2 Samuele

20 Lino kwakali mwaalumi simanyongwe wazina lya Sheba,+ imwana wa Bikiri, muna Benjamini. Mwaalumi ooyo wakalizya mweembo+ akwaamba kuti: “Tatujisi caabilo muli Davida, alimwi tatujisi lukono mumwana wa Jese.+ Nobana Israyeli,+ umwi aumwi apiluke kuli baleza bakwe!”* 2 Eelyo baalumi bana Israyeli boonse bakaleka kutobela Davida akutalika kutobela Sheba mwana wa Bikiri;+ pele ba Juda bakakakatila kumwami wabo kuzwa ku Jordano kusikila ku Jerusalemu.+

3 Ciindi Davida naakaboola kuŋanda* yakwe ku Jerusalemu,+ mwami wakabweza bamwanakasuwa bakwe bali kkumi mbaakasiide kuti kabalanganya ŋanda+ alimwi wakabajalila muŋanda imwi. Wakali kubapa cakulya, pele tanaakoonana ambabo pe.+ Bakalijalilidwe kusikila buzuba mbobakafwa, bakaba mbuli bamukabafwu nokuba kuti mulumi wabo wakacili kupona.

4 Lino mwami wakaambila Amasa+ kuti: “Kondiitila baalumi ba Juda kuti baboole mumazuba otatwe, waakumana ayebo ukaboole okuno.” 5 Aboobo Amasa wakaunka kuyakwiita ba Juda, pele wakamuka, tanaakaboola aciindi mwami ncaakamwaambilide. 6 Mpoonya Davida wakati kuli Abisai:+ “Sheba+ mwana wa Bikiri ulatuletela mapenzi manji kwiinda Abisalomu.+ Aboobo kobweza babelesi basimalelaako akumutobela kutegwa atakatijili mumunzi uuyakilidwe bwaanda akutuloboka.” 7 Aboobo baalumi ba Joabu,+ bana Kereti, bana Peleti+ abaalumi boonse basinguzu bakamutobela; alimwi bakazwa mu Jerusalemu kutandaanya Sheba mwana wa Bikiri. 8 Nibakali afwaafwi abbwe lipati mu Gibeoni,+ Amasa+ wakaboola kuzooswaangana ambabo. Lino Joabu wakasamide zisani zyakwe zyankondo, kabikkide apanga mucibuno cakwe ilyakali mucikanda calyo. Mpoonya naakeenda kuya kumbele, panga lyakawida ansi.

9 Lino Joabu wakati kuli Amasa: “Sena uli kabotu mukwesu?” Kumane Joabu wakajata cilezu ca Amasa ajanza lyakwe lyalulyo mbuli kuti uyanda kumumyonta. 10 Amasa tanaakalibwene panga ilyakali mujanza lya Joabu, aboobo Joabu wakamuyasya ndilyo mwida,+ eelyo bula bwakwe bwakazwa akuwida ansi. Tanaakainduluka kumuyasa pe; ciindi comwe buyo cakalizulide kumujaya. Mpoonya Joabu a Abisai mwanookwabo bakatandaanya Sheba mwana wa Bikiri.

11 Umwi wabalombe ba Joabu wakaliimvwi afwaafwi anguwe kaamba kuti: “Kufwumbwa muntu uumuyanda Joabu alimwi kufwumbwa uuli kulubazu lwa Davida, atobele Joabu!” 12 Lino Amasa wakali kwaalabana mubulowa bwakwe akati kanzila. Mulombe ooyo naakabona kuti bantu boonse bakali kwiima aawo, wakamugwisya munzila akumutola musyokwe. Kumane wakamuvwumba cisani nkaambo wakabona kuti bantu boonse ibakali kuboola kulinguwe bakali kwiima aawo. 13 Naakamugwisya munzila, baalumi boonse bakatobela Joabu kuti batandaanye Sheba+ mwana wa Bikiri.

14 Eelyo Sheba wakainda mumisyobo yoonse ya Israyeli kuya ku Abelo waku Beti-maaka.+ Bana Bikiri bakabungana antoomwe mpoonya abalo bakamutobela.

15 Joabu abaalumi mbaakali limwi bakaboola kuzoomusinkilila naakali mumunzi wa Abelo waku Beti-maaka akulundika mavwu kucitantaala kuti eelane abwaanda bwakazingulukide munzi mbwaanga munzi wakali akati kacitantaala. Mpoonya bantu boonse ibakali a Joabu bakatalika kusya ansi aabwaanda kutegwa buwe. 16 Eelyo mukaintu musongo wakoongolola kuzwa abwaanda bwamumunzi kuti: “Amuswiilile nobaalumi, amuswiilile! Amumwaambile Joabu kuti aboole afwaafwi kutegwa ndaambaule anguwe.” 17 Aboobo wakaunka afwaafwi kulinguwe, eelyo mukaintu ooyo wakati: “Sena ndonduwe Joabu?” Mpoonya wakati: “Inzya ndendime.” Eelyo wakati: “Koswiilila majwi aangu ndemubelesi wako.” Kumane Joabu wakati: “Ndilaswiilila.” 18 Mukaintu ooyo wakazumanana kwaamba kuti: “Kaindi bakali kwaamba kuti, ‘Abakabuzye kumunzi wa Abelo,’ alimwi oobu mbwaakali kumana makani. 19 Ndiiminina bantu basiluumuno alimwi ibasyomeka mu Israyeli. Yebo uyanda kunyonyoona munzi uuli ngobanyina mu Israyeli. Ino nkaambo nzi ncoyanda kunyonyoona* lukono lwa Jehova?”+ 20 Mpoonya Joabu wakati: “Tandikonzyi naaceya pe ikuyeeya kuti inga ndanyonyoona munzi ooyu. 21 Makani aaya taali boobo pe. Pele mwaalumi wazina lya Sheba+ mwana wa Bikiri, uuzwa kumalundu aa Efraimu+ wazangila* Mwami Davida. Ikuti mumulete mwaalumi ooyu alikke, ndilauleka munzi.” Mpoonya mukaintu ooyo wakati kuli Joabu: “Mutwe wakwe ulawaalwa kulinduwe kuzwa atala aabwaanda!”

22 Mpoonya aawo mukaintu ooyo musongo wakaunka akwaambila bantu kumane bakakosola mutwe wa Sheba mwana wa Bikiri akuuwaala kuli Joabu. Kumane Joabu wakalizya mweembo, eelyo bantu bakamwaika kuzwa kumunzi ooyo akuunka umwi aumwi kuŋanda yakwe;+ awalo Joabu wakapiluka ku Jerusalemu kumwami.

23 Lino Joabu ngowakali kusololela mpi yabasikalumamba yoonse yabana Israyeli;+ alimwi Benaya+ mwana wa Jehoyada+ wakali kusololela bana Kereti abana Peleti.+ 24 Adoramu+ wakali kulanganya baabo bakalembedwe cibbalo amwami; eelyo Jehosafati+ mwana wa Ahiludi wakali sikulemba makani. 25 Seva wakali mulembi; eelyo Zadoki+ a Abiyatara+ bakali bapaizi. 26 Awalo Ira muna Jairi wakaba silutwe mupati* wa Davida.