Isaya
63 Ino nguni ooyu uuboola kuzwa ku Edomu,+
Ooyu uusamide zisani zimweka* kuzwa ku Bozira,+
Inzya ooyu uusamide zisani zyabulemu,
Uulifwoola anguzu zyakwe zinji kapati?
“Ndime, mebo nendaambaula cabululami,
Mebo nendijisi nguzu zinji kapati zyakufwutula.”
2 Ino nkaambo nzi zyakusama zyako ncozisubila,
Alimwi nkaambo nzi zisani zyako ncozili mbuli zyamuntu uulyatauka mucikandilo camisaansa?+
3 “Ndalikulyatauka mucikandilo cakupangila waini kandili ndelikke.
Kunyina muntu uuzwa akati kabantu walaandime.
Ndaluujisi kubalyatauka kandikalede,
Alimwi ndaluujisi kubadyabbaula kandinyemede.+
Bulowa bwabo bwatapaukila azisani zyangu,
Eelyo zyakusama zyangu zyoonse zyabija.
4 Nkaambo buzuba bwakupa cisubulo buli mumoyo wangu,+
Awalo mwaka wabantu bangu banunwidwe wasika.
5 Ndakalanga, pele kwakanyina mugwasyi;
Ndakalamwa kuti kwakanyina naba omwe wakali kugwasyilizya.
6 Ndakabalyatauka bantu kandikalede,
Ndakabapa kukolwa kandinyemede+
Alimwi bulowa bwabo ndakabutila ansi.”
7 Ndilaamba kujatikizya milimo yaluyando lutamani lwa Jehova,
Imilimo ya Jehova iitembaulika,
Akaambo kazintu zyoonse nzyaatucitila Jehova,+
Izintu zinjaanji zibotu nzyaacitila bamuŋanda ya Israyeli,
Kweelana aluse lwakwe alimwi aluyando lwakwe lutamani ilupati.
8 Nkaambo wakaamba kuti: “Masimpe mbantu bangu, mbana ibatakaleki kusyomeka.”+
Aboobo wakaba Mufwutuli wabo.+
9 Mumapenzi aabo oonse wakali kupenga mumoyo awalo.+
Aboobo mutumwa wakwe uumugeme* wakabafwutula.+
Wakabanununa akaambo kaluyando alubomba lwakwe,+
Alimwi wakababweza akubanyamuna mazuba oonse aakaindi.+
10 Pele balo bakazanga+ alimwi bakapenzya muuya wakwe uusalala.+
11 Mpoonya bakayeeya mazuba aakaindi,
Mazuba aa Musa mubelesi wakwe:
“Ino uli kuli ooyo wakabazabusya lwizi+ antoomwe abeembezi babutanga bwakwe?+
Ino uli kuli ooyo wakabikka muuya wakwe uusalala mulinguwe?+
12 Ino uli kuli ooyo wakapa kuti janza lyakwe lyabulemu libe kujanza lyalulyo lya Musa,+
Ooyo wakaandaanya maanzi kumbele lyabo+
Kutegwa alipangile zina litamani,+
13 Inzya ooyo wakabainzya mumaanzi manji aakupaika,*
Cakuti bakeenda kakunyina kuwa,
Mbubonya mbuli bbiza mucibanda?*
14 Mbubonya mbociba eelyo banyama bavwubwa nobaselemukila mucibanda camukkuti,
Awalo muuya wa Jehova wakabapa kulyookezya.”+
15 Langa kuzwa kujulu ubone
Langa kuzwa kubusena bwako busumpukide busalala alimwi bulemekwa.*
Ino buli kuli busungu bwako anguzu zyako,
Kugutuma kwamoyo wako uuzwide lubomba,+ alimwi aluse lwako?+
Zintu eezyi zyaleka kutondezyegwa kulindime.
16 Nkaambo yebo nduwe Taateesu;+
Nokuba kuti Abrahamu inga katatuzyi
Awalo Israyeli inga watuluba,
Yebo, O Jehova, nduwe Taateesu.
Munununi wesu wakaindi ndezina lyako.+
17 Nkaambo nzi, O Jehova, ncotulekela* kuti tuleye kuzwa munzila zyako?
Nkaambo nzi ncolekela* myoyo yesu kuti iyume, cakuti tatukuyoowi?+
Kopiluka, akaambo kababelesi bako,
Imisyobo yalukono lwako.+
18 Bantu bako basalala bakalilujisi lukono kwakaindi kaniini buyo.
Basinkondoma balyatauka cikombelo cako.+
19 Calampisya ciindi ncotwali mbuli bantu mbowatakali kweendelezya,
Mbuli baabo batakali kwiitwa azina lyako.