Jobu
23 Mpoonya Jobu wakaamba kuti:
3 Eelo kaka nindalikuzyi nkondikonzya kumujana Leza!+
Nindaunka kubusena nkwakkala.+
4 Nindatola kaambo kangu kulinguwe
Akuliiminina kwiinda mukumwaambila mbwaabede makani oonse;
5 Nindamvwisya mbwandiingula
Alimwi nindazibikkila maano nzyandaambila.
6 Sena naandikazya anguzu zyakwe zinji?
Peepe, masimpe naandiswiilila.+
7 Ooko mululami ulakonzya kubamba makani anguwe,
Alimwi ku Mubetesi wangu mulandu wangu niwamanina limwi mane kukabe kutamani.
8 Pele kuti ndaunka kujwe, tako pe;
Alimwi nendijokela, tandimujani pe.
9 Nabelekela kulumwensyi, tandikonzyi kumulanga;
Mpoonya usandukila kululyo, pele akwalo ooko tandimuboni pe.
10 Nokuba boobo, uliizyi kabotu nzila njindatozya.+
Amana kundisunka, ndilasalala mbuli ngolida yeengedwe.+
11 Maulu aangu atobela mikondo yakwe;
Ndeendela buyo munzila yakwe, tandileyi pe.+
12 Kunyina nindaleya kumilawo iizwa kumilomo yakwe.
Ndaabamba majwi aakwe+ kwiinda ambwayanda kuti ndicite.
13 Ikuti wakanza, ino nguni uukonzya kumukazya?+
Ikuti wayanda kucita cintu cimwi, ncobeni ulacicita.+
14 Ncobeni uyoozicita zyoonse nzyakanzide* kundicitila,
Alimwi uliyobwede zintu zinji zili boobu.
15 Nkakaambo kaako ndililibilikide akaambo kanguwe;
Kufwumbwa ciindi nendimuyeeya, ndilayoowa kapati.
16 Leza wandizwisya moyo,
Alimwi Singuzuzyoonse wandiyoosya.
17 Pele tiindaumuzyigwa amudima
Naa akaambo kamusinze uundivwumbide kumeso.