1 Batesalonika

1 Mebo nde Paulo, nendili antoomwe a Siluvano*+ alimwi a Timoteyo+ ndalembela ndinywe nombungano ya Batesalonika iikamantene a Leza Taateesu alimwi a Mwami wesu Jesu Kristo kuti:

Amube aluzyalo lwa Leza alimwi aluumuno.

2 Lyoonse tulamulumba Leza notumubandauka nywebo nyoonse mumipailo yesu,+ 3 nkaambo tatuleki kuyeeya mulimo wanu walusyomo akubeleka kwanu kwaluyando alimwi akuliyumya kwanu akaambo kabulangizi mbomujisi+ mu Mwami wesu Jesu Kristo kumbele lya Leza wesu alimwi Taateesu. 4 Nkaambo tulizyi, bakwesu nomuyandwa a Leza, kuti walo nguwakamusala, 5 nkaambo makani mabotu ngotukambauka tanaakamusikila amajwi buyo pe, pele akalaanguzu, akali kucitwa munguzu zyamuuya uusalala alimwi akamupa lusyomo luyumu, mbubonya mbomuzyi mbotwakali kucita kutegwa mugwasyigwe. 6 Aboobo mwakaiya ndiswe+ alimwi a Mwami wesu,+ mbwaanga mwakazumina jwi lya Leza akukondwa ikuzwa kumuuya uusalala nokuba kuti mwakajisi mapenzi manji kapati,+ 7 eelyo mwakaba cikozyanyo kubasyomi boonse mu Makedoniya alimwi amu Akaya.

8 Masimpe ngakuti, ijwi lya Jehova* ilyakazwa kulindinywe tiilyakamvwugwa buyo mu Makedoniya amu Akaya mulikke pe, pele ilusyomo lwanu muli Leza lwamwaika mumasena oonse,+ cakuti swebo kunyina cintu cili coonse ncotuceelede kwaamba pe. 9 Nkaambo beni tabaleki kuluula mbotwakayaana andinywe ciindi cakusaanguna alimwi ambomwakafwutatila mituni+ yanu akusandukila kuli Leza kuti mulitakate kubelekela Leza uupona alimwi mwini-mwini, 10 akulindila Mwanaakwe uuboola kuzwa kujulu,+ ooyo ngwaakabusya kuzwa kubafwu, nkokuti Jesu, ooyo uutuvwuna kubukali oobo buboola.+