1 Makani
15 Davida wakazumanana kuliyakila maanda mu Munzi wa Davida, alimwi wakabamba busena bwa Bbokesi lya Leza mwini-mwini akuliimikila tente.+ 2 Mpoonya Davida wakati: “Taakwe muntu uumbi weelede kunyamuna Bbokesi lya Leza mwini-mwini ccita buyo ba Levi, nkaambo mbambabo Jehova mbaakasala kunyamuna Bbokesi lya Jehova akumubelekela lyoonse.”+ 3 Kumane Davida wakabunganya bana Israyeli boonse ku Jerusalemu kuti balete Bbokesi lya Jehova kubusena bwalyo mbwaakalibambilide.+
4 Davida wakabunganya lunyungu lwa Aroni+ aba Levi:+ 5 kuzwa kubana Kohati, kwakali Urieli silutwe abanabokwabo bali 120; 6 kuzwa kubana Merari, kwakali Asaya+ silutwe abanabokwabo bali 220; 7 kuzwa kubana Gerisomu, kwakali Joeli+ silutwe abanabokwabo bali 130; 8 kuzwa kulunyungu lwa Elizafana,+ kwakali Semaya silutwe abanabokwabo bali 200; 9 kuzwa kulunyungu lwa Hebroni, kwakali Elieli silutwe abanabokwabo ibali 80; 10 kuzwa kulunyungu lwa Uzieli,+ kwakali Aminadabu silutwe abanabokwabo bali 112. 11 Kuyungizya waawo, Davida wakaita Zadoki+ a Abiyatara+ ibapaizi alimwi aba Levi, Urieli, Asaya, Joeli, Semaya, Elieli a Aminadabu, 12 alimwi wakabaambila kuti: “Nywebo ndendinywe basilutwe baziinga zyabamausyi baba Levi. Amulisalazye nywebo abanabokwanu akuleta Bbokesi lya Jehova Leza wa Israyeli kubusena mbondakalibambila. 13 Mbokunga tiimwakacita boobo ciindi cakusaanguna,+ bukali bwa Jehova Leza wesu ncobwakatusikila,+ nkaambo tiitwakavwuntauzya kutegwa tucite kweelana amalailile.”+ 14 Aboobo bapaizi aba Levi bakalisalazya kutegwa balete Bbokesi lya Jehova Leza wa Israyeli.
15 Mpoonya ba Levi bakanyamuna Bbokesi lya Leza mwini-mwini amagwezyo aabo kubelesya minkulwa yalyo,+ mbubonya Musa mbwaakalailila kweelana ajwi lya Jehova. 16 Mpoonya Davida wakaambila basilutwe baba Levi kuti basale banabokwabo ibaimbi kuti baimbe cakusekelela kababelesya zibelesyo eezyi zyakwiimbya: tuntimbwa,+ miyuwa+ azibelesyo zimbi zyakwiimbya.
17 Aboobo ba Levi bakasala Hemani+ mwana wa Joeli, alimwi kuzwa kubanabokwabo bakasala Asafu+ mwana wa Berekiya; eelyo kuzwa kubanabokwabo ibana Merari, bakasala Etani+ mwana wa Kusaya. 18 Antoomwe ambabo bakasala banabokwabo bankamu yabili,+ Zekariya, Beni, Jaazieli, Semiramoti, Jehieli, Uni, Eliabu, Benaya, Maaseya, Matitiya, Elifelehu, Mikineya, Obedi-edomu a Jeieli, ibalindizi bamilyango. 19 Basikwiimba ba Hemani,+ Asafu+ a Etani, mbabakali kulizya miyuwa yamukuba;+ 20 Zekariya, Azieli, Semiramoti, Jehieli, Uni, Eliabu, Maaseya a Benaya, mbabakali kulizya zyakwiimbya zityunidwe kuti kazilila Alamoti;*+ 21 Matitiya,+ Elifelehu, Mikineya, Obedi-edomu, Jeieli a Azaziya, mbabakali kulizya tuntimbwa tutyunidwe kuti katulila Seminiti,*+ kuti kabasololela baimbi. 22 Kenaniya+ silutwe waba Levi wakali kulanganya mulimo wakunyamuna bbokesi, nkaambo wakalicibwene kapati, 23 Berekiya a Elikana bakali balindizi ba Bbokesi. 24 Ibapaizi ba Sebaniya, Josafati, Netaneli, Amasai, Zekariya, Benaya a Eliezere bakali kulizisya myeembo kumbele lya Bbokesi lya Leza mwini-mwini,+ alimwi Obedi-edomu a Jehiya bakali kubeleka kabali balindizi ba Bbokesi.
25 Mpoonya Davida abaalu babana Israyeli abasilutwe babantu bali zyuulu bakeenda antoomwe ambabo kuyooleta bbokesi lyacizuminano ca Jehova kuzwa kuŋanda ya Obedi-edomu+ kumwi kabayaabusekelela.+ 26 Ciindi Leza mwini-mwini naakagwasya ba Levi ibakali kunyamuna bbokesi lyacizuminano ca Jehova, bakatuula bapoho bacili bana ibali ciloba alimwi abagutu bali ciloba.+ 27 Davida wakasamide jansi lyamulembo mubotu, abalo ba Levi boonse ibakanyamwide Bbokesi mbobakasamide oobo, antoomwe abasikwiimba a Kenaniya sikulanganya mulimo wakunyamuna zintu alimwi abasikwiimba; Davida wakalisamide akabaki kabupaizi kamulembo muuba-uba.+ 28 Bana Israyeli boonse bakalileta bbokesi lyacizuminano ca Jehova kumwi kabayaaboongolola cakukondwa+ akulizya myeembo yamisyobo-misyobo,+ miyuwa, tuntimbwa azibelesyo zimbi zyakwiimbya.+
29 Pele bbokesi lyacizuminano ca Jehova nilyakasika mu Munzi wa Davida,+ Mikala+ imwana wa Saulo wakasondela awindo akubona Mwami Davida kasotauka akusekelela; kumane wakatalika kumusampaula mumoyo wakwe.+