Babetesi

20 Mpoonya bana Israyeli boonse bakazwa ku Dani+ kusikila ku Beere-seba alimwi akuzwa kucisi ca Gileadi,+ eelyo mbungano yoonse yakabungana calukamantano* kubusyu bwa Jehova ku Mizipa.+ 2 Aboobo basilutwe boonse babantu alimwi abasilutwe bamisyobo yoonse ya Israyeli bakaima mumbungano yabantu ba Leza mwini-mwini, basikalumamba bali 400,000 beenda amaulu ibalwana nkondo amapanga.+

3 Bana Benjamini bakamvwa kuti bana Israyeli baunka ku Mizipa.

Mpoonya bana Israyeli bakati: “Kotwaambila, ino cintu eeci cibi kapati cakacitika buti?”+ 4 Kumane mu Levi,+ imulumi wamukaintu wakajaigwa wakaingula kuti: “Mebo amwanakasuwa wangu twakasika ku Gibea+ mucisi ca Benjamini kuti toone nkuko. 5 Eelyo bantu bakkala* mu Gibea bakandisikila masiku akwiizinguluka ŋanda mondakabede. Ndime ngobakali kuyanda kujaya, pele muciindi caboobo bakajata mwanakasuwa wangu akoona anguwe, mpoonya wakafwa.+ 6 Aboobo ndakabweza mutunta wamwanakasuwa wangu akuutendaula akutumya zibeela-beela muzyooko zyoonse zyalukono lwabana Israyeli,+ nkaambo bakacita cintu cisesemya alimwi cuusisya nsoni mu Israyeli. 7 Lino nywebo nobana Israyeli nyoonse, amubuzyanye+ akwaamba mbomuyeeya mumakani aaya.”

8 Kumane bantu boonse bakanyamuka antoomwe* akwaamba kuti: “Kunyina naba omwe akati kesu utiipiluke kutente lyakwe nokuba kuŋanda yakwe. 9 Lino mboobu mbotweelede kucita kubana Gibea: Atuume cisolo akuyoobalwana.+ 10 Tulabweza baalumi bali 10 akati kabantu bali 100 kuzwa kumisyobo yoonse ya Israyeli, abali 100 kuzwa kubantu bali 1,000, abali 1,000 kuzwa kubantu bali 10,000, kuti babambile basikalumamba izyakulya, kutegwa bakalwane bana Gibea baku Benjamini akaambo kazintu zyoonse zyuusisya nsoni nzyobakacita mu Israyeli.” 11 Aboobo baalumi boonse bamu Israyeli bakabungana calukamantano* kuti balwane munzi.

12 Mpoonya misyobo ya Israyeli yakatuma baalumi kubantu boonse bamusyobo wa Benjamini, kuyakwaamba kuti: “Ino ncibi nzi eeci cakacitika akati kanu? 13 Lino amwaabe baalumi babuyo bali mu Gibea+ kuti tubajaye, kutegwa tugwisye bubi mu Israyeli.”+ Pele bana Benjamini bakakaka kubaswiilila banabokwabo, ibana Israyeli.

14 Mpoonya bana Benjamini bakabungana antoomwe kuzwa muminzi ya Gibea, kuti baunke kuyoolwana bana Israyeli. 15 Buzuba oobo bana Benjamini bakabungana kuzwa muminzi yabo, nkokuti baalumi bali 26,000 ibalwana nkondo amapanga, kunze lyabaalumi basalidwe bali 700 bana Gibea. 16 Mumpi yabasikalumamba eeyi kwakali baalumi bali 700 basalidwe basicimwensyi. Baalumi boonse aaba bakalicibwene kubelesya nkwisyo cakutainzya nokaba kasusu.

17 Bana Israyeli bakabunganya baalumi bali 400,000 ibalwana nkondo amapanga,+ kugwisya buyo bamusyobo wa Benjamini, boonse bakali basikalumamba bacibwene. 18 Bakanyamuka akuunka ku Beteli kuyoobuzya makani kuli Leza.+ Mpoonya bana Israyeli bakati: “Ino nguni akati kesu uutiitusololele kuyoolwana bana Benjamini?” Eelyo Jehova wakaingula kuti: “Juda ulamusololela.”

19 Kuzwa waawo bana Israyeli bakanyamuka mafwumofwumo akuyooyaka nkambi kuti balwane bana Gibea.

20 Lino baalumi bana Israyeli bakaunka ku Gibea akuyoolibambila kulwana bana Benjamini. 21 Aboobo mubuzuba oobo bana Benjamini bakaboola kuzwa ku Gibea akujaya baalumi bana Israyeli ibali 22,000. 22 Nokuba boobo, impi yabasikalumamba bana Israyeli yakatondezya busicamba akuunka alimwi kuyoolibambila kulwana abusena mpobakabede buzuba bwakusaanguna. 23 Mpoonya bana Israyeli bakaunka akulilila Jehova kusikila kumangolezya, eelyo bakabuzya Jehova kuti: “Sena tuunke alimwi kuyoolwana banabokwesu bana Benjamini?”+ Kumane Jehova wakati: “Kamuya mukabalwane.”

