Babetesi

16 Buzuba bumwi Samusoni wakaunka ku Gaza, ooko nkwakaakubona mukaintu muvwuule, eelyo wakanjila muŋanda yamukaintu ooyo. 2 Lino bana Gaza bakaambilwa kuti: “Samusoni wasika okuno.” Aboobo bakamuzinguluka akumuyubilila busiku boonse kumulyango wamunzi. Bakaluumwine wi masiku oonse kabaambilana kuti: “Mbobutiicede buyo, tulamujaya.”

3 Nokuba boobo, Samusoni wakazumanana koona kusikila akati kamasiku. Mpoonya akati kamasiku wakabuka akujata zijazyo zyamunzi aminsende yanzizyo yobilo akwiizyula antoomwe aminkulwa. Eelyo wakazinyamuna aagwezyo lyakwe akuzitola atala aacilundu cilangene a Hebroni.

4 Musyule lyayaaya, wakayanda mukaintu ku Kkuti* lya Soreki, izina lyakwe wakali Delila.+ 5 Aboobo bami baba Filisiti bakaboola kumukaintu ooyo akumwaambila kuti: “Komoongelezya*+ kutegwa akwaambile nkozizwa nguzu zyakwe zigambya alimwi ancotukonzya kubelesya kuti tumuzunde alimwi ancotukonzya kubelesya kumwaanga kutegwa tumukonzye. Eelyo umwi aumwi wesu ulakupa mali aansiliva aali 1,100.”

6 Kumane Delila wakati kuli Samusoni: “Akaka kondaambila ikuzwa nguzu zyako zigambya alimwi ancakonzya kubelesya muntu kukwaanga kutegwa akonzye kukuzunda.” 7 Mpoonya Samusoni wakati kulinguwe: “Ikuti bandaanga amakole* mapya aatanayuma aali ciloba, nguzu zyangu inga zyamana alimwi inga ndaba mbuli bantu boonse.” 8 Aboobo bami baba Filisiti bakamuletela makole mapya aatanayuma aali ciloba, mpoonya mukaintu wakamwaanga angawo. 9 Lino bakamuyubilila mumonya muŋanda oomo, eelyo mukaintu wakaambila Samusoni kuti: “Ba Filisiti bakuboolela Samusoni!” Mpoonya wakaadunsaula makole mbubonya mbuli ntali zyapya mulilo.+ Inguzu zyakwe tiizyakazyibwa nkozizwa.

10 Mpoonya Delila wakati kuli Samusoni: “Bona! Wandeena akundaambila zyakubeja. Lino kondaambila kaka, ncinzi cinga cabelesyegwa kukwaanga?” 11 Aboobo wakati kulinguwe: “Ikuti bandaanga antambo zipya zitanabelesyedwe, nguzu zyangu zilakonzya kumana alimwi inga ndaba mbuli bantu boonse.” 12 Aboobo Delila wakabweza ntambo zipya, wamwaanga anzizyo akumwaambila kuti: “Ba Filisiti bakuboolela Samusoni!” (Aciindi aawo basikumuyubilila bakalikkede muŋanda.) Mpoonya wakazidunsaula ntambo izyakali kumaanza aakwe mbuli ntali buyo.+

13 Kuzwa waawo Delila wakaambila Samusoni kuti: “Wandeena kale alimwi akundaambila zyakubeja.+ Kondaambila cinga cabelesyegwa kukwaanga.” Mpoonya wakamwaambila kuti: “Ikuti wandoosa zyooso zili ciloba zyamasusu aangu antali yalunsabwe.” 14 Aboobo wakamoosa zyooso akuzyaanga akanamatizyo, kumane wakamwaambila kuti: “Ba Filisiti bakuboolela Samusoni!” Aboobo wakabuka kuzwa muŋonzi akumonsola kanamatizyo akuzambulula ntali yalunsabwe.

