2 Samuele
17 Mpoonya Ahitofeli wakaambila Abisalomu kuti: “Leka ndisale baalumi bali 12,000 kutegwa tukatandaanye Davida sunu masiku. 2 Ndilamujana nkwabede kakatede cakuwizuka,*+ eelyo ndilapa kuti akankame; lino bantu boonse mbali limwi balatija, mpoonya ndilajaya buyo mwami alikke.+ 3 Mpoonya ndilabaleta bantu boonse kulinduwe. Ikupiluka kwabantu boonse kuyeeme acitiicitike kumuntu ooyu ngoyandaula. Eelyo bantu boonse bayooba muluumuno.” 4 Imuzeezo ooyu wakamubotela Abisalomu alimwi abaalu boonse bamu Israyeli.
5 Nokuba boobo Abisalomu wakati: “Amumwiite awalo Husai+ muna Ariki tumvwe mbwatiiambe.” 6 Aboobo Husai wakaboola kuli Abisalomu. Mpoonya Abisalomu wakati kulinguwe: “Ooyu ngomuzeezo ngwaapa Ahitofeli. Sena tucite kweelana alulayo lwakwe? Ikuti kakutali boobo, kotwaambila mboyeeya.” 7 Eelyo Husai wakati kuli Abisalomu: “Lulayo ndwaapa Ahitofeli oluno lweendo taluli kabotu pe!”+
8 Husai wakazumanana kwaamba kuti: “Yebo ulimuzyi kabotu uso alimwi abaalumi mbali limwi, kuti mbaasinguzu+ alimwi balinyemede* kapati mbuli cibbeya casweekelwa bana bancico musyokwe.+ Alimwi uso ngusikalumamba,+ takonzyi koona antoomwe abantu masiku. 9 Ciindi ecino uliyubide mumpangala* imwi naa mubusena bumbi;+ eelyo ikuti naa abe nguwe uusaanguna kubalwana, aabo ibayakwiimvwa mpuwo eeyi bayakwaamba kuti, ‘Basikutobela Abisalomu bazundwa!’ 10 Naba mwaalumi sicamba uuli amoyo mbuli wasyuumbwa+ masimpe uyooyoowa kapati, nkaambo bana Israyeli boonse balizyi kuti uso mwaalumi singuzu+ akuti abalo baalumi mbali limwi mbaasicamba. 11 Lulayo lwangu ndoolu: Bunganya bana Israyeli boonse kuzwa ku Dani kusikila ku Beere-seba,+ ibanji mbuli musenga wakunkomwe yalwizi,+ mpoonya weelede kubasololela kunkondo. 12 Tuyoomuunkila kufwumbwa nkwakonzya kujanika, eelyo tuyoomusikila mbuli mume mbuuloka ansi; alimwi kunyina naba omwe uuyoofwutuka, walo nobaba baalumi boonse mbali limwi. 13 Ikuti naa akatijile mumunzi umwi, tuyakuunka abana Israyeli boonse kuyakuunyonyoona munzi ooyo akuukwelela kukalonga antambo. Tamukasyaali kabwe nokaba komwe.”
14 Mpoonya Abisalomu abaalumi boonse bana Israyeli bakati: “Lulayo lwa Husai muna Ariki luli kabotu+ kwiinda lulayo lwa Ahitofeli.” Jehova wakalikanzide kunyonganya* lulayo lubotu lwa Ahitofeli,+ kutegwa Jehova aletele Abisalomu+ mapenzi.
15 Kumane Husai wakati kuli Zadoki a Abiyatara+ ibapaizi: “Mboobu Ahitofeli mbwaalailila Abisalomu abaalu bamu Israyeli, alimwi mboobu mebo mbondabalailila. 16 Lino cakufwambaana amutume bantu kuyakwaambila Davida akumucenjezya kuti: ‘Mutakkali muzito* zyamunkanda sunu masiku, pele mweelede kuzabuka, buyo-buyo yebo omwami abantu boonse mboli limwi inga mwajaigwa.’”*+
17 Jonatani+ a Ahimaazi+ bakali kukkala ku Eni-rogeli;+ aboobo mubelesi musimbi wakaunka kuyoobaambila, eelyo bakaunka kuyakwaambila Mwami Davida, nkaambo tiibakali kusola kulibonya kabanjila mumunzi. 18 Nokuba boobo mulombwana umwi wakababona, mpoonya wakaambila Abisalomu. Eelyo Jonatani a Ahimaazi bakeenda cakufwambaana, baakusika kuŋanda yamwaalumi umwi ku Bahurimu+ iwakajisi mugoti mulubuwa lwakwe. Aboobo bakanjila mumugoti oomo, 19 kumane mukaintu wamwaalumi ooyo wakavwumba cintu cimwi atala aamugoti akumwaya-mwaya maila atala; kunyina wakazyiba pe. 20 Babelesi ba Abisalomu bakaboola kumukaintu ooyo kuŋanda yakwe akumubuzya kuti: “Ino Ahimaazi a Jonatani bali kuli?” Mpoonya mukaintu wakabaingula kuti: “Baindilila aano akutozya kumulonga.”+ Eelyo baalumi aabo bakabayandaula pele tiibakabajana pe, aboobo bakapiluka ku Jerusalemu.
21 Mbubakaunkila buyo baalumi aabo, bakazwa mumugoti mobakayubide, akuunka kuyakwaambila Mwami Davida. Bakati kulinguwe: “Amunyamuke akuzabuka mulonga cakufwambaana, nkaambo mboobu aboobu Ahitofeli mbwaalailila kujatikizya ndinywe.”+ 22 Mpoonya aawo Davida abantu boonse mbaakali limwi bakanyamuka akuzabuka Jordano. Kusikila mafwumofwumo kunyina naba omwe watakaninga kuzabuka Jordano.
23 Lino Ahitofeli naakabona kuti lulayo lwakwe tiilwakatobelwa, wakatanta mbongolo akuunka kuŋanda kumunzi wakwe.+ Naakamana kupa malailile kumukwasyi wakwe,+ wakalisina.+ Aboobo wakafwa akuzikkwa kubusena bwakazikkilwa bamausyi.
24 Lino Davida wakaunka ku Mahanaimu,+ eelyo Abisalomu abaalumi boonse bana Israyeli mbaakali limwi bakazabuka Jordano. 25 Lino Amasa+ ngonguwe Abisalomu ngwaakabikka kuba silutwe wampi yabasikalumamba mubusena bwa Joabu;+ Amasa wakali mwana wamwaalumi muna Israyeli wazina lya Itura, ooyo wakoonede* a Abigayeli+ mwana wa Nahasi, imucizyi wa Zeruya banyina Joabu. 26 Bana Israyeli alimwi a Abisalomu bakayaka nkambi munyika ya Gileadi.+
27 Lino Davida mbwaakasikila buyo ku Mahanaimu, Sobi imwana wa Nahasi waku Raba+ wabana Amoni, a Makiri+ mwana wa Amiyeli waku Lo-debara alimwi a Barizilai+ muna Gileadi waku Rogelimu 28 bakaleta malo, zyakusambila, zibiya, wiiti, bbaale, fulaulu, maila aayokedwe, nyangu, nyabo amaila aakangidwe, 29 buci, cipwaza, mbelele amabisi. Bakaleta zintu eezyi zyoonse kuli Davida akubantu mbaakali limwi kuti balye,+ nkaambo bakati: “Bantu aaba balaanzala, bakatala alimwi bafwa nyota munkanda.”+