu, pele amubeteke alubeta lwabululami.”+
25 Mpoonya bamwi bakkala mu Jerusalemu bakatalika kwaamba kuti: “Sena ooyu tali ngomuntu uulya ngobayanda kujaya?+ 26 Pele amubone! Ulaambaula antangalala, alimwi kunyina ancobaamba kulinguwe. Sena baleli bazyiba ncobeni kuti ooyu ngo Kristo? 27 Nokuba boobo, swebo tulizyi nkwazwa muntu ooyu;+ pele aakuboola Kristo, kunyina muntu uuyoozyiba nkwazwa.” 28 Aboobo naakali kuyiisya mutempele Jesu wakoompolola kuti: “Mulindizyi alimwi mulikuzyi nkondizwa. Tiindakaliboolela ndemwini pe,+ pele ooyo wakandituma nkwali ncobeni, alimwi nywebo tamumuzyi pe.+ 29 Mebo ndilimuzyi,+ nkaambo ndili mwiiminizi uuzwa kulinguwe, alimwi walo nguwakandituma.” 30 Aboobo bakatalika kuyandaula nzila mbobanga bamujata,+ pele kunyina wakabikka janza aalinguwe nkaambo ciindi cakwe tiicakaningasika.+ 31 Nokuba boobo, bantu banji munkamu bakamusyoma,+ alimwi bakali kwaamba kuti: “Aakuboola Kristo, sena uyoocita maleele manji kwiinda ngaacita muntu ooyu?”
32 Ba Farisi bakazimvwa zintu eezyi nzyobakali kuvwiya-vwiya bantu munkamu kujatikizya nguwe, alimwi basilutwe babapaizi aba Farisi bakatuma bakapaso kuti bakamujate. 33 Aboobo Jesu wakati: “Ndinoocili andinywe kwaciindi cisyoonto kanditanaunka kuli yooyo wakandituma.+ 34 Muyoondiyandaula, pele tamukandijani pe, alimwi ooko nkonduunka tamukonzyi kusika.”+ 35 Aboobo mulicabo iba Juda bakabuzyanya kuti: “Ino muntu ooyu ukanza kuunka kuli ooko nkotutakamujani? Sena ukanza kuunka kuba Juda bamwaikide ibakkede akati kaba Giriki akuyooyiisya ba Giriki aabo? 36 Ino upandulula nzi naamba kuti, ‘Muyoondiyandaula pele tamukandijani pe, alimwi ooko nkonduunka tamukonzyi kusika’?”
37 Lino mubuzuba bwamamanino, ibuzuba bupati bwapobwe,+ Jesu wakaimikila akoompolola kuti: “Ikuti naa kuli muntu uufwide nyota, kaboola kulindime anywe.+ 38 Kufwumbwa ooyo uundisyoma mbubonya mbwaamba magwalo: ‘Mukati mulinguwe muyoozwa tulonga tukunka maanzi aapa buumi.’”+ 39 Pele wakaamba boobu kujatikizya muuya ngobakali kuyanda kutambula aabo bakamusyoma; mbwaanga kusikila aciindi eeci kunyina wakatambwide muuya,+ nkaambo Jesu tanaakaningalemekwa.+ 40 Ibamwi munkamu ibakamvwa majwi aaya bakatalika kwaamba kuti: “Ooyu masimpe ngo Musinsimi ooyo wakasinsimwa.”+ 41 Bamwi bakali kwaamba kuti: “Ooyu ngo Kristo.”+ Pele bamwi bakali kwaamba kuti: “Sena Kristo inga wazwa mu Galilaya?+ 42 Sena lugwalo talwaambi kuti Kristo uyoozwa mulunyungu lwa Davida,+ alimwi aku Betelehemu+ imunzi nkwaakali kukkala Davida?”+ 43 Aboobo nkamu yabantu yakaandaana akaambo kanguwe. 44 Pele bamwi bakali kuyanda kumujata, nokuba boobo kunyina muntu wakamujata.
45 Mpoonya bakapaso bakapiluka kuli basilutwe babapaizi aba Farisi, eelyo aaba bakababuzya kuti: “Nkaambo nzi ncomwatamujata akumuleta?” 46 Bakapaso bakaingula kuti: “Takunabede muntu waambaula bobuya.”+ 47 Mpoonya ba Farisi bakaingula kuti: “Sena anywebo mweenwa? 48 Sena kuli muleli naa mu Farisi naba omwe wamusyoma?+ 49 Pele nkamu yabantu eeyi iitazyi Mulawo mbantu basinganizyidwe.” 50 Nikodemo, iwakaboolede kulinguwe musyule, alimwi iwakali umwi wabo wakati kulimbabo: 51 “Sena Mulawo wesu ubeteka muntu kakunyina kusaanguna kumuswiilila akuzyiba ncaacita?”+ 52 Bakamwiingula kuti: “Sena ayebo uzwa mu Galilaya? Kovwuntauzya eelyo ulajana kuti kunyina musinsimi weelede kuzwa mu Galilaya.”*