1 Samuele
23 Mukuya kwaciindi Davida wakaambilwa kuti: “Ba Filisiti baboola kulwana munzi wa Keila,+ alimwi bali mukubweza maila kuzyuumino zyamaila.” 2 Aboobo Davida wakabuzya Jehova kuti:+ “Sena nduunke kuyoobalwana ba Filisiti aaba?” Jehova wakaambila Davida kuti: “Koya ukabalwane akuvwuna Keila.” 3 Pele baalumi ba Davida bakati kulinguwe: “Bona! Tuliyoowede notuli kokuno ku Juda;+ ino cilaba buti kuti tuunke ku Keila kuyoolwana aba Filisiti?”+ 4 Kumane Davida wakabuzya alimwi kuli Jehova.+ Mpoonya Jehova wakamuvwiila kuti: “Nyamuka; koya ku Keila, nkaambo ndilabaaba ba Filisiti mumaanza aako.”+ 5 Aboobo Davida wakaunka abaalumi bakwe ku Keila kuyoolwana ba Filisiti; wakabanyanga banyama babo bavwubwa akujaya ba Filisiti banji kapati, alimwi Davida wakabavwuna bantu baku Keila.+
6 Lino Abiyatara+ mwana wa Ahimeleki naakatijila kuli Davida ku Keila, wakaunka akabaki kabupaizi. 7 Mpoonya Saulo wakaambilwa kuti: “Davida waboola ku Keila.” Eelyo Saulo wakati: “Leza wamwaaba kulindime,*+ nkaambo walijalila alikke kwiinda mukunjila mumunzi uujisi milyango azipingizyo.” 8 Aboobo Saulo wakaita bantu boonse kuti baunke kunkondo ku Keila kuyoosinkila Davida abaalumi bakwe. 9 Lino Davida naakazyiba kuti Saulo wakali kukanza kumucitila bubi, wakaambila Abiyatara mupaizi kuti: “Koleta kabaki kabupaizi okuno.”+ 10 Mpoonya Davida wakati: “O Jehova Leza wa Israyeli, ndemubelesi wako ndamvwa ncobeni kuti Saulo uyanda kuboola ku Keila kutegwa aunyonyoone munzi akaambo kandime.+ 11 Sena basololi* baku Keila balandaaba mumaanza aakwe? Sena Saulo ulaboola mbubonya mbondamvwa ndemubelesi wako? Akaka O Jehova Leza wa Israyeli, kondaambila ndemubelesi wako.” Jehova wakati: “Inzya ulaboola.” 12 Davida wakabuzya kuti: “Sena basololi baku Keila balandaaba mebo antoomwe abaalumi bangu mumaanza aa Saulo?” Mpoonya Jehova wakaingula kuti: “Inzya balamwaaba.”
13 Mpoonya aawo Davida wakanyamuka abaalumi bakwe ibasika ku 600,+ eelyo bakazwa ku Keila akuunka kufwumbwa nkobakali kukonzya kuunka. Lino Saulo naakaambilwa kuti Davida watija kuzwa ku Keila, tanaakamutobela ooko pe. 14 Davida wakakkala munkanda mumasena aakatazya kusika mumalundu aamunkanda ya Zifi.+ Eelyo Saulo wakazumanana kumuyandaula,+ pele Jehova tanaakamwaaba mumaanza aakwe. 15 Davida wakalizyi kuti Saulo uyandaula* buumi bwakwe ciindi Davida naakali munkanda ya Zifi ku Horesi.
16 Lino Jonatani mwana wa Saulo wakanyamuka akuunka kuli Davida ku Horesi, eelyo wakamugwasya kuti ayume* muli Jehova.+ 17 Wakati kulinguwe: “Utayoowi, nkaambo Saulo taata takakujani pe; yebo uyooba mwami wa Israyeli+ mpoonya mebo ndiyooba wabili kulinduwe; awalo Saulo taata uulaazyi buya makani aaya.”+ 18 Mpoonya aaba bobilo bakapangana cizuminano+ kubusyu bwa Jehova, Davida wakazumanana kukkala ku Horesi, pele Jonatani wakaunka kuŋanda yakwe.
19 Kumane bantu baku Zifi bakaunka kuli Saulo ku Gibea+ akumwaambila kuti: “Sena Davida tayubide afwaafwi andiswe+ mumasena aakatazya kusika ku Horesi,+ atala aakalundu ka Hakila+ ikali kumusanza* kwa Jesimoni?*+ 20 Lino kufwumbwa ciindi ncolombozya kuboola omwami, ukaboole eelyo swebo tuyoomwaaba mumaanza aako omwami.”+ 21 Amvwe boobo Saulo wakati: “Aamulongezye Jehova, nkaambo mwandibeda alweetelelo. 22 Akaka kamuya mukasolekesye kumuyandaula kuti muzyibe kwini nkwabede alimwi akujana yooyo wakamubona ooko, nkaambo ndakaambilwa kuti mucenjezu kapati. 23 Cakulomya mukaayandaule nkwaabede masena aakwe oonse nkwayubila, mwaakumana mukapiluke abumboni kulindime. Mpoonya ndiyakuunka andinywe, ikuti naa kaliko munyika eeyo, ndiyoomuyandaula cakulomya akati kazyuulu* zyoonse zyabantu ba Juda.”
24 Aboobo bakanyamuka akuunka ku Zifi+ kumbele lya Saulo, aciindi eeco Davida abaalumi bakwe bakali munkanda ya Maoni+ mu Araba+ kumusanza kwa Jesimoni. 25 Mpoonya Saulo wakaboola abaalumi bakwe kuzoomuyandaula.+ Lino Davida naakaambilwa makani aaya, mpoonya aawo wakaselemukila mumpangala+ akuzumanana kukkala munkanda ya Maoni. Naakamvwa boobo Saulo, wakamutobela Davida munkanda ya Maoni. 26 Saulo naakasika kulubazu lumwi lwacilundu, Davida abaalumi bakwe bakali kulubazu lumbi lwacilundu. Davida wakali kuyanda kutija cakufwambaana+ akaambo ka Saulo, pele Saulo abaalumi bakwe bakali kuyaabuswena afwaafwi kuti bamujate Davida abaalumi bakwe.+ 27 Pele kwakaboola mutumwa kuli Saulo iwakaamba kuti: “Amupiluke cakufwambaana, nkaambo ba Filisiti baisaala nyika!” 28 Amvwe boobo Saulo wakacileka kutobela Davida+ akuunka kuyoolwana ba Filisiti. Nkakaambo kaako busena oobo bwakaulikwa kuti Mpangala ya Lwaandaano.
29 Mpoonya Davida wakatanta kuzwa kooko akuunka kuyookkala kumasena aakatazya kusika ku Eni-gedi.+