Ezara

8 Lino mbaaba basilutwe baziinga zyabamausyi alimwi amulongo wamazyalani aabaabo ibakaunka andime kuzwa ku Babuloni muciindi cabulelo bwa Mwami Aritasasita:+ 2 kuzwa kubana ba Finehasi,+ Gerisomu; kuzwa kubana ba Itamara,+ Daniele; kuzwa kubana ba Davida, Hatusi; 3 kuzwa kubana ba Sekaniya akubana ba Parosi, Zekariya, wakali abaalumi balembedwe bali 150; 4 kuzwa kubana ba Pahati-moabu,+ Eliho-enai mwana wa Zerahiya, wakali abaalumi bali 200; 5 kuzwa kubana ba Zatu,+ Sekaniya mwana wa Jahazieli, wakali abaalumi bali 300; 6 kuzwa kubana ba Adini,+ Ebedi mwana wa Jonatani, wakali abaalumi bali 50; 7 kuzwa kubana ba Elamu,+ Jesaya mwana wa Ataliya, wakali abaalumi bali 70; 8 kuzwa kubana ba Sefatiya,+ Zebadiya mwana wa Mikayeli, wakali abaalumi bali 80; 9 kuzwa kubana ba Joabu, Obadiya mwana wa Jehieli, wakali abaalumi bali 218; 10 kuzwa kubana ba Bani, Selomiti mwana wa Josifiya, wakali abaalumi bali 160; 11 kuzwa kubana ba Bebai,+ Zekariya mwana wa Bebai, wakali abaalumi bali 28; 12 kuzwa kubana ba Azigadi,+ Johanani mwana wa Hakatani, wakali abaalumi bali 110; 13 kuzwa kubana ba Adonikamu,+ aabo ibakali bamamanino, mazina aabo ngaaya: Elifeleti, Jeieli a Semaya, bakali abaalumi bali 60; 14 eelyo kuzwa kubana ba Bigivai,+ Utai a Zabbudi, bakali abaalumi bali 70.

15 Ndakababunganya kumulonga uunka ku Ahava,+ eelyo twakakkala ooko mazuba otatwe. Pele nindakabalingula bantu abapaizi, tiindakajana mu Levi naba omwe pe. 16 Aboobo ndakatuma bantu kuyakwiita Eliezere, Arieli, Semaya, Elinatani, Jaribu, Elinatani, Natani, Zekariya a Mesulamu basilutwe, alimwi a Joyaribu a Elinatani ibakali bamayi. 17 Mpoonya ndakabalailila kuunka kuli Ido mweendelezi wabusena bwiitwa kuti Kasifiya. Ndakabaambila kuti bamwaambile Ido abanabokwabo babelesi baatempele* ibakali ku Kasifiya kuti batuletele babelesi baŋanda ya Leza wesu. 18 Mbwaanga janza libotu lya Leza wesu lyakali alindiswe, bakatuletela imwaalumi musongo uuzwa kubana ba Mali,+ muzyukulu wa Levi imwana wa Israyeli nkokuti Serebiya,+ bana bakwe alimwi abanabokwabo, antoomwe bakali 18; 19 alimwi a Hasabiya iwakali a Jesaya uuzwa kubana Merari,+ banabokwabo alimwi abana babo, antoomwe bakali 20. 20 Alimwi kwakali babelesi baatempele* ibali 220, aabo Davida abasilutwe mbobakabikka kuti kabagwasya ba Levi, boonse aaba bakasalwa kweelana amazina aabo.

21 Mpoonya ndakaambilizya kuti kube kuliimya kulya kumulonga wa Ahava kutegwa tulibombye kubusyu bwa Leza wesu, kuti tulombe busolozi kulinguwe mulweendo lwesu, abana besu alimwi azintu zyesu zyoonse. 22 Ndakalisenda kulomba basikalumamba abasimabbiza kumwami kuti batukwabilile kuli basinkondoma mulweendo, nkaambo twakaambila mwami kuti: “Janza libotu lya Leza wesu lili ali baabo boonse bamuyandaula+ kutegwa abacitile zibotu, pele nguzu zyakwe abukali bwakwe zilababukila aabo boonse ibamusiya.”+ 23 Aboobo twakaliimya kulya akulomba Leza wesu kujatikizya makani aaya, eelyo wakakuswiilila kulomba kwesu.+

24 Lino kuzwa akati kabapati babapaizi ndakasala baalumi bali 12, nkokuti Serebiya a Hasabiya+ antoomwe abanabokwabo bali 10. 25 Mpoonya ndakabapimina nsiliva, ngolida azibelesyo izyakasangwa kuŋanda ya Leza wesu,+ eezyo mwami, basikupa lulayo bakwe, basilutwe bakwe alimwi abana Israyeli boonse ibakajanika ooko nzyobakasanga. 26 Aboobo ndakapima akubapa matalenta* aansiliva aali 650, zibelesyo zyansiliva zili 100 zilema matalenta obilo, ngolida iilema matalenta aali 100, 27 tutiba twangolida tuli 20 itulema madariki* aali 1,000 azibelesyo zyobilo zyamukuba mubotu uuŋaima cakusalala-salala alimwi izyeebeka mbuli ngolida.

28 Mpoonya ndakabaambila kuti: “Nywebo mulasalala kuli Jehova,+ azyalo zibelesyo zilasalala, alimwi nsiliva angolida nzyakusanga zyakuliyandila kuli Jehova Leza wabamauso. 29 Amuzibambe kabotu kusikila mukazipime kubusyu bwabapati babapaizi, ba Levi abasilutwe baziinga zyabamausyi zyabana Israyeli mu Jerusalemu,+ mumaanda aakulida aamuŋanda ya Jehova.” 30 Eelyo bapaizi aba Levi bakabweza nsiliva, ngolida azibelesyo nzyobakapiminwa kutegwa bazitole ku Jerusalemu kuŋanda ya Leza wesu.

31 Mpoonya mubuzuba bwa 12 bwamwezi wakusaanguna+ twakanyamuka kuzwa kumulonga wa Ahava+ kugama ku Jerusalemu, eelyo janza lya Leza wesu lyakali andiswe, aboobo wakatuvwuna kumaanza aabasinkondoma alimwi akuli baabo ibakali kutuyubilila munzila. 32 Aboobo twakasika ku Jerusalemu+ akukkala ooko mazuba otatwe. 33 Mpoonya mubuzuba bwane, twakapima nsiliva, ngolida azibelesyo muŋanda ya Leza wesu+ akuzipa mumaanza aa Meremoti+ imwana wa mupaizi Urija, iwakali a Eleazara mwana wa Finehasi. Lino aaba bakali a Jozabadi+ mwana wa Jeshua a Noadiya mwana wa Binui+ iba Levi. 34 Zyoonse zyakabalwa akupimwa kumane bulemu bwazyo boonse bwakalembwa. 35 Aabo ibakazwa mubuzike bakatuulila Leza wa Israyeli zipaizyo zyuumpwa, nkokuti bapoho bali 12 + babana Israyeli boonse, bagutu bali 96,+ bagutu bacili bana ibali 77 abajembwe bali 12+ ibacituuzyo cazibi; zyoonse eezyi zyakali cituuzyo cuumpwa kuli Jehova.+

36 Mpoonya twakapa milawo yamwami+ kubaleli bazisi* bamwami abeendelezi bacooko cili Mutala aa Mulonga,*+ eelyo bakagwasya bantu aŋanda ya Leza mwini-mwini.+