Tusimpi
26 Mbubonya caanda mbociteeleli ciindi cacilimo amvwula ciindi cakutebula,
Abwalo bulemu tabumweeleli pe muntu mufwubafwuba.+
2 Mbubonya kayuni mbokatatiji buyo kakunyina kaambo akamembya mbokatauluki buyo,
Akwalo kusinganya takubooli buyo kakunyina kaambo.*
3 Mukkwilo ubambilidwe bbiza, itomu libambilidwe mbongolo,+
Awalo musako ubambilidwe kuuma kumusana wabantu bafwubafwuba.+
4 Utavwiili mufwubafwuba kweelana abufwubafwuba bwakwe,
Kutegwa uteelani anguwe.*
5 Komuvwiila mufwubafwuba kweelana abufwubafwuba bwakwe,
Kutegwa ataliboni kucenjela.+
6 Mbubonya mbuli muntu uulemanika maulu aakwe alimwi uulicisa mwini*
Mbwabede muntu uubikka makani mumaanza aamufwubafwuba.
7 Mbubonya mbwaabede maulu aatebede* aamuntu uulemene,
Mbokabede akalo kasimpi kazwa kumilomo yabantu bafwubafwuba.+
8 Mbubonya mbuli kwaangilila bbwe kunkwisyo,
Mbocibede kumupa bulemu muntu mufwubafwuba.+
9 Mbubonya mbuli kasamu kamamvwa mujanza lyamukolwi,
Mbokabede kasimpi kazwa kumilomo yabantu bafwubafwuba.
10 Mbubonya mbuli sibuta uuyasa kufwumbwa cintu,*
Mbwabede muntu uunjizya mufwubafwuba naa basimweendanzila mulimo.
11 Mbubonya mbuli mubwa uupilukila kumalusi aakwe,
Mufwubafwuba ulainduluka kucita bufwubafwuba bwakwe.+
12 Sena wabona muntu ulibona kucenjela?+
Muntu mufwubafwuba ulalangilwa kucinca kwiinda nguwe.
13 Mutolo waamba kuti: “Kuli syuumbwa munzila,
Kuli syuumbwa wabutambo mubbuwa lyabuleya!”+
14 Cijazyo ciluujisi kuzungaana aawo mpocijisi,
Awalo mutolo uluujisi kusandauka aabulo bwakwe.+
15 Mutolo unjizya janza lyakwe mumutiba wacakulya,
Pele ulikatede kapati cakuti talileti kumulomo wakwe.+
16 Mutolo ulibona kucenjela
Kwiinda bantu bali ciloba bavwiila camaano.
17 Mbuli muntu uujata matwi aamubwa
Mbwabede muntu uulyeendela pele uunyema akaambo kamazwanga aatamujatikizyi.*+
18 Mbubonya mbuli muntu uusondokede uufwusa zilwanyo ziyaka mulilo, mivwi alimwi alufwu*
19 Mbwabede muntu uucenga mweenzinyina akwaamba kuti, “Ndali kusobana buyo!”+
20 Kuti kakunyina nkuni mulilo ulazima,
Alimwi ikuti kakunyina sikubejekezya mazwanga alamana.+
21 Mbuli malasya kumakala aamulilo ankuni kumulilo,
Mbwabede muntu sinkazi uubusya mazwanga.+
24 Muntu uusulide beenzinyina talitondezyi oobo amilomo yakwe,
Pele mumoyo wakwe usiside lweeno.
25 Nokuba kuti waambaula calubomba, utamusyomi pe,
Nkaambo mumoyo wakwe muli zintu zisesemya zili ciloba.*
26 Nokuba kuti lusulo lwakwe lulisisidwe alweeno,
Bubi bwakwe buyooyubununwa mumbungano.
27 Ooyo uusya cilindi uyoowida mulincico,
Alimwi kufwumbwa uukunkulisya bbwe, ndilyonya bbwe eelyo liyoomujokelela.+
28 Mulaka uubeja usulaika bantu mboupenzya,
Awalo mulomo uulumbaizya cakuupaupa ameso uleta lunyonyooko.+