2 Samuele
2 Kumane Davida wakabuzya Jehova+ kuti: “Sena nduunke kuli umwi waminzi ya Juda?” Eelyo Jehova wakati kulinguwe: “Koya.” Mpoonya Davida alimwi wakabuzya kuti: “Ino nduunke kumunzi uuli?” Kumane wakati: “Ku Hebroni.”+ 2 Aboobo Davida wakaunka ooko abamakaintu bakwe bobilo, Ahinoamu+ waku Jezreeli alimwi a Abigayeli+ muna Karimeli mukamufwu wa Nabala. 3 Davida wakabatolelezya abaalumi mbaakali limwi,+ umwi aumwi amukwasyi wakwe, eelyo bakakkala muminzi yamu Hebroni. 4 Mpoonya bantu bamucisi ca Juda bakaboola akumunanika Davida kuti abe mwami wamusyobo wa Juda.+
Alimwi bakaambila Davida kuti: “Bantu baku Jabezi-gileadi mbabakamuzikka Saulo.” 5 Aboobo Davida wakatuma batumwa kubana Jabezi-gileadi kuyoobaambila kuti: “Jehova amulongezye, nkaambo mwakatondezya luyando lutamani kuli simalelaanu Saulo, mukuti mwakamuzikka.+ 6 Jehova aatondezye luyando lutamani akusyomeka kulindinywe. Andime ndilamutondezya luzyalo akaambo kacintu eeci ncimwacita.+ 7 Lino amuyume akuba basicamba nkaambo simalelaanu Saulo wafwa, alimwi musyobo wa Juda wandisala kuti ndibe mwami wabo.”
8 Pele Abineri+ mwana wa Neri iwakali silutwe wampi yabasikalumamba ya Saulo wakabwezede Isibosete+ mwana wa Saulo akumuzabusya akumutola ku Mahanaimu,+ 9 akumubikka kuba mwami kuti ayendelezye Gileadi,+ bana Asuri, Jezreeli,+ Efraimu,+ Benjamini a Israyeli yoonse. 10 Isibosete mwana wa Saulo wakali amyaka iili 40 naakaba mwami wa Israyeli, alimwi wakeendelezya myaka yobilo. Nokuba boobo, bamusyobo wa Juda mbabakali kutobela Davida.+ 11 Davida wakeendelezya musyobo wa Juda mu Hebroni myaka iili ciloba amyezi iili cisambomwe.+
12 Mukuya kwaciindi Abineri mwana wa Neri ababelesi ba Isibosete mwana wa Saulo, bakazwa ku Mahanaimu+ akuunka ku Gibeoni.+ 13 Joabu+ mwana wa Zeruya+ ababelesi ba Davida abalo bakaunka eelyo bakaswaangana kuzyiba lyaku Gibeoni; nkamu imwi yakakkala kulubazu oolu lwazyiba, mpoonya imwi kulubazu lumbi. 14 Kumane Abineri wakati kuli Joabu: “Atubaleke balombe banyamuke akulwana* katulangilila.” Mpoonya Joabu wakati: “Abanyamuke.” 15 Aboobo bakanyamuka akuzabuka kabali nkamu, bali 12 bakali kuzwa kuli Benjamini a Isibosete mwana wa Saulo mpoonya bali 12 bakali kuzwa kubabelesi ba Davida. 16 Mpoonya bakatalika kujatana umwi aumwi kumutwe wamweenzinyina akuyasana mapanga mumabambo cakuti bakafwida antoomwe boonse. Aboobo busena oobo ibuli mu Gibeoni bwakaitwa kuti Helikati-hazurimu.
17 Lino nkondo eeyo yakakomena kapati buzuba oobo, eelyo Abineri abana Israyeli bakazundwa kubabelesi ba Davida. 18 Bana ba Zeruya+ botatwe abalo bakaliko–nkokuti Joabu,+ Abisai+ a Asaheli;+ lino Asaheli wakali kulunduka kapati mbuli insya. 19 Eelyo Asaheli wakatalika kutandaanya Abineri alimwi tanaakali kulanga kululyo naa kulumwensyi ciindi naakali kutandaanya Abineri. 20 Lino Abineri naakacebuka musyule wakabuzya kuti: “Sena nduwe Asaheli?” kumane walo wakaingula kuti: “Inzya ndime.” 21 Kumane Abineri wakati kulinguwe: “Koleya kululyo naa kulumwensyi ujate umwi wabalombwana akumunyanga kufwumbwa zintu nzyajisi.” Pele Asaheli tanaakali kuyanda kuleka kumutandaanya. 22 Aboobo Abineri wakaambila Asaheli alimwi kuti: “Koleka kunditandaanya. Sena ncibotu kuti ndikujaye? Eelyo ino tuyoolangana buti a Joabu mwanookwanu?” 23 Pele tanaakaleka kumutandaanya pe, aboobo Abineri wakamuyasa sumo+ mane lyapola kusyule; eelyo wakawa akufwa mpoonya aawo. Lino boonse ibakali kusika abusena aakali mutumba wa Asaheli bakali kwiima.
24 Kumane Joabu a Abisai bakazumanana kutandaanya Abineri. Nolyakali kuyaabubbila zuba, bakasika kumulundu wa Ama uulangene a Giya mumugwagwa uutozya kunkanda ya Gibeoni. 25 Mpoonya bana ba Benjamini bakabungana antoomwe kulubazu lwa Abineri, eelyo bakaba nkamu yomwe alimwi bakaima atala aamulundu umwi. 26 Mpoonya Abineri wakaita Joabu akwaamba kuti: “Ino tulalwana amapanga kusikila lili? Sena tozyi kuti kumamanino cilaleta buyo manyongwe mapati? Aboobo ino ndilili noyakwaambila bantu kuti bacileke kutobela banabokwabo?” 27 Amvwe boobo Joabu wakati: “Masimpe Leza mwini-mwini mbwali muumi, nootaamba oobo, bantu aaba nobataleka kutobela banabokwabo kusikila mafwumofwumo.” 28 Lino Joabu wakalizya mweembo, eelyo baalumi bakwe bakaleka kutobela bana Israyeli alimwi akulwana kwakamana.
29 Mpoonya Abineri abaalumi bakwe bakeenda masiku oonse mu Araba+ akuzabuka kubbazu limwi lya Jordano alimwi bakainda mukkuti* mane basika ku Mahanaimu.+ 30 Lino Joabu naakaleka kutobela Abineri, wakapiluka akubunganya bantu boonse antoomwe. Kwakajanika kuti babelesi ba Davida bali 19 kubikkilizya a Asaheli tabako. 31 Pele babelesi ba Davida bakazunda bana Benjamini abaalumi ba Abineri alimwi ibaalumi babo ibali 360 bakafwa. 32 Mpoonya bakabweza Asaheli+ akumuzikka mucuumbwe cabausyi icili ku Betelehemu.+ Kumane Joabu abaalumi bakwe bakeenda masiku oonse, eelyo bakasika ku Hebroni+ nibwakaca.