24 Aboobo bana Israyeli bakaunka kufwaafwi abana Benjamini buzuba bwabili. 25 Kumane bana Benjamini bakaboola kuzwa ku Gibea kuzoobaswaanganya buzuba bwabili alimwi bakajaya baalumi bambi bana Israyeli ibali 18,000,+ boonse aaba bakali kulwana nkondo amapanga. 26 Mpoonya bana Israyeli boonse bakaunka ku Beteli. Bakalila akukkala ooko kubusyu bwa Jehova+ akuliimya kulya+ kusikila kumangolezya alimwi bakatuula zituuzyo zyuumpwa+ azituuzyo zyalumvwano+ kubusyu bwa Jehova. 27 Kumane bana Israyeli bakabuzya kuli Jehova,+ nkaambo mumazuba aayo bbokesi lyacizuminano ca Leza mwini-mwini nkolyakabede ooko. 28 Lino Finehasi+ mwana wa Eleazara imwana wa Aroni wakali kubelekela* kumbele lyabbokesi mumazuba aayo. Eelyo bakabuzya kuti: “Sena tuunke alimwi kuyoolwana banabokwesu bana Benjamini, naa tuleke buyo?”+ Jehova wakabaingula kuti: “Kamuya, nkaambo juunza ndiyoobaaba mumaanza aanu.” 29 Mpoonya bana Israyeli bakabikka baalumi mumabazu oonse kuti bayubilile+ bana Gibea.

30 Eelyo bana Israyeli bakaunka kuyoolwana bana Benjamini mubuzuba bwatatu, alimwi bakalibambila kulwana bana Gibea mbubonya mbuli ziindi zimbi zyamusyule.+ 31 Lino bana Benjamini nobakaunka kuyooswaangana ampi yabana Israyeli, bakausiya kule munzi.+ Mpoonya, mbubonya mbuli ziindi zyakusaanguna, bakatalika kulwana akujaya bana Israyeli bamwi mumigwagwa, umwi uugama ku Beteli aumwi uugama ku Gibea. Bakajaya baalumi bana Israyeli basika ku 30 musyokwe.+ 32 Aboobo bana Benjamini bakati: “Twabazunda mbubonya mbuli lweendo lwakusaanguna.”+ Pele bana Israyeli bakati: “Atutije kutegwa tukabasisye kumigwagwa kule amunzi.” 33 Eelyo baalumi boonse bana Israyeli bakanyamuka kuzwa mumasena aabo akuyoolibambila kulwana ku Baali-tamara, kakuli aabo bakayubide bakayubunuka kuzwa mumasena aabo kufwaafwi amunzi wa Gibea. 34 Aboobo baalumi bali 10,000 ibakasalidwe kuzwa akati kabana Israyeli boonse bakaboola kumbele lya Gibea, alimwi nkondo yakayuma. Pele bana Benjamini tiibakazyi kuti mapenzi akali afwaafwi kubasikila.

35 Jehova wakazunda bana Benjamini+ kubusyu bwabana Israyeli, aboobo mubuzuba oobo bana Israyeli bakajaya baalumi bana Benjamini bali 25,100, boonse aaba bakali kulwana nkondo amapanga.+

36 Nokuba boobo, bana Benjamini bakali kuyeeya kuti baalumi bana Israyeli bazundwa eelyo nobakali kuyaabutija,+ pele bakatija nkaambo bakali kusyoma baabo mbobakabikkide kuyubilila munzi wa Gibea.+ 37 Lino aabo bakayubide bakayubunuka cakufwambaana akuzuza kunjila mu Gibea. Mpoonya bakamwaika mumunzi akujaya bantu boonse bakali mumo amapanga.

38 Lino baalumi bana Israyeli bakalipangene abaabo bakayubide kuti banjila mumunzi bawuumpe kutegwa bwaunta busi cibe citondezyo kulimbabo.

39 Lino bana Israyeli nobakatija, bana Benjamini bakatalika kulwana akujaya baalumi bana Israyeli basika ku 30,+ alimwi bakati: “Masimpe twabazunda mbubonya mbuli lweendo lwakusaanguna.”+ 40 Pele citondezyo cakatalika kulibonya kuzwa mumunzi mbuli musumpuululu wabusi. Lino bana Benjamini nobakacebuka, bakabona busi mumunzi woonse kabuuntumuka kuya mujulu. 41 Mpoonya bana Israyeli bakanyona akutalika kulwana, eelyo bana Benjamini bakanyongana nkaambo bakabona kuti banjila mumapenzi. 42 Aboobo bakanyona akutija kubusyu bwabana Israyeli kutozya kunkanda, pele nkondo yakabaswena afwaafwi; eelyo baalumi bana Israyeli ibakazwa mumunzi bakasangana bana Israyeli bambi mukujaya bana Benjamini. 43 Bakabazinguluka bana Benjamini akubatandaanya kakunyina kubapa ciindi cakulyookezya. Bakabalyatauka mane kuyoosika afwaafwi aamunzi wa Gibea, nkouli kujwe. 44 Kwakajaigwa baalumi bana Benjamini bali 18,000, boonse bakali basikalumamba basinguzu.+

45 Bana Banjamini bakanyona akutijila kunkanda kundomba ya Rimoni,+ alimwi bana Israyeli bakajaya bali 5,000 akati kabo mumigwagwa, eelyo bakazumanana kubatandaanya kuyoosika ku Gidomu; aboobo bakajaya baalumi bambi bali 2,000. 46 Bana Benjamini boonse ibakajaigwa mubuzuba oobo bakakkwana 25,000, boonse aaba bakali basikalumamba basinguzu ibakali kulwana nkondo amapanga.+ 47 Pele baalumi bali 600 bakatijila kunkanda kundomba ya Rimoni, alimwi bakakkala ooko kundomba ya Rimoni kwamyezi yone.

48 Kumane bana Israyeli bakapiluka kuyoolwana bana Benjamini akujaya baabo bakali mumunzi apanga, kutalikila kubantu kusikila kubanyama bavwubwa azintu zyoonse zyakasyeede. Alimwi minzi yoonse njobakajana bakayuumpa.