2 Samuele

14 Lino Joabu mwana wa Zeruya+ wakazyiba kuti moyo wamwami uli kuli Abisalomu.+ 2 Aboobo Joabu wakatuma muntu ku Tekowa+ kuyakwiita mukaintu musongo akumwaambila kuti: “Kolicengeezya mbuli muntu uujisi malila akusama zisani zyamalila alimwi utanani mafwuta.+ Kocita mbuli mukaintu wali kulila mufwu kwaciindi cilamfwu. 3 Mpoonya weelede kuunka kumwami akumwaambila majwi aaya.” Aboobo Joabu wakamubikka majwi mukanwa.*

4 Lino mukaintu muna Tekowa wakaunka kumwami akukotama mpoonya wakavwuntama ansi akwaamba kuti: “Kondigwasya omwami!” 5 Mpoonya mwami wakati kulinguwe: “Ino ujisi penzi nzi?” Mukaintu ooyo wakati: “Ndili mukamufwu; mulumaangu wakafwa. 6 Alimwi mebo ndemubelesi wako ndakajisi bana basankwa bobilo, eelyo bana aaba bakatalika kulwana musyokwe. Kwakanyina sikubavwuna, mpoonya umwi wakauma mweenzinyina akumujaya. 7 Lino mukwasyi woonse wandibukila ndemubelesi wako alimwi baamba kuti, ‘Komuleta ooyo wakajaya mwanookwabo kutegwa tumujaye awalo akaambo kamwanookwabo ngwaakajaya+ nokuba kuti caamba kujaya simulyazina!’ Aboobo balazima kkala lyangu lyamulilo lyamamanino eelyo liceede* akutasiila mulumaangu zina noluba lunyungu anyika.”

8 Mpoonya mwami wakaambila mukaintu kuti: “Koya kuŋanda yako, mebo ndilaalanganya makani aaya.” 9 Eelyo mukaintu muna Tekowa wakati kumwami: “Omwami simalelaangu, mulandu aube alindime alimwi aaŋanda yataata, pele kumwami akucuuno cakwe cabwami kutabi mulandu.” 10 Mpoonya mwami wakati: “Ikuti naa umwi azumanane kukubuzya makani aaya umulete kulindime, eelyo takakupenzyi limbi pe.” 11 Pele mukaintu wakati: “Akaka omwami, koyeeya Jehova Leza wako, kutegwa sikupilusya mulandu wabulowa+ atazumanani kuleta mapenzi akuti batamujayi mwanaangu.” Kumane mwami wakati: “Masimpe Jehova mbwali muumi,+ kunyina kasusu nokaba komwe kamwanaako ikayoowida ansi.” 12 Mpoonya mukaintu wakati: “Omwami simalelaangu, kondileka ndemubelesi wako ndaambe alimwi kulinduwe.” Aboobo mwami wakati: “Koamba!”

13 Eelyo mukaintu wakati: “Ino nkaambo nzi ncooyeeya kucita cintu cili boobu kujatikizya bantu ba Leza?+ Mwami naamba boobu, ulipa mulandu alikke nkaambo tapilusyi mwanaakwe uutandidwe.+ 14 Ncobeni tuyoofwa akuba mbuli maanzi aatilwa ansi, aatakonzyi kuyolwa. Pele Leza takajayi muntu alimwi ulalanga-langa twaambo imuntu ooyo watandwa ncateelede kutandilwa limwi kulinguwe. 15 Lino ndaboola kwaamba makani aaya kumwami simalelaangu nkaambo bantu bandiyoosya. Aboobo ndemubelesi wako ndakayeeya kuti, ‘Andimwaambile mwami. Ambweni mwami inga wabweza ntaamu kukulomba kwamuzike wakwe. 16 Mwami ulakonzya kuswiilila akundivwuna ndemuzike wakwe kujanza lyamwaalumi uuyanda kundinyonyoona mebo antoomwe amwanaangu omwe buyo akutunyanga lukono ndwaakatupa Leza.’+ 17 Mpoonya ndemubelesi wako ndakati, ‘Majwi aamwami simalelaangu anduumbulizye,’ nkaambo mwami simalelaangu uli mbuli mungelo wa Leza mwini-mwini, iwaandaanya cibotu acibi. Jehova Leza wako abe anduwe.”