15 Lino Delila wakaambila Samusoni kuti: “Waamba kuti ulandiyanda+ kakuli moyo wako tuuli alindime! Wandeena ziindi eezyi zyotatwe, alimwi tonoondaambila nguzu zyako zigambya nkozizwa.”+ 16 Lino akaambo kakuti buzuba abuzuba wakali kumukatazya amajwi aakwe alimwi akumusungilizya, moyo wakwe wakapenga calufwu.+ 17 Kumamanino wakamwaambila makani oonse aakumoyo wakwe, wakati: “Taakwe nindakageledwe kuzwa nindakazyalwa,*+ nkaambo ndili mu Naziri wa Leza. Ikuti ndagelwa, nguzu zyangu zilamana alimwi inga ndaba mbuli bantu boonse.”

18 Delila naakabona kuti Samusoni wamuyubunwida makani oonse aakumoyo wakwe, mpoonya aawo wakatumya mulomo kwiita bami baba Filisiti,+ wakati: “Amuboole lino, nkaambo wandaambila makani oonse aakumoyo wakwe.” Aboobo bami baba Filisiti bakaboola kulinguwe, akuletelezya amali. 19 Wakamubutika amazwi aakwe; mpoonya wakaita mwaalumi kuti amugele zyooso zili ciloba. Kuzwa waawo wakacikonzya kumweendelezya nkaambo nguzu zyakwe zyakali kuyaabumana. 20 Lino wakaamba kuti: “Ba Filisiti bakuboolela Samusoni!” Mpoonya aawo wakabuka akwaamba kuti: “Andizwe anze mbuli lyoonse+ akutija.” Pele tanaakazyi kuti Jehova wamusiya. 21 Aboobo ba Filisiti bakamujata akumudonkola meso. Mpoonya bakamutola ku Gaza akumwaanga nsimbi zyamukuba; eelyo wakaba sikuziya maila muntolongo. 22 Pele masusu aakwe akatalika alimwi kulampa kuzwa naakagelwa.+

23 Bami baba Filisiti bakabungana antoomwe kuti batuulile Dagoni+ leza wabo zipaizyo zinji akusekelela, nkaambo bakali kwaamba kuti: “Sunu leza wesu wamwaaba Samusoni sinkondoma mumaanza eesu!” 24 Bantu nobakamubona bakatalika kutembaula leza wabo, kabati, “Nkaambo leza wesu wamwaaba sinkondoma mumaanza eesu, ooyo iwakanyonyoona cisi cesu+ alimwi iwakajaya bantu besu banji.”+

25 Lino akaambo kakuti bakalikkomene kapati, bakati: “Amumwiite Samusoni kuti azootucitile zintu zisesya.” Aboobo bakamwiita kuzwa muntolongo kuti abasobanine; eelyo bakamwiimika akati kamisemu. 26 Mpoonya Samusoni wakaambila mulombe wakamujatilide kujanza kuti: “Ndileke ndaampe misemu iitabilide ŋanda eeyi, kutegwa ndiyaame alinjiyo.” 27 (Lino ŋanda yakazwide baalumi abamakaintu. Bami boonse baba Filisiti bakaliko, eelyo atala aaciluli kwakali baalumi abamakaintu basika ku 3,000 ibakali kulangilila ciindi Samusoni naakali kucita zintu zisesya.)

28 Lino Samusoni+ wakalilila Jehova akwaamba kuti: “O Mwami Singuzuzyoonse Jehova, kondiyeeya kaka akundiyumya,+ oluno lweendo lulikke, O Leza, kuti ndipilusizye ba Filisiti cibi akaambo kaliso lyangu lyomwe buyo akati kameso aangu obilo.”+

29 Mpoonya aawo Samusoni wakajata misemu yaakati yobilo iyakatabilide ŋanda, musemu omwe kujanza lyakululyo eelyo umwi kujanza lyakulumwensyi. 30 Samusoni wakati: “Andifwe antoomwe aba Filisiti!” Mpoonya wakaitonta misemu canguzu, eelyo ŋanda yakabawida bami abantu boonse ibakali mumo.+ Aboobo bantu mbaakajaya alufwu lwakwe bakali banji kwiinda baabo mbaakajaya kacipona.+

31 Kumane banabokwabo antoomwe abamuŋanda yabausyi boonse bakaboola kuzoomubweza. Bakamutola akuyoomuzikka akati ka Zora+ a Esitaoli mucuumbwe ca Manowa+ usyi. Wakabeteka bana Israyeli myaka iili 20.+