2 Bami
7 Lino Elisha wakati, “Amuswiilile jwi lya Jehova. Mboobu Jehova mbwaamba: ‘Juunza aciindi eecino kumulyango* wa Samariya, cisuwo* cafulaulu ciyakuulwa syekeli* lyomwe alimwi azisuwo zyobilo zyabbaale ziyakuulwa syekeli lyomwe.’”+ 2 Mpoonya umwi walupati-pati ooyo mwami ngwaakali kusyoma wakavwiila muntu wa Leza mwini-mwini kuti: “Nokuba kuti Jehova wajalula zipulo zyakujulu, sena eeci* inga cacitika ncobeni?”+ Eelyo walo wakamwaambila kuti: “Uyoolibonena ameso aako,+ pele tokooyoolya pe.”+
3 Kwakali baalumi bone basicinsenda ibakali kumulyango wamunzi,+ eelyo bakaambilana kuti: “Ino nkaambo nzi ncotukkede aano mane limwi tufwe? 4 Ikuti twaamba kuti, ‘Atunjile mumunzi,’ kakuli muli nzala,+ nkokuti aswebo tulafwida mumo. Alimwi ikuti katukkede aano, ncimwi buyo tulafwa. Aboobo lino atweende kunkambi yabana Siriya. Ikuti batakatujayi, tuyoofwutuka, pele kuti bakatujaye, atukafwe buyo.” 5 Eelyo aciindi cakulubundubundu bakanyamuka akunjila munkambi yabana Siriya. Lino nobakasika kumatalikilo aankambi yabana Siriya, kunyina ngobakajana.
6 Lino Jehova wakapa kuti basikalumamba bana Siriya bamvwe coongo cankalaki zyankondo, kulila kwamabbiza alimwi akuyoba kwampi mpati yabasikalumamba.+ Aboobo bakati kuli umwi amweenzinyina: “Amubone! Mwami wa Israyeli watamba bami baba Heti abami babana Egepita kuti bazootulwane!” 7 Mpoonya aawo bakanyamuka akutalika kutija mumudima akusiya matente aabo, mabbiza aabo, mbongolo zyabo alimwi ankambi bakaisiya mbubonya mboyakabede, eelyo bakatija kutegwa bafwutule maumi aabo.
8 Lino basicinsenda aaba nobakasika kumatalikilo aankambi, bakanjila mutente lyomwe akutalika kulya akunywa. Mutente oomo bakabweza nsiliva, ngolida azisani, kumane bakazwa akuyoozisisa. Mpoonya bakapiluka akuyoonjila mutente limbi akubweza zintu zyakali mumo, kumane bakazwa akuyoozisisa.
9 Mpoonya bakati kuli umwi amweenzinyina: “Eeci ncotucita tacili kabotu pe. Obuno mbuzuba bwamakani mabotu! Ikuti tuwaye-waye akulindila kusikila mafwumofwumo, tuyoosubulwa. Lino katuya tutole makani aaya kuŋanda yamwami.” 10 Aboobo bakaunka akoompolola kubalindizi bamulyango wamunzi kuti: “Twaluunkide kunkambi yabana Siriya, pele kunyina ngotwajana–tiitwamvwa noliba jwi lyamuntu. Kwali buyo mabbiza aangidwe ambongolo zyaangidwe alimwi amatente aliimvwi mbwaabede.” 11 Mpoonya aawo balindizi bamulyango bakoompolola, eelyo makani akatolwa kuŋanda yamwami.
12 Mpoonya aawo mwami wakabuka masiku akwaambila babelesi bakwe kuti: “Amuleke ndimwaambile mbobatucita bana Siriya. Balizyi kuti tufwide nzala,+ aboobo bazwa munkambi yabo akuyooyuba musyokwe kabati, ‘Balazwa mumunzi, eelyo tulabajata bulanga akunjila mumunzi.’”+ 13 Kumane umwi wababelesi bakwe wakati: “Amuleke baalumi bamwi babweze mabbiza osanwe aakasyaala mumunzi. Amubone! Bayooba mbubonya mbuli nkamu yoonse yabana Israyeli isyeede okuno. Amubone! Bayooba mbubonya mbuli nkamu yoonse yabana Israyeli iyakafwa. Lino atubatume bakabone cacitika ooko.” 14 Aboobo bakabweza nkalaki zyobilo amabbiza, eelyo mwami wakabatuma kunkambi yabana Siriya akubaambila kuti: “Kamuya mukabone cacitika ooko.” 15 Bakabatobela mane kuyoosika ku Jordano alimwi nzila yoonse yakazwide zisani azibelesyo eezyo bana Siriya nzyobakali kuyaabusowa nobakali kutija kabayoowede. Mpoonya batumwa aabo bakapiluka akuyakwaambila mwami.
16 Kumane bantu bakaunka kunkambi yabana Siriya akuyakwiisaala, aboobo cisuwo cafulaulu cakatalika kuulwa syekeli lyomwe alimwi azisuwo zyobilo zyabbaale zyakatalika kuulwa syekeli lyomwe kweelana ajwi lya Jehova.+ 17 Mwami wakabikkide walupati-pati ngwaakali kusyoma kuti kalanganya mulyango wamunzi, pele bantu bakamulyatauka amulyango wamunzi mane wakafwa mbubonya mbwaakaamba muntu wa Leza mwini-mwini kumwami ciindi naakasikide kuŋanda yakwe. 18 Cakacitika mbubonya muntu wa Leza mwini-mwini mbwaakaambide kumwami kuti: “Juunza aciindi eecino zisuwo zyobilo zyabbaale ziyakuulwa syekeli lyomwe, eelyo cisuwo cafulaulu ciyakuulwa syekeli lyomwe kumulyango wa Samariya.”+ 19 Pele umwi walupati-pati wakaambilide muntu wa Leza mwini-mwini kuti: “Nokuba kuti Jehova wajalula zipulo zyakujulu, sena cintu* cili boobo inga cacitika ncobeni?” Elisha wakaambide kuti: “Uyoolibonena ameso aako, pele tokooyoolya pe.” 20 Aboobo cakacitika mbubonya oobo, nkaambo bantu bakamulyatauka amulyango wamunzi eelyo wakafwa.