2 Samuele

6 Lino alimwi Davida wakabunganya basikalumamba boonse bacibwene mu Israyeli ibali 30,000. 2 Mpoonya Davida abaalumi boonse mbaakali limwi bakaunka ku Baale-juda kuyooleta Bbokesi lya Leza mwini-mwini,+ aawo bantu mpobaitila zina lya Jehova wamakamu+ ooyo uukkede atala* aabakerubi.+ 3 Nokuba boobo bakabikka Bbokesi lya Leza mwini-mwini muŋola+ mpya nobakali kulinyamuna kuzwa kuŋanda ya Abinadabu+ iyakali atala aakalundu; Uza a Ahio ibana ba Abinadabu mbabakali kweenzya ŋola mpya.

4 Aboobo bakalibweza Bbokesi lya Leza mwini-mwini kuzwa kuŋanda ya Abinadabu iyakali atala aakalundu, alimwi Ahio wakali kweendela kumbele lya Bbokesi. 5 Davida abana Israyeli boonse bakali kusekelela kubusyu bwa Jehova kumwi kabalizya zibelesyo zyakwiimbya zyacisamu camulombe zyamisyobo-misyobo, tuntimbwa,+ nsakalala,+ miyuwa azibelesyo zimbi.+ 6 Pele nobakasika kucuumino camaila ca Nakoni,* ŋombe zyakali kuyanda kwiiwisya ŋola. Mpoonya Uza wakajata+ Bbokesi lya Leza mwini-mwini kuti litawi. 7 Mpoonya bukali bwa Jehova bwakabukila Uza, eelyo Leza mwini-mwini wakamujaya+ akaambo kakutalemeka mulawo+ wa Leza, aboobo wakafwa mpoonya aawo mumbali aa Bbokesi lya Leza mwini-mwini. 8 Pele Davida wakabijilwa kapati akaambo kakuti bukali bwa Jehova bwakabukila Uza cakutayeeyelwa; eelyo busena oobo bwiitwa kuti Perezi-uza* kusikila sunu. 9 Aboobo buzuba oobo Davida wakamuyoowa Jehova+ akwaamba kuti: “Ino Bbokesi lya Jehova inga lyaletwa buti kulindime?”+ 10 Davida tanaakayanda kuti Bbokesi lya Jehova litolwe kulinguwe ku Munzi wa Davida.+ Muciindi caboobo wakalailila kuti litolwe kuŋanda ya Obedi-edomu+ muna Gati.

11 Lino Bbokesi lya Jehova lyakakkala kuŋanda ya Obedi-edomu muna Gati kwamyezi yotatwe, eelyo Jehova wakazumanana kumulongezya Obedi-edomu alimwi amukwasyi wakwe woonse.+ 12 Mpoonya Mwami Davida bakamwaambila kuti: “Jehova waulongezya mukwasyi wa Obedi-edomu azintu zyoonse nzyajisi akaambo ka Bbokesi lya Leza mwini-mwini.” Aboobo Davida wakaunka kuyoobweza Bbokesi lya Leza mwini-mwini kuzwa kuŋanda ya Obedi-edomu akulitola ku Munzi wa Davida kayaabusekelela.+ 13 Lino basikunyamuna+ Bbokesi lya Jehova nobakeenda ntaamu zili cisambomwe, Davida wakatuula mupoho amoombe uuneneede.

14 Davida wakali kuzyana anguzu zyakwe zyoonse kubusyu bwa Jehova; alimwi wakasamide* kabaki kabupaizi+ kamulembo muuba-uba. 15 Davida abana Israyeli boonse bakalileta Bbokesi+ lya Jehova kumwi kabayaaboongolola cakukondwa+ akulizya mweembo.+ 16 Pele Bbokesi lya Jehova nilyakasika mu Munzi wa Davida, Mikala+ imwana wa Saulo wakasondela awindo akubona Mwami Davida kajintauka akuzyana kubusyu bwa Jehova; kumane wakatalika kumusampaula mumoyo wakwe.+ 17 Aboobo bakalileta Bbokesi lya Jehova akulibikka abusena bwalyo mutente eelyo Davida ndyaakaliimikila.+ Mpoonya Davida wakatuula zipaizyo zyuumpwa+ azipaizyo zyalumvwano+ kubusyu bwa Jehova.+ 18 Lino Davida naakamanizya kutuula zipaizyo zyuumpwa azipaizyo zyalumvwano, wakabalongezya bantu muzina lya Jehova wamakamu. 19 Alimwi baalumi abamakaintu boonse munkamu yabana Israyeli wakabapa umwi aumwi cinkwa cibulungene cijisi kapulo akati, cibbuubbu camicelo yamakunka acibbuubbu camisaansa miyumu, kumane bantu boonse bakaunka umwi aumwi kuŋanda yakwe.

20 Lino Davida naakapiluka kuyoolongezya bamuŋanda yakwe, Mikala+ mwana wa Saulo wakaunka kuyoomucinga. Mpoonya wakati: “Eelo kaka sunu mwami wa Israyeli weebeka naalivwumbula kumeso aabazike basimbi bababelesi bakwe, mbubonya mbwalivwumbula caantangalala mwaalumi mufwubafwuba!”+ 21 Amvwe boobo Davida wakati kuli Mikala: “Ndali kusekelela kubusyu bwa Jehova iwakandisala kuba musololi wabantu ba Jehova bana Israyeli+ mubusena bwauso abamuŋanda yakwe boonse. Aboobo ndiyoosekelela kubusyu bwa Jehova 22 alimwi ndiyoolyuubaula kwiinda waawa akulicesya mumeso aangu. Pele kwiinda mubasimbi bazike aabo mboamba, ndiyoolijanina bulemu.” 23 Lino Mikala+ mwana wa Saulo wakafwa katazyede mwana.