1 Samuele
28 Mumazuba aayo ba Filisiti bakalibunga-bunga munkambi zyabo kuti balwane bana Israyeli.+ Aboobo Akisi wakaambila Davida kuti: “Ulizyi kabotu kuti yebo abaalumi bako weelede kuunka andime kunkondo.”+ 2 Mpoonya Davida wakati kuli Akisi: “Yebo omwini ulizyi kabotu mubelesi wako ncayoocita.” Aboobo Akisi wakati kuli Davida: “Nkakaambo kaako ndilakubikka kuba mulindizi wangu lyoonse.”*+
3 Lino Samuele wakalifwide kale, alimwi bana Israyeli boonse bakamulila akumuzikka ku Rama mumunzi wakwe.+ Alimwi Saulo wakalibagwisyide basondi abaŋanga mucisi.+
4 Ba Filisiti bakalibunga-bunga akuyaka nkambi ku Sunemu.+ Aboobo Saulo wakabunganya bana Israyeli boonse, eelyo bakayaka nkambi ku Giliboa.+ 5 Lino Saulo naakabona nkambi yabasikalumamba yaba Filisiti, wakayoowa alimwi moyo wakwe wakatalika kuduntaana kapati.+ 6 Nokuba kuti Saulo wakali kubuzya kuli Jehova,+ Jehova tanaakali kumwiingula pe, mube muziloto, mube mu Urimu+ naa kwiinda mubasinsimi. 7 Mpoonya Saulo wakaambila babelesi bakwe kuti: “Amundijanine mukaintu uucibwene kapati kusonda+ eelyo ndilaunka kulinguwe kuyoobuzya.” Babelesi bakwe bakamwiingula kuti: “Bona! Kuli mukaintu uucibwene kapati kusonda ku Eni-dori.”+
8 Aboobo Saulo wakalicinca kuti atalizyibyi akusama zisani zimbi, kumane wakaunka abaalumi bakwe bobilo eelyo bakasika kumukaintu ooyo masiku. Kumane Saulo wakati: “Akaka kosonda+ akundibusyila muntu ngonditiikwaambile.” 9 Nokuba boobo mukaintu ooyo wakati kulinguwe: “Weelede kuti ulizyi ncaakacita Saulo, kuti wakagwisya basondi mucisi.+ Aboobo ino nkaambo nzi nconditeyela kutegwa undijazye?”+ 10 Mpoonya Saulo wakakonka kulinguwe muzina lya Jehova kuti: “Masimpe mbubonya Jehova mbwali muumi, tokooba amulandu uuli woonse mumakani aaya!” 11 Mpoonya mukaintu wakabuzya kuti: “Ino nguni ngoyanda kuti ndikubusyile?” Eelyo wakati: “Kondibusyila Samuele.” 12 Lino mukaintu naakabona “Samuele,”*+ wakoongolola ajwi lipati akwaambila Saulo kuti: “Ino nkaambo nzi ncoondeena? Nduwe Saulo!” 13 Mwami wakati kulinguwe: “Utayoowi pe, ino ncinzi ncowabona?” Eelyo mukaintu wakaingula Saulo kuti: “Ndibona uuboneka mbuli leza kazwa munyika.” 14 Wakamubuzya kuti: “Ino uboneka buti?” Eelyo mukaintu wakati: “Mudaala, alimwi usamide jansi.”+ Mpoonya aawo Saulo wakazyiba kuti ngu “Samuele,” aboobo wakafwugama kalangide ansi kumane wakavwuntama.
15 Mpoonya “Samuele” wakati kuli Saulo: “Ino nkaambo nzi ncoondinyonganya kwiinda mukundibusya?” Saulo wakaingula: “Ndapenga kapati. Ba Filisiti bandilwana alimwi Leza wandisiya, tacindiinguli pe, mube mubasinsimi naa muziloto;+ aboobo ndakwiita kuti undaambile ncondeelede kucita.”+
16 Lino “Samuele” wakati: “Ino nkaambo nzi ncobuzya ndime kakuli Jehova wakusiya+ akuba sinkondonyoko? 17 Jehova uyoocita mbubonya mbwaakaamba kwiinda mulindime: Jehova uyookunyanga bwami akubupa kuli umwi wabeenzinyoko, kuli Davida.+ 18 Akaambo kakuti tonookaswiilila jwi lya Jehova alimwi tonookabanyonyoona bana Amaleki+ mubukali bwakwe bupati, nkakaambo kaako Jehova ncaacitila boobu kulinduwe sunu. 19 Alimwi Jehova ulaaba bana Israyeli antoomwe anduwe mumaanza aaba Filisiti,+ alimwi juunza yebo+ abana bako+ muyooba andime. Alimwi Jehova uyooyaaba impi yabasikalumamba bana Israyeli mumaanza aaba Filisiti.”+
20 Mpoonya aawo Saulo wakawida ansi akuyoowa kapati akaambo kamajwi ngaakaamba “Samuele.” Alimwi nguzu zyakamumana nkaambo taakwe ncaakalide buzuba boonse oobo amasiku. 21 Ciindi mukaintu ooyo naakaboola kuli Saulo akubona kuti wakalinyongene kapati, wakati kulinguwe: “Mebo ndemubelesi wako ndaswiilila jwi lyako akubikka buumi bwangu+ muntenda* alimwi akucita ncoondaambila kucita. 22 Lino ndalomba kuti uswiilile ncatiiambe mubelesi wako. Leka ndikupe kankwa; mpoonya ulye kutegwa ube anguzu zyakupiluka mulweendo lwako.” 23 Pele wakakaka akwaamba kuti: “Tandikoolya pe.” Nokuba boobo, babelesi bakwe alimwi amukaintu ooyo bakazumanana kumusungilizya. Mpoonya wakaswiilila majwi aabo, eelyo wakabuka kuzwa ansi akukkala abulo. 24 Lino mukaintu ooyo wakalijisi moombe uuneneede, eelyo cakufwambaana wakamujaya* alimwi wakabweza fulaulu akuukanda akupanga zinkwa zitajisi bumena. 25 Wakamuletela Saulo ababelesi bakwe, eelyo bakalya. Bamane bakanyamuka akuunka mbubonya busiku oobo.+