Ezekieli
28 Alimwi ijwi lya Jehova lyakandisikila kaliti: 2 “Omwanaamuntu, komwaambila musololi wa Turo kuti, ‘Mboobu mbwaamba Mwami Singuzuzyoonse Jehova:
“Akaambo kakuti moyo wako walisumpula,+ uluujisi kwaamba kuti, ‘Ndili leza.
Ndikkala acuuno cabwami caleza mukati kalwizi.’+
Pele yebo uli muntu buyo, toli leza pe,
Nokuba kuti mumoyo wako ulimvwa kuti uli leza.
3 Bona! Yebo uli musongo kwiinda Daniele.+
Kunyina maseseke aasisidwe kulinduwe.
4 Walivwubya kwiinda mubusongo abupampu bwako,
Alimwi uluujisi kuyobola ngolida ansiliva muziyobwedo zyako zyalubono.+
5 Makwebo ngookacita camaano akakuletela lubono lunji kapati,+
Eelyo moyo wako wakalisumpula akaambo kalubono lwako.”’
6 “‘Aboobo, mboobu mbwaamba Mwami Singuzuzyoonse Jehova:
“Akaambo kakuti mumoyo wako ulimvwa kuti uli leza,
7 Ndilakuletela bamuzwakule kuti bakulwane, aabo basilunya kapati akati kamasi,+
Eelyo bayoofwumuna mapanga aabo kulwana bweebesi bwabusongo bwako
Alimwi akubisya bweebesi bwako bumweka.+
9 Sena yebo uyoociinduluka kwaamba kuti, ‘ndili leza,’ kuliyooyo uukujaya?
Yebo unooli muntu buyo, ikutali leza pe, mujanza lyabaabo bakusofwaazya.”’
10 ‘Kwiinda mujanza lyabamuzwakule uyoofwa lufwu lwabantu batapalwidwe,
Nkaambo mebo lwangu ndime ndaamba,’ mbwaamba Mwami Singuzuzyoonse Jehova.”
11 Alimwi ijwi lya Jehova lyakandisikila kaliti: 12 “Omwanaamuntu, koimba lwiimbo lwabuumba* lwakulila mwami wa Turo, umwaambile kuti, ‘Mboobu mbwaamba Mwami Singuzuzyoonse Jehova:
13 Yebo wakali mu Edeni, muunda wa Leza.
Wakasakatizyidwe mabwe oonse mayandisi,
Nkokuti mabwe aasalala, aatopazi, aajasipa;
aakulusolito, aaonikisi, aajade; aasafilo, aanofeki+ alimwi aaemalodi;
Alimwi mabwe aaya akaliyalidwe akusekkwa mungolida.
Akabambwa buzuba mbowakalengwa.
14 Ndakakubikka kuti ube kerubi munanike uuvwumbilila.
Yebo wakali acilundu cisalala ca Leza,+ eelyo wakali kweendeenda akati kamabwe aamulilo.
15 Kuzwa buzuba mbowakalengwa wakanyina kampenda munzila zyako
Kusikila ciindi kutalulama nokwakajanwa mulinduwe.+
Aboobo kosofweede ndiyookusowa kuzwa mucilundu ca Leza akukunyonyoona,+
Ndiyookunyonyweeda kulamfwu amabwe aamulilo, yebo okerubi uuvwumbilila.
17 Moyo wako wakatalika kulisumpula akaambo kabweebesi bwako.+
Wakanyonganya busongo bwako akaambo kabweebesi bwako bupati.+
Ndiyookusowela ansi, anyika.+
Ndiyookupa kuba cintu ceebelwa abami.
18 Akaambo kamulandu wako mupati alimwi amakwebo aako ngocita cabumpelenge, yebo wasofwaazya zikombelo zyako.
Ndiyoopa kuti mulilo uvwutuke mulinduwe, eelyo uyookuumpa cakumaninina.+
Ndiyookupa kuba mulota buyo anyika kumbele lyabaabo boonse bakulangide.
19 Aabo boonse bakakuzyi akati kabantu bayookulangilila kabagambidwe.+
Mamanino aako ayoosika cakutayeeyelwa alimwi munzila iiyoosya,
Eelyo uyooloba mane kukabe kutamani.”’”+
20 Alimwi ijwi lya Jehova lyakandisikila kaliti: 21 “Omwanaamuntu, lanzya busyu bwako kuli Sidoni,+ umusinsimine makani mabi. 22 Waambe kuti, ‘Mboobu mbwaamba Mwami Singuzuzyoonse Jehova:
“Bona mebo ndilakulwana, yebo Sidoni, alimwi ndiyoolemekwa mulinduwe;
Eelyo ndaakumusubula walo alimwi mebo ndaakusalazyigwa mulinguwe bantu bayoozyiba kuti ndime Jehova.
23 Ndiyoomutumina cilwazi, alimwi bulowa buyookunka mumigwagwa yakwe.
Aabo bayoojaigwa bayoowida mulinguwe ipanga lyaakumusikila kuzwa kumabazu oonse;
Eelyo bayoozyiba kuti ndime Jehova.+
24 “‘“Mpoonya bamuŋanda ya Israyeli tabakazingulukwi limbi amamvwa aabayasa alimwi aacisa,+ nkokuti aabo babasampaula; eelyo bantu bayoozyiba kuti mebo ndendime Mwami Singuzuzyoonse Jehova.”’
25 “‘Mboobu mbwaamba Mwami Singuzuzyoonse Jehova: “Ndaakubayobolola alimwi bamuŋanda ya Israyeli kuzwa akati kabantu ooko nkobakamwailidwe,+ ndiyoosalazyigwa akati kabo mumeso aabantu bamasi.+ Bayookkala munyika yabo+ njindakapede mubelesi wangu Jakobo.+ 26 Bayookkala mulinjiyo cakuliiba,+ bayooyaka maanda akusyanga myuunda yamisaansa,+ alimwi bayookkala cakuliiba ndaakubasubula boonse aabo babazingulukide ibabasampaula;+ eelyo bayoozyiba kuti ndime Jehova Leza wabo.”’”