2 Samuele
21 Lino kwakaba nzala+ mumazuba aa Davida myaka yotatwe iiccililene, aboobo Davida wakabuzya kuli Jehova, mpoonya Jehova wakati: “Kuli mulandu wabulowa ali Saulo alimwi aŋanda yakwe, nkaambo wakajaya bana Gibeoni.”+ 2 Aboobo mwami wakaita bana Gibeoni+ akwaambaula ambabo. (Lino bana Gibeoni tiibakali bana Israyeli pe, pele bakali bana Amori+ ibakasyeede, alimwi bana Israyeli bakalikonkede kulimbabo kuti tabakoobajaya,+ pele Saulo wakali kuyanda kubajaya akaambo kabusungu mbwaakajisi kubana Israyeli a Juda.) 3 Davida wakaambila bana Gibeoni kuti: “Ino ndimucitile nzi, alimwi ino ndibbadele nzi kumanya mulandu ooyu kutegwa mulongezye lukono lwa Jehova?” 4 Bana Gibeoni bakati kulinguwe: “Taili nsiliva naa ngolida+ buyo njotuyanda mumakani aaya aajatikizya Saulo abaŋanda yakwe; alimwi tatukonzyi kujaya muntu uuli woonse mu Israyeli.” Kumane wakati: “Kufwumbwa ncomutiiambe, ndilamucitila.” 5 Mpoonya bakati kumwami: “Muntu ooyo iwakajaya bantu besu alimwi iwakajisi makanze aakutulobya mucilawo ca Israyeli coonse+— 6 amutupe bana basankwa bali ciloba balunyungu lwakwe. Tulaanzika mitunta yabo*+ kubusyu bwa Jehova ku Gibea+ munzi wa Saulo, ooyo Jehova ngwaakasalide kuba mwami.”+ Mpoonya mwami wakati: “Ndilamupa mbabo.”
7 Nokuba boobo, mwami wakeetezyegwa kujatikizya Mefiboseti+ mwana wa Jonatani imwana wa Saulo akaambo kacikonke eeco Davida a Jonatani+ mwana wa Saulo ncobakakonkezyanya muzina lya Jehova. 8 Aboobo mwami wakabweza Arimoni a Mefiboseti, ibana basankwa bobilo ba Rizipa+ mwana musimbi wa Aya aabo mbaakazyala kuli Saulo, alimwi abana basankwa bosanwe ba Mikala*+ mwana musimbi wa Saulo aabo mbaakazyala kuli Adrieli+ mwana wa Barizilai muna Meholati. 9 Mpoonya wakabaaba mumaanza aabana Gibeoni eelyo balo bakaanzika mitunta yabo acilundu kubusyu bwa Jehova.+ Boonse bali ciloba bakafwida antoomwe; bakajaigwa kumatalikilo aabutebuzi bwabbaale. 10 Mpoonya Rizipa+ mwana musimbi wa Aya wakabweza cisani camasaka akuciyala abbwe kuzwa kumatalikilo aabutebuzi kusikila ciindi mvwula niyakabawida kuzwa kujulu; alimwi tanaakali kuzumizya bayuni bakujulu kukkala alimbabo syikati nobaba banyama bamusyokwe masiku.
11 Eelyo Davida wakaambilwa ncaakacita Rizipa mwana musimbi wa Aya, mwanakasuwa wa Saulo. 12 Aboobo Davida wakaunka kuyoobweza mafwuwa aa Saulo a Jonatani kuzwa kubasololi* baku Jabezi-gileadi,+ aabo ibakaabbide kuzwa kulubuwa lwa Beti-sani, ooko ba Filisiti nkobakabaanzikide buzuba nobakajaya Saulo a Cilundu ca Giliboa.+ 13 Wakaaleta mafwuwa a Saulo amafwuwa a Jonatani mwanaakwe kuzwa kooko, alimwi bakabunganya mafwuwa aabaalumi aabo mbobakajaya.*+ 14 Mpoonya bakaazikka mafwuwa aa Saulo aa Jonatani mwanaakwe munyika ya Benjamini ku Zela+ mucuumbwe ca Kisi+ usyi. Nobakamana kucita zyoonse nzyaakalailila mwami, Leza wakakuswiilila kulomba kwabo kujatikizya nyika.+
15 Alimwi kwakaba nkondo akati kaba Filisiti abana Israyeli.+ Aboobo Davida ababelesi bakwe bakaunka kuyoolwana aba Filisiti, pele Davida wakakatala kapati. 16 Isibi-benobi, umwi walunyungu lwa Refaimu,+ iwakajisi sumo lyamukuba lyakali kulema masyekeli aali 300 *+ alimwi wakajisi apanga lipya, wakayeeya kujaya Davida. 17 Mpoonya aawo Abisai+ mwana wa Zeruya wakaboola kuzoomugwasya+ eelyo wakamujaya mu Filisiti. Aciindi eeco baalumi ba Davida bakakonka kulinguwe kuti: “Kuzwa sunu toyelede kunakuunka andiswe kunkondo!+ Toyelede kuzima lambe lya Israyeli!”+
18 Kuzwa waawo, kwakabuka nkondo alimwi aba Filisiti+ ku Gobu. Aciindi eeco Sibekai+ muna Husati wakajaya Safi iwakali umwi walunyungu lwa Refaimu.+
19 Alimwi kwakabuka nkondo aba Filisiti+ ku Gobu, eelyo Elihanani mwana wa Jare-oregimu muna Betelehemu wakajaya Goliati muna Gati, ooyo iwakajisi sumo lili amukwikko uuli mbuli cisamu cabasikuluka.+
20 Nkondo yakabuka alimwi ku Gati, ooko ikwakali lintu ilyakajisi minwe iili cisambomwe kujanza limwi alimwi, aminwe iili cisambomwe kucituta cimwi acimwi, antoomwe minwe yakali 24 ; alyalo lintu eeli lyakali lyalunyungu lwa Refaimu.+ 21 Lintu eelyo lyakazumanana kusampaula bana Israyeli.+ Aboobo Jonatani mwana wa Simeyi,*+ imwanookwabo a Davida wakalijaya lintu eelyo.
22 Aaba bone mbabakali balunyungu lwa Refaimu ku Gati, eelyo