Milimo
18 Nozyakamana kucitika zintu eezyi wakazwa ku Atene akuunka ku Korinto. 2 Mpoonya wakajana mu Juda umwi uutegwa Akula,+ iwakazyalilwa ku Ponto ooyo wakazwide aakusika kuzwa ku Italiya antoomwe amukaintu wakwe Purisila, akaambo kakuti Kilaudiyo wakalailila ba Juda boonse kuzwa mu Roma. Aboobo wakaunka kulimbabo, 3 lino akaambo kakuti mulimo wabo awa Paulo wakalikozyenye, wakakkala aŋanda yabo, alimwi wakabeleka ambabo,+ nkaambo mulimo wabo wakali wakupanga matente. 4 Wakali kupa makani* mucikombelo+ sabata+ imwi aimwi alimwi wakali kubakombelezya ba Juda aba Giriki.
5 Lino Sila+ a Timoteyo+ nobakasika kuzwa ku Makedoniya, Paulo wakatalika kubelesya ciindi cakwe coonse kukukambauka jwi lya Leza, kapa bumboni kuba Juda kutegwa asinizye kuti Jesu ngo Kristo.+ 6 Pele nobakazumanana kumukazya akwaambaula cakusampaula, wakakunkumuna zisani zyakwe+ akubaambila kuti: “Bulowa bwanu abube amitwe yanu.+ Mebo ndinyina mulandu.+ Kuzwa lino ndilaunka kubantu bamasi.”+ 7 Aboobo wakazwa aawo* akunjila muŋanda yamuntu uutegwa Titiyo Jusito, imukombi wa Leza, iwakajisi ŋanda yakabambene acikombelo. 8 Pele Krisipo,+ imweendelezi wacikombelo wakaba musyomi mu Mwami, antoomwe abamuŋanda yakwe boonse. Alimwi bana Korinto banji ibakaswiilila bakatalika kusyoma akubbapatizyigwa. 9 Kunze lyaboobo, imasiku Mwami wakaambila Paulo mucilengaano kuti: “Utayoowi pe, pele kozumanana kwaambaula alimwi utaumuni buyo pe, 10 nkaambo ndilaanduwe+ aboobo kunyina muntu uutiikulwane akukucisa; nkaambo ndijisi bantu banji mumunzi ooyu.” 11 Aboobo wakakkala ooko mwaka omwe amyezi iili cisambomwe, kayiisya jwi lya Leza akati kabo.
12 Lino Galiyo naakali mweendelezi wacooko ca Akaya, iba Juda caantoomwe bakamubukila Paulo akumutola kucuuno calubeta, 13 kabati: “Muntu ooyu uyunga bantu kukomba Leza munzila iiteendelani amulawo.” 14 Pele Paulo naakali kuyanda kutalika kwaambaula, Galiyo wakaambila ba Juda kuti: “Noba Juda, ikuti nokwali kutyola mulawo naa kucita cintu cimwi cibi, nindalijisi kaambo kakumukkazikila moyo akumuswiilila. 15 Pele ikuti naa mazwanga aajatikizya majwi, mazina alimwi amulawo wanu,+ amulibonene nobeni. Tandiyandi kuba mubetesi wamakani aaya.” 16 Mpoonya wakabatanda kuzwa kucuuno calubeta. 17 Eelyo boonse bakajata Sostene+ imweendelezi wacikombelo akutalika kumuuma kumbele lyacuuno calubeta. Pele Galiyo tanaakalinjizya muzintu eezyi pe.
18 Pele naakakkala mazuba manji aambi, Paulo wakabalaya bakwesu akutanta bwato kuya ku Siriya antoomwe a Purisila a Akula. Kali ku Kenkreya+ wakailulula masusu aakwe, nkaambo wakalikonkede. 19 Aboobo bakasika ku Efeso, eelyo wakabasiya ooko; pele walo wakanjila mucikombelo akubandika aba Juda.+ 20 Nokuba kuti bakazumanana kumulomba kuti akkale kwamazuba manji, wakakaka 21 pele wakabalaya akubaambila kuti: “Ndiyoopiluka alimwi kulindinywe ikuti kakuli kuyanda kwa Jehova.”* Eelyo wakatanta bwato kuzwa ku Efeso 22 akuselemukila ku Kaisareya. Alimwi wakaunka* waakwaanzya mbungano, mpoonya wakaselemuka kuya ku Antiokeya.+
23 Naakakkala ciindi cili mbocibede ooko, wakazwa akwiinda mumasena oonse mucisi ca Galatiya a Fuligiya,+ kayaabuyumya-yumya basikwiiya boonse.+
24 Lino mu Juda umwi uutegwa Apolo,+ iwakazyalilwa ku Alekizandiriya wakasika ku Efeso; wakali mwaalumi iwakali kupasaula kukanana, alimwi wakalaazyi kapati Magwalo. 25 Imwaalumi ooyu wakayiisyidwe* nzila ya Jehova,* alimwi mbwaanga moyo wakwe wakali kupya amuuya, wakali kwaamba akuyiisya zintu ziluzi kujatikizya Jesu, pele wakazyi buyo zyalubbapatizyo lwa Johane. 26 Wakatalika kukanana cabusicamba mucikombelo, eelyo Purisila a Akula+ nobakamumvwa, bakamutola ambali akumupandulwida bwini mboibede nzila ya Leza. 27 Kunze lyaboobo, akaambo kakuti wakali kuyanda kuzabukila ku Akaya, bakwesu bakalembela basikwiiya, kubakulwaizya kuti bamutambule kabotu. Aboobo naakasika ooko, wakabagwasya kapati aabo ibakaba basyomi kwiinda muluzyalo lwa Leza; 28 nkaambo canguzu kapati wakacisalazya kubuleya kuti ba Juda bakalisweekede, kwiinda mukubatondezya kuzwa mu Magwalo kuti Jesu ngo Kristo.+