Isaya
23 Ngaaya makani mapati aajatikizya Turo:+
Amulile, nywebo nomato aaku Tarisi!+
Nkaambo cito canyonyoonwa; tacikwe manjililo.
Mulumbe ooyu baumvwida kucisi ca Kitimu.+
2 Amuumune nywebo nomukkala mucilawo cakunkomwe yalwizi.
Basimakwebo bazwa ku Sidoni+ aabo ibazabuka lwizi bamuvwubya.
3 Maila* aazwa ku Sihori*+ akainda aamaanzi manji,
Butebuzi bwamulonga wa Nile, mali ngajana,
Zyakaleta mpindu yamasi.+
4 Kofwa nsoni, O Sidoni, omatijilo aakulwizi,
Nkaambo lwizi lwaamba kuti:
5 Mbubonya mbucakabede nobakamvwa makani aajatikizya Egepita,+
Bantu bayoopenga kapati baakumvwa makani aajatikizya Turo.+
6 Amuzabukile ku Tarisi!
Amulile nywebo nomukkala mucilawo cakunkomwe yalwizi!
7 Sena ooyu ngomunzi wanu uulya wakali kusekelela kuzwa kaindi, kuzwa kumazuba anguwo aakaindi?
Maulu aanguwo akali kuusisya kulamfwu kuti ukakkale.
8 Ino nguni wakanza zintu eezyi kujatikizya Turo,
Sikupa misini,
Uujisi basimakwebo ibakali basilutwe,
Uujisi basambazi ibakali kulemekwa munyika yoonse?+
9 Jehova wamakamu ngonguwe wakanza zintu eezyi,
Kuti amanizye kulidunda kwakwe nkwacita akaambo kabweebesi bwakwe boonse,
Kuti anyansye bantu boonse ibakali kulemekwa munyika yoonse.+
10 Kodabula mucisi cako mbuli Mulonga wa Nile, omwana musimbi waku Tarisi.
Cito camato taciciko pe.+
11 Watandabika janza lyakwe atala aalwizi;
Wazungaanya mami.
Jehova walailila kuti matijilo aa Fonike anyonyoonwe.+
12 Alimwi waamba kuti: “Tokasekeleli kabili,+
Yebo oodyaamininwa, onakalindu mwana musimbi waku Sidoni.
Nyamuka, uzabukile ku Kitimu.+
Akwalo ooko tokaliibi pe.”
13 Amubone! Icisi caba Kasidi.+
Aaba mbabantu, ikutali Asuri+ pe,
Mbabakapa kuti ube busena bwabanyama beendeenda mucimpayuma.
Bakaimika ngazi zyabo zyakusinkila munzi;
Bakakolomona ngazi zyanguwo ziyumu,+
Bapa kuti ube citantaala buyo.
14 Amulile nywebo nomato aaku Tarisi,
Nkaambo matijilo aanu anyonyoonwa.+
15 Mubuzuba oobo, Turo uyoolubwa kwamyaka iili 70,+ mbubonya mbuli mazuba aamwami omwe. Yaakumana myaka iili 70 ciyoomucitikila Turo mbubonya mbuli mulwiimbo lwamuvwuule lwakuti:
16 “Bweza kantimbwa, kouzinguluka munzi, yebo omuvwuule wakalubwa.
Kokalizya kabotu kantimbwa kako;
Koimba nyimbo zinji,
Kutegwa bakakuyeeye.”
17 Yaakumana myaka iili 70 Jehova uyoomubikkila maano Turo, eelyo walo uyoojokela kukubbadelwa akukucita buvwuule amami oonse aali munyika yaansi. 18 Pele mpindu yakwe alimwi amali nganoobbadelwa ziyooba cintu cisalala kuli Jehova. Tazikayobolwi pe, nokuba kubambwa, nkaambo mali nganoobbadelwa ayooba aabaabo bakkala kumbele lya Jehova, kutegwa kabalya akukkuta alimwi akusama zisani zibotu.+