Levitiko
10 Lino bana ba Aroni, ba Nadabu a Abihu+ bakabweza akuleta umwi aumwi kakunyamwida mulilo kakwe akubikka tununkilizyo+ alintuto. Mpoonya bakatalika kuumpa tununkilizyo tutazumizyidwe+ kubusyu bwa Jehova, eeco ncaatakabalailila kucita. 2 Mpoonya kwakaboola mulilo kuzwa kuli Jehova akubaumpa,+ aboobo bakafwa kubusyu bwa Jehova.+ 3 Kumane Musa wakati kuli Aroni: “Mboobu mbwaamba Jehova, ‘Ndiyoosalazyigwa kuli baabo bali afwaafwi andime,+ alimwi ndiyoolemekwa kumeso aabantu boonse.’” Mpoonya Aroni wakaumuna wi.
4 Aboobo Musa wakaita Misayeli a Elizafana, ibana ba Uzieli,+ usyi Aroni musyoonto, akubaambila kuti: “Amuboole afwaafwi mubweze banabokwanu kuzwa mulubuwa lwatente lisalala, mubatole anze aankambi.” 5 Aboobo bakaboola akubabweza baalumi aabo kabacisamide zisani zyabo zyabupaizi akubatola anze aankambi, mbubonya Musa mbwaakabaambila.
6 Kumane Musa wakaambila Aroni abana bakwe bamwi, Eleazara a Itamara kuti: “Mutaleki kukamuna masusu aanu, alimwi mutazapuli zisani zyanu+ kutegwa mutafwi akuti Leza atakalalili mbungano yoonse. Banabokwanu bana Israyeli boonse bayoobalila aabo Jehova mbaanyonyoona amulilo. 7 Tamweelede kuzwa kumulyango watente lyakuswaanganina kutegwa mutafwi, nkaambo mafwuta aakunanika aa Jehova ali alindinywe.”+ Aboobo bakacita mbubonya mbuli Musa mbwaakaambide.
8 Mpoonya Jehova wakati kuli Aroni: 9 “Toyelede kunywa waini naa zyakunywa zimwi zikola, yebo abana bako nomunjila mutente lyakuswaanganina+ kutegwa mutafwi. Ooyu mulawo walyoonse alyoonse mumazyalani aanu. 10 Oobu mbomweelede kwaandaanya cintu cisetekene acintu cisesemya, cintu cisalala acintu cisofweede,+ 11 akuti muyiisye bana Israyeli milawo yoonse Jehova njaakabaambila kwiinda muli Musa.”+
12 Mpoonya Musa wakaambila Aroni abana bakwe bakasyaala, Eleazara a Itamara kuti: “Amubweze cituuzyo camaila icakasyaala kuzituuzyo zya Jehova zyuumpwa, mucilye kacili cinkwa citajisi bumena afwaafwi acipaililo,+ nkaambo ncintu cisalalisya.+ 13 Mweelede kucilida mubusena busalala,+ nkaambo ncaabilo cako abana bako kuzwa kuzituuzyo zya Jehova zyuumpwa, nkaambo oobu mbondakalaililwa. 14 Muyoolya kaango kacituuzyo cakuyumba amweendo wacaabilo cisetekene+ mubusena busalala, yebo alimwi abana bako basankwa abasimbi mboli limwi,+ nkaambo zintu eezyi zyapegwa kulinduwe akubana bako basankwa kazili zyaabilo zyanu kuzwa kuzipaizyo zyalumvwano zyabana Israyeli. 15 Bayooleta mweendo wacaabilo cisetekene akaango kacituuzyo cakuyumba antoomwe azituuzyo zyamafwuta zyuumpwa, aboobo bayootuula cituuzyo cakuyumba kubusyu bwa Jehova; alimwi ciyooba caabilo cako abana bako+ lyoonse alyoonse mbubonya Jehova mbwaalailila.”
16 Musa wakaiyandaula mpongo yacituuzyo cazibi,+ pele wakajana kuti yaumpwa. Aboobo wakakalalila Eleazara a Itamara, bana ba Aroni ibakasyaala akubaambila kuti: 17 “Ino nkaambo nzi ncomwatalida cituuzyo cazibi mubusena busalala,+ mbwaanga ncintu cisalalisya alimwi wamupa mukuli wakuti munyamune zibi zyambungano kutegwa mumanye milandu yabo kuli Jehova? 18 Amubone! Bulowa bwaco tiibwaletwa mubusena busalala.+ Mubwini, mwaleelede kucilya mubusena busalala, mbubonya mbondakalaililwa.” 19 Amvwe boobo Aroni wakaingula Musa kuti: “Bona! Sunu batuula cituuzyo cabo cazibi acituuzyo cabo cuumpwa kubusyu bwa Jehova,+ nokuba boobo zintu eezyi zyacitika kulindime. Ikuti nindalya cituuzyo cazibi sunu kanduuside, sena nicamubotela Jehova?” 20 Musa naakamvwa boobo, wakakazuminizya kaambo aaka.