2 Bami
20 Kumazuba aayo Hezekiya wakaciswa kapati cakuti wakali afwaafwi kufwa.+ Musinsimi Isaya imwana wa Amozi wakaboola kulinguwe akumwaambila kuti, “Mboobu mbwaamba Jehova: ‘Kobapa malailile bamuŋanda yako, nkaambo yebo ulafwa; tokoopona pe.’”+ 2 Eelyo wakacenguluka, walanzya busyu bwakwe kubwaanda akutalika kupaila kuli Jehova kati: 3 “Akaka ndakukomba, O Jehova, koyeeya mbondali kweenda kumbele lyako cakusyomeka acamoyo woonse, akuti ndali kucita zintu zibotu mumeso aako.”+ Mpoonya Hezekiya wakatalika kulila kapati.
4 Lino Isaya katanasika kulubuwa lwaakati, ijwi lya Jehova lyakamusikila kaliti:+ 5 “Kopiluka ukaambile Hezekiya musololi wabantu bangu kuti, ‘Mboobu mbwaamba Jehova Leza wa Davida sikale wako: “Ndaumvwa mupailo wako. Ndaibona misozi yako.+ Ndilakuponya.+ Mubuzuba bwatatu uyakuunka kuŋanda ya Jehova.+ 6 Ndilakuyungizyila myaka iili 15 kumazuba aabuumi bwako, alimwi ndilakuvwuna yebo alimwi amunzi ooyu mumaanza aamwami wa Asuri,+ alimwi munzi ooyu ndilaukwabilila akaambo kazina lyangu alimwi akaambo ka Davida mubelesi wangu.”’”+
7 Mpoonya Isaya wakaamba kuti: “Amulete cibunge cankuyu ziyumu.” Aboobo bakacileta akumunanika acuute, eelyo buce-buce wakapona.+
8 Hezekiya wakabuzyide Isaya kuti: “Ino kuli citondezyo nzi+ citiitondezye kuti Jehova ulandiponya akuti mubuzuba bwatatu ndiyakuunka kuŋanda ya Jehova?” 9 Isaya wakaingula kuti: “Nceeci citondezyo kuzwa kuli Jehova kutondezya kuti Jehova ulacicita ncobeni eeci ncaamba: Sena ulayanda kuti cimvwule cuunke kumbele ntaamu zili kkumi amatantilo* naa cijokele musyule ntaamu zili kkumi amatantilo?”+ 10 Mpoonya Hezekiya wakati: “Ncuuba-uba kuti cimvwule cuunke kumbele ntaamu zili kkumi amatantilo, pele ikutali kuti cijokele musyule ntaamu zili kkumi amatantilo.” 11 Aboobo Isaya musinsimi wakakwiilila Jehova; eelyo wakapa kuti cimvwule icakali amatantilo aa Ahazi icakaselemukide kale cijokele musyule ntaamu zili kkumi amatantilo.+
12 Aciindi eeco imwami wa Babuloni, Berodaki-baladani mwana wa Baladani, wakatuma magwalo alimwi acipego kuli Hezekiya, nkaambo wakamvwa kuti Hezekiya wakalicisidwe.+ 13 Hezekiya wakabatambula* akubatondezya ŋanda yakwe yoonse oomo mwaakali kuyobweda zintu zyakwe ziyandisi+–nsiliva, ngolida, mafwuta aamabbona, amafwuta aambi mayandisi, zilwanyo zyakwe alimwi azintu zyoonse izyakali muziyobwedo zyakwe. Kunyina cintu nociba comwe Hezekiya ncaatakabatondezya muŋanda* yakwe amubulelo bwakwe boonse.
14 Kumane boobo Isaya musinsimi wakaboola ku Mwami Hezekiya akumubuzya kuti: “Ino baalumi aaba baamba nzi, alimwi ino bazwa kuli?” Aboobo Hezekiya wakaingula kuti: “Bazwa kucisi cakulamfwu, ku Babuloni.”+ 15 Mpoonya wakabuzya kuti: “Ino ncinzi ncobabona muŋanda yako?” Hezekiya wakaingula kuti: “Babona zintu zyoonse zili muŋanda* yangu. Kunyina cintu nociba comwe ncondatabatondezya muziyobwedo zyangu zyazintu ziyandisi.”
16 Mpoonya Isaya wakaambila Hezekiya kuti: “Komvwa jwi lya Jehova,+ 17 ‘Bona! Mazuba ayoosika, eelyo zintu zyoonse zili muŋanda* yako azyeezyo zyoonse nzyobakayobola bamauso kusikila buzuba obuno noziyootolwa ku Babuloni.+ Kunyina nociba comwe ciyoosyaala,’ mbwaamba Jehova. 18 ‘Alimwi bana bako bamwi mboyoolizyalila bayootolwa+ alimwi bayooba babelesi balemekwa muŋanda yabwami yamwami wa Babuloni.’”+
19 Mpoonya Hezekiya wakaambila Isaya kuti: “Ijwi lya Jehova ndyowaamba ndibotu.”+ Kumane wakayungizya kuti: “Cili kabotu ikuti kakunooli luumuno akuliiba* mumazuba aabuumi bwangu.”+
20 Makani oonse aakaindi aamba zya Hezekiya anguzu zyakwe zyoonse alimwi ambwaakapanga zyiba+ akagelo akuleta maanzi mumunzi+ alilembedwe mubbuku lyamakani aakaindi aamba zyamazuba aabami ba Juda. 21 Mpoonya Hezekiya wakoona abamausyi;+ eelyo Manase+ mwanaakwe wakaba mwami mubusena bwakwe.+