Isaya
46 Beli wakotama,+ Nebo woongomana.
Mituni yabo yabikkwa amisana yabanyama, banyama banyamuna ntundu,+
Yaba mbuli zibbudu zilemena banyama bakatede.
2 Boongomana akukotama antoomwe;
Tabakonzyi kwiivwuna mikuli* eeyo pe,
Alimwi balo beni batolwa mubuzike.
3 “Amundiswiilile, nywebo nobamuŋanda ya Jakobo, anywebo nyoonse nomusyeede muŋanda ya Israyeli,+
Nywebo mbondali kugwasya kuzwa nomwakazyalwa ambondali kunyamuna kuzwa nomwakazwa mwida.+
4 Kusikila mukacembaale, ndinooli ngomunya;+
Kusikila mukatube mvwi, mebo ndilazumanana kumuyumuna.
Mbubonya mbondali kucita, ndilamunyamuna, ndilamuyumuna akumuvwuna.+
5 Ino nguni ngomunga mwandikozyanisya anguwe naa kundeelanya nokuba kundeezyanya,+
Kutegwa tweelane anguwe?+
6 Nkobali aabo batuntumuna ngolida kuzwa mumpotomona zyabo;
Bapima nsiliva aacikkelo.
Babbadela mufwuzi, eelyo walo upanga leza kuli zyeezyi.+
Mpoonya balakotama, inzya, balamukomba.*+
7 Balamunyamuna leza ooyo amagwezyo aabo;+
Balamubweza akumubikka mubusena bwakwe, eelyo wiima buyo.
Tasweni pe kuzwa abusena mpabede.+
Bantu balamukwiilila, pele walo tabavwiili pe;
Takonzyi kuvwuna muntu uuli woonse kumapenzi.+
8 Amuyeeye makani aaya, mube basicamba.
Amwaabikke mumoyo, nywebo nobasikusotoka milawo.
9 Amuyeeye zintu zyakusaanguna zyakaindi kapati,
Kuti mebo ndime Leza, taakwe uumbi pe.
Ndime Leza, taakwe uumbi uuli mbuli ndime.+
10 Kuzwa kumatalikilo ndaambila limwi ciyoocitika kumbele,
Alimwi kuzwa kaindi ndaambila limwi zintu zitanacitika.+
11 Ndilaita muyuni uulya nyama kuzwa kumapaswido aazuba,*+
Ndilaita muntu kuzwa kunyika yakulamfwu kuti azoozuzikizye makanze* aangu.+
Ndaamba, eelyo ndiyoocicita.
Ndakanza, eelyo ndiyoocizuzikizya.+
12 Amundiswiilile, nywebo nomutanyoneki,*
Nywebo nomuli kule kapati abululami.
Mu Ziyoni ndiyoopa lufwutuko, ndiyoopa Israyeli bulemu bwangu.”+