2 Samuele
23 Aaya ngamajwi aamamanino aa Davida:+
3 Leza wa Israyeli wakaamba;
Ndomba ya Israyeli+ yakandaambila kuti:
‘Ikuti ooyo weendelezya bantu kali mululami,+
Keendelezya cakuyoowa Leza,+
4 Bweendelezi bwakwe buli mbuli mumuni wamafwumofwumo ciindi zuba nolibala,+
Mafwumofwumo nokutakwe makumbi.
Buli mbuli mumuni nikwamana kuwa mvwula,
Iipa kuti bwizu bumene kuzwa munyika.’+
5 Sena oobo tabuli mboibede ŋanda yangu kuli Leza?
Nkaambo wapanga cizuminano citamani andime,+
Cilibambidwe kabotu mumbazu zyoonse alimwi cilikwabilidwe.
Nkaambo caamba lufwutuko alukkomano lwangu loonse,
Sena aaka takali nkakaambo ncaapa kuti cizwidilile?+
6 Pele bantu boonse babuyo balasoogwa+ mbuli zitewo zyamamvwa,
Nkaambo tabakonzyi kubwezyegwa amaanza pe.
7 Kuti naa muntu wazijata zitewo eezyi,
Weelede kuti kajisi cibelesyo cabutale asumo,
Alimwi zyeelede kuumpwa cakumaninina mubusena mozibede.”
8 Ngaaya mazina aabasikalumamba basinguzu ba Davida:+ Josebu-basebete muna Tekemoni, silutwe wabapati botatwe.+ Wakabweza sumo lyakwe akujaya bantu bainda ku 800 aciindi comwe. 9 Iwakali kumutobela, nkokuti Eleazara+ mwana wa Dodo+ imwana wa Ahohi wakali umwi wabasikalumamba basinguzu botatwe ibakali a Davida ciindi nibakasampaula ba Filisiti. Bakabungana ooko kuti balwane nkondo alimwi ciindi bana Israyeli nobakatija, 10 walo wakasyaala akuzumanana kujaya ba Filisiti kusikila janza lyakwe lyakatala alimwi janza lyakwe lyakaangatila kupanga.+ Aboobo Jehova wakaleta luzundo* lupati buzuba oobo;+ alimwi bantu bakamutobela musyule kuyoosaala zintu zyabaabo bakajaigwa.
11 Iwakali kumutobela wakali Sama mwana wa Age muna Harari. Lino ba Filisiti bakalibunga-bunga ku Lehi, ooko ikwakali muunda wakazwide nyabo; eelyo bantu bakatija akaambo kaba Filisiti. 12 Pele walo wakaima akati kamuunda akuukwabilila alimwi wakazumanana kubajaya ba Filisiti, aboobo Jehova wakabafwutula aluzundo* lupati.+
13 Botatwe akati kabasilutwe bali 30 bakaunka kuli Davida ciindi cakutebula kumpangala ya Adulamu,+ alimwi ba Filisiti bakayakide nkambi yamatente* mu Kkuti* lya Refaimu.+ 14 Aciindi eeco Davida wakali mumpangala,+ alimwi nkambi yabasikalumamba yaba Filisiti yakali mu Betelehemu. 15 Kumane Davida wakaamba ncaakali kulombozya naakati: “Eelo kaka inga cabota kuti ndanywa maanzi aamumukalo waku Betelehemu uuli kumulyango wamunzi!” 16 Mpoonya aawo basikalumamba botatwe basinguzu bakanjila canguzu munkambi yaba Filisiti akuteka maanzi mumukalo waku Betelehemu iwakali kumulyango wamunzi akwaatola kuli Davida; pele wakakaka kwaanywa, eelyo wakaatila ansi kuli Jehova.+ 17 Wakati: “Cilatondwa kulindime, O Jehova, kuti ndicite boobu! Sena ndeelede kunywa bulowa+ bwabaalumi aaba ibabikka buumi bwabo muntenda?” Aboobo wakakaka kwaanywa. Eezyi nzyezintu nzyobakacita basikalumamba bakwe basinguzu botatwe.
18 Abisai+ mwanookwabo a Joabu imwana wa Zeruya+ wakali silutwe wabaalumi bambi botatwe; wakabelesya sumo lyakwe kujaya bantu bainda ku 300, alimwi wakali ampuwo mbuli babaya botatwe.+ 19 Nokuba kuti wakali kulemekwa kapati kwiinda abaabo bambi botatwe alimwi wakali silutwe wabo, tanaakeelana abaabo botatwe bakusaanguna.
20 Benaya+ mwana wa Jehoyada wakali mwaalumi sicamba* iwakacita milimo minji mu Kabizeeli.+ Wakajaya bana basankwa bobilo ba Arieli waku Moabu, alimwi wakaselemukila mucilindi akujaya syuumbwa+ mubuzuba bwacaanda. 21 Alimwi wakajaya mwaalumi muna Egepita mubbabbani. Nokuba kuti muna Egepita ooyo wakajisi sumo mujanza lyakwe, Benaya wakamuunkila ankoli akumunyanga sumo muna Egepita akumujaya asumo lyakwe. 22 Eezyi nzyezintu Benaya mwana wa Jehoyada nzyaakacita, alimwi wakaba ampuwo mbubonya mbuli yabasikalumamba basinguzu botatwe. 23 Nokuba kuti wakali kulemekwa kapati kwiinda baabo bali makumi otatwe, tanaakeelana abotatwe bakusaanguna. Nokuba boobo Davida wakamusala kuba silutwe wabalindizi bakwe.
24 Asaheli+ mwanookwabo a Joabu wakali akati kabali makumi otatwe: Elihanani mwana wa Dodo waku Betelehemu,+ 25 Sama muna Harodi, Elika muna Harodi, 26 Helezi+ muna Paliti, Ira+ mwana wa Ikesi muna Tekowa, 27 Abiezeri+ muna Anatoti,+ Mebunai muna Husati, 28 Zalimoni muna Ahohi, Maharai+ muna Netofati, 29 Helebi mwana wa Baana muna Netofati, Itai mwana wa Ribai waku Gibea umwi wabana Benjamini, 30 Benaya+ muna Piratoni, Hidai wakutulonga* twaku Gaasi,+ 31 Abialiboni muna Aribati, Azimaveti muna Bartuimi, 32 Eliaba muna Syaaliboni, bana ba Jaseni, Jonatani, 33 Sama muna Harari, Ahiamu mwana wa Sarari muna Harari, 34 Elifeleti mwana wa Ahasibai imwana wamuna Maakati, Eliamu mwana wa Ahitofeli+ muna Gilo, 35 Heziro muna Karimeli, Paarari muna Arabiya, 36 Igali mwana wa Natani waku Zoba, Bani muna Gadi, 37 Zeleki muna Amoni, Naharai muna Beeroti, sikunyamuna zilwanyo wa Joabu mwana wa Zeruya, 38 Ira muna Itiri, Garebi muna Itiri,+ 39 a Uriya+ muna Heti—antoomwe bakali 37.