15 Kuvwiila kabotu kulalesya bukali,+
Pele majwi mabi alanyemya.+
2 Mulaka wabasongo ulalubelesya kabotu luzyibo,+
Pele mulomo wabantu batakwe maano ubbwa buyo zyabufwubafwuba.
3 Meso aa Jehova ali kumasena oonse,
Alalangilila bantu babi alimwi ababotu.+
4 Mulaka uukkalikene ncisamu cabuumi,+
Pele majwi aabumpelenge alatyompya.
5 Mufwubafwuba ulanyansya lulayo lwabausyi,+
Pele muntu uucenjede ulazumina kululamikwa.+
6 Muŋanda yamululami muli lubono lunji,
Pele micelo yamubi imuletela buyo mapenzi.+
7 Milomo yabasongo ilamwaya luzyibo koonse-koonse,+
Pele moyo wabafwubafwuba tabusyi mboubede oobo pe.+
8 Cipaizyo cababi ncisesemyo kuli Jehova,+
Pele mupailo wabalulami ulamubotela.+
9 Inzila yamubi ncisesemyo kuli Jehova,+
Pele uyanda yooyo uusungwaala kutobela bululami.+
10 Lulayo ndubi kumuntu uuzwa munzila mbotu,+
Pele kufwumbwa uusulaika kusinswa uyoofwa.+
11 Cuumbwe abusena bwalunyonyooko zyoonse buyo zili antangalala kuli Jehova.+
Eelo kaka uliindilide caboola kukubona myoyo yabantu!+
12 Sikusampaula tamuyandi muntu uumululamika.+
Taunki pe kuyoobuzya kubantu basongo.+
13 Moyo uukkomene upa muntu kumweta-mweta,
Pele akaambo kamoyo uucisa muntu ulausa.+
14 Moyo wamuntu uumvwisya zintu nguuyandaula luzyibo,+
Pele mulomo wabantu batakwe maano ulya bufwubafwuba.+
15 Mazuba oonse aamuntu uupengede mabyaabi,+
Pele ooyo uulaamoyo uukkomene ulaapobwe ciindi coonse.+
16 Ncibotu kuba azintu zisyoonto buyo kumwi koyoowa Jehova+
Ikwiinda kuba alubono lunji kumwi kolibilika.+
17 Ncibotu kulya buyo cisyumani kakuli luyando+
Kwiinda kulya nyama yaŋombe iineneede kumwi kakuli lusulo.+
18 Muntu mukali ulabusya mazwanga,+
Pele ooyo uutafwambaani kunyema ulesya kubwesyanya.+
19 Nzila yamutolo ili mbuli lubaya lwamamvwa,+
Pele nzila yabalulami ili mbuli mugwagwa uubambidwe kabotu.+
20 Mwana musongo ulabakkomanisya bausyi,+
Pele muntu uutakwe maano ulabasampaula banyina.+
21 Muntu uutakwe maano ukkomanina bufwubafwuba,+
Pele mupampu weenda munzila iiluleme.+
22 Makanze alanyongana ikuti kakunyina kubandika,
Pele ikuti kakuli basikulaya banji kulaba kuzwidilila.+
23 Muntu ulakkomana napa bwiinguzi buluzi,+
Alimwi ijwi lyaambwa aciindi ceelede, eelo kaka ndibotu kapati!+
24 Inzila yabuumi isololela kulusumpuko kumuntu ulaabusongo,+
Kutegwa imulesye kuyaansi ku Cuumbwe.+
25 Jehova uyakwiimwaya ŋanda yabantu balisumpula,+
Pele uyoobamba munyinza wacilawo camukamufwu.+
26 Makanze aamuntu mubi alamusesemya Jehova,+
Pele majwi aakondelezya alasalala kulinguwe.+
27 Ooyo uujana mpindu munzila iitaluzi uleta mapenzi kuli bamuŋanda yakwe,+
Pele ooyo uusulaika makulo uyoozumanana kupona.+
28 Mululami ulazinzibala kuyeeya katanavwiila,+
Pele mulomo wababi ubbwa buyo zintu zibyaabi.
29 Jehova uli kule ababi,
Pele ulauswiilila mupailo wabalulami.+
30 Meso aamuntu uukkomene apa moyo kukondwa;
Mulumbe mubotu upa kuti mafwuwa abe anguzu.+
31 Muntu uuswiilila lulayo ilupa buumi
Ukkede akati kabasongo.+
32 Muntu woonse uukaka lulayo ukaka buumi bwakwe mwini,+
Pele ooyo uumvwa kulaigwa ulijanina maano.+
33 Kuyoowa Jehova kuyiisya muntu kuba musongo,+
Alimwi kulicesya kuletela bulemu.+