18 Lino mwami wakaambila mukaintu ooyu kuti: “Utandisisi cintu cili coonse pe mumakani ngondiyanda kukubuzya.” Eelyo mukaintu wakati: “Kondibuzya omwami simalelaangu.” 19 Mpoonya mwami wakabuzya kuti: “Sena ngu Joabu wakwaambila makani aaya oonse?”+ Mukaintu wakati: “Masimpe mbubonya mboli muumi omwami simalelaangu, makani ngowaamba ngamasimpe,* nkaambo mubelesi wako Joabu ngonguwe wakandilailila akundaambila ndemubelesi wako makani aaya oonse. 20 Mubelesi wako Joabu wacita oobu kutegwa uzibone munzila iimbi zintu, pele simalelaangu musongo mbuli mungelo wa Leza mwini-mwini, alimwi ulizyi zyoonse zicitika munyika.”

21 Mpoonya mwami wakaambila Joabu kuti: “Mbubo, ndilacita oobo.+ Koya ukamulete mulombe Abisalomu.”+ 22 Kumane Joabu wakakotama mpoonya wakavwuntama ansi akulumba mwami. Joabu wakati: “Omwami simalelaangu, sunu mubelesi wako wazyiba kuti wamufwida luzyalo nkaambo wacita kweelana akulomba kwamubelesi wako.” 23 Mpoonya Joabu wakanyamuka akuunka ku Gesuri,+ eelyo wakamuleta Abisalomu ku Jerusalemu. 24 Pele mwami wakati: “Kaindilila kuŋanda yakwe, atabooli kundibona pe.” Aboobo Abisalomu wakaunka kuŋanda yakwe alimwi tanaakabonana amwami.

25 Lino mu Israyeli yoonse, taakwe mwaalumi wakali kulumbaizyigwa akaambo kakubota kwakwe mbuli Abisalomu. Tanaakajisi kampenda kuzwa kuzituta kusikila kumutwe. 26 Naakali kwaagela masusu aakwe–wakali kwaagela kumamanino aamwaka uuli woonse nkaambo akali kumulemena–akali kulema masyekeli aali 200 * kweelana abbwe lyakweelesya lyamwami.* 27 Lino Abisalomu wakazyala bana basankwa botatwe+ amusimbi omwe, wazina lya Tamara. Wakali mukaintu mubotu kapati.

28 Abisalomu wakazumanana kukkala mu Jerusalemu myaka yobilo iikkwene, pele tanaakabonana amwami pe.+ 29 Aboobo Abisalomu wakatuma bantu kuyakwiita Joabu kuti amutume kumwami, pele tanaakaunka kulinguwe. Mpoonya wakamwiita lwabili, pele alimwi wakakaka kuunka. 30 Kumane wakaambila babelesi bakwe kuti: “Joabu ulijisi muunda wabbaale uubambene amuunda wangu. Kamuya mukawuumpe.” Aboobo babelesi ba Abisalomu bakawuumpa muunda. 31 Abone boobo Joabu wakanyamuka akuunka kuŋanda ya Abisalomu akumubuzya kuti: “Ino nkaambo nzi babelesi bako ncobawuumpila muunda wangu?” 32 Aboobo Abisalomu wakaingula Joabu kuti: “Bona, ndakatuma mulomo wakuti, ‘Boola okuno kutegwa ndikutume kumwami kuyakwaamba kuti: “Ino ndakaboolela nzi kuzwa ku Gesuri?+ Nicakabota nindakakkala nkukonya okuya. Lino ndiyanda kubonana amwami, aIimwi ikuti naa ndili amulandu, nkokuti aandijaye buyo.”’”

33 Kumane Joabu wakaunka kuyakwaambila mwami. Mpoonya mwami wakaita Abisalomu, eelyo wakaunka kumwami akuvwuntama ansi kubusyu bwakwe. Kumane mwami wakamumyonta Abisalomu.+