Milimo
14 Lino ku Ikoniyo bakanjila antoomwe mucikombelo caba Juda alimwi bakaambaula kabotu cakuti nkamu mpati yaba Juda aba Giriki bakaba basyomi. 2 Pele ba Juda batakasyoma bakanyonganya bantu bamasi akubayunga kuti babukile bakwesu.+ 3 Aboobo bakatola ciindi cilamfwu kabaambaula cabusicamba munguzu zya Jehova,* ooyo wakacitila bumboni kujwi lyaluzyalo lwakwe kwiinda mukubapa kucita zitondezyo azintu zigambya.+ 4 Nokuba boobo, bantu banji bamumunzi bakaandaana; bamwi bakali kulubazu lwaba Juda pele bamwi bakali kulubazu lwabaapostolo. 5 Ciindi bantu bamasi aba Juda antoomwe abeendelezi babo nobakali kuyanda kutalika kubapenzya akubapwaya mabwe,+ 6 baapostolo aabo bakaambilwa makani aaya, eelyo bakatijila kuminzi ya Lukaoniya, Lustro, Derbe akumasena aazingulukide.+ 7 Ooko bakazumanana kwaambilizya makani mabotu.
8 Lino mu Lustro kwakakkede mwaalumi umwi wakalemene maulu. Wakali mulema kuzwa naakazyalwa alimwi kunyina buzuba naakeendede. 9 Imwaalumi ooyu wakali kuswiilila Paulo naakali kwaambaula. Lino Paulo naakamulangisisya akubona kuti wakajisi lusyomo lwakuti inga waponesyegwa,+ 10 wakati ajwi pati: “Koimikila.” Eelyo mwaalumi ooyo wakasotoka akutalika kweenda.+ 11 Makamu aabantu nobakabona ncaakacita Paulo, bakoompolola mumwaambo wa Chilukaoniya kuti: “Baleza baba mbuli bantu alimwi batuselukila!”+ 12 Mpoonya bakatalika kwiita Barnaba kuti Zusi, pele Paulo bakati ngu Herme, nkaambo nguwakali kusololela mukwaambaula. 13 Alimwi tempele lya Zusi lyakali kumanjililo aamunzi, eelyo mupaizi wa Zusi wakaleta basune amisini yamaluba kumilyango alimwi wakali kuyanda kutuula zipaizyo antoomwe ankamu yabantu.
14 Pele baapostolo, Barnaba a Paulo nobakamvwa makani aaya, bakazapula zisani zyabo, babalikila munkamu yabantu eeyo akoompolola kuti: 15 “Nobaalumi, ino nkaambo nzi ncomucitila boobu? Andiswe tuli bantu buyo ibalezya mbubonya mbuli ndinywe.+ Twaambilizya makani mabotu kulindinywe kuti muzifwutatile zintu eezyi zyabuyo akusandukila kuli Leza uupona, iwakalenga julu, nyika, lwizi azintu zyoonse zili mumo.+ 16 Mumazyalani aamusyule bamasi boonse wakabalekela kutobela nzila zyabo beni,+ 17 nokuba kuti walo mwini tanaakalilekela kubula bumboni+ nkaambo wakacita zibotu, wakamupa mvwula kuzwa kujulu aziindi eelyo nokuba micelo minji,+ alimwi wakamukkutya azilyo akuzuzya myoyo yanu akubotelwa.”+ 18 Pele nokuba kuti bakaamba majwi aaya, tiicakabaubila pe kukasya makamu aabantu kubatuulila zipaizyo.
19 Pele kwakasika ba Juda kuzwa ku Antiokeya aku Ikoniyo alimwi bakoongelezya makamu aabantu,+ eelyo bakamupwaya mabwe Paulo akumukwelela anze aamunzi, kabayeeya kuti wafwa.+ 20 Nokuba boobo, basikwiiya nobakamuzinguluka, wakanyamuka akunjila mumunzi ooyo. Mubuzuba bwakatobela wakaunka a Barnaba ku Derbe.+ 21 Nobakamana kwaambilizya makani mabotu mumunzi ooyo akuyiisya bantu banji kuba basikwiiya, bakapilukila ku Lustro, ku Ikoniyo aku Antiokeya. 22 Ooko bakayumya-yumya basikwiiya+ akubakulwaizya kuzumanana mulusyomo kabati: “Tweelede kwiinda mumapenzi manji kutegwa tukanjile mu Bwami bwa Leza.”+ 23 Kunze lyaboobo, bakabasalila baalu mumbungano imwi aimwi,+ bakapaila akuliimya kulya,+ eelyo bakabasiya mumaanza a Jehova* ooyo ngobakasyoma.
24 Mpoonya bakainda mu Pisidiya akunjila mu Pamfiliya,+ 25 eelyo nobakamana kukambauka jwi mu Perge, bakaselemukila ku Ataliya. 26 Kuzwa kooko bakatanta bwato akuunka ku Antiokeya, ooko bakwesu nkobakababikkide mumaanza aa Leza kuti abatondezye luzyalo lwakwe kutegwa bacite mulimo ooyo lino ngobakamanizyide.+
27 Nobakasika ku Antiokeya akubunganya mbungano, bakatalika kubalwiida zintu zinji nzyaakacita Leza kwiinda mulimbabo, akuti wakajalula nzila* kuli bamasi kuti batambule lusyomo.+ 28 Aboobo bakakkala abasikwiiya kwaciindi cilamfwu.