1 Samuele
24 Lino Saulo mbwaakapilukila buyo kukulwana ba Filisiti, bakamwaambila kuti: “Bona! Davida uli munkanda ya Eni-gedi.”+
2 Mpoonya Saulo wakabweza baalumi basalidwe bali 3,000 kuzwa mu Israyeli yoonse kuti baunke kuyooyandaula Davida abaalumi bakwe mubusena bwamabwe imukkala mpongo zyamumalundu. 3 Saulo wakasika kuzyaanda zyamabwe zyambelele izyakali mumbali aanzila, ooko nkoyakabede mpangala, eelyo wakanjila mukati kuti aligwasye* ciindi Davida abaalumi bakwe nibakakkede mukati mwini mwampangala.+ 4 Mpoonya baalumi ba Davida bakamwaambila kuti: “Bwasika buzuba Jehova nakwaambila kuti, ‘Bona! Ndamwaaba sinkondonyoko mumaanza aako,+ alimwi inga wacita kulinguwe kufwumbwa cintu cibotu mumeso aako.’” Aboobo Davida wakanyamuka, eelyo cakaumuumu wakatenda moombe wajansi lya Saulo. 5 Pele kuzwa waawo moyo* wa Davida wakamupenzya+ akaambo kakuti wakatenda moombe wajansi lya Saulo. 6 Wakaambila baalumi bakwe kuti: “Tandeelede naaceya pe mumeso aa Jehova kucita cintu cili boobu kuli simalelaangu munanike wa Jehova, kwiinda mukutandabika janza lyangu alinguwe nkaambo munanike wa Jehova.”+ 7 Aboobo kwiinda mumajwi aaya, Davida wakabakasya* baalumi bakwe alimwi tanaakabazumizya kumujaya Saulo. Lino walo Saulo wakanyamuka kuzwa mumpangala akuzumanana mulweendo lwakwe.
8 Mpoonya Davida wakanyamuka akuzwa mumpangala akwiita Saulo kuti: “Omwami simalelaangu!”+ Saulo naakacebuka musyule, Davida wakavwuntama ansi. 9 Davida wakati kuli Saulo: “Ino nkaambo nzi ncoswiilila nzyobaamba bantu kuti, ‘Bona! Davida uyanda kukujaya’?+ 10 Sunu, obuno buzuba, walibonena ameso aako omwini Jehova mbwaakwaabide mumaanza aangu mumpangala. Pele umwi naandaambila kuti ndikujaye+ ndakufwida luzyalo alimwi ndati, ‘Tandikonzyi kutandabika janza lyangu ali simalelaangu nkaambo munanike wa Jehova.’+ 11 Lino langa taata, moombe wajansi lyako ngooyu mujanza lyangu; nkaambo ciindi nindatenda moombe wajansi lyako, tiindakujaya pe. Lino tee wabona akuzyiba kuti tandijisi makanze aakukujaya naa kukuzangila, alimwi tiindakubisizya pe+ nokuba kuti yebo ulandivwima kuti undijaye.+ 12 Jehova abeteke akati kanduwe andime,+ alimwi Jehova abe nguwe undipilusizya cibi kulinduwe,+ pele janza lyangu talikookuguma pe.+ 13 Mbubonya mbuli kasimpi kabasikale ikaamba kuti, ‘Bubi bulazwa kubabi,’ pele janza lyangu talikakugumi pe. 14 Ino mwami wa Israyeli utandila ni? Sena utandaanya mubwa ufwide naa ntabwa?+ 15 Jehova abe mubetesi alimwi uyoobeteka akati kanduwe andime, alimwi mulandu wangu uyakuubona akuulanganya+ akundibetekela kuti andivwune kuzwa mumaanza aako.”
16 Lino Davida naakamana kwaamba majwi aaya kulinguwe, Saulo wakati: “Sena ndijwi lyako eeli mwanaangu Davida?”+ Eelyo Saulo wakatalika koongolola kulila. 17 Wakati kuli Davida: “Yebo uliluleme kapati kwiinda ndime, nkaambo wandicitila bubotu, pele mebo ndakucitila bubi.+ 18 Masimpe, sunu watondezya bubotu kulindime mukuti Jehova walindaabide mumaanza aako pele tiiwandijaya pe.+ 19 Kuti naa muntu wajana sinkondonyina, sena inga wamulekela kuunka muluumuno? Aboobo Jehova uyookulongezya abubotu+ akaambo kacintu ncoocita kulindime sunu. 20 Alimwi bona! Ndilizyi ncobeni kuti yebo uyoolela koli mwami+ akuti bwami bwa Israyeli buyoozumanana kuba mumaanza aako. 21 Lino kokonka kulindime kwiinda muli Jehova+ kuti tokalunyonyooni lunyungu lwangu iluyooboola munsi lyangu akuti tokalimwayi zina lyangu kuzwa muŋanda yabataata.”+ 22 Aboobo Davida wakakonka kuli Saulo, kumane Saulo wakaunka kuŋanda yakwe.+ Pele Davida abaalumi bakwe bakaunka kumpangala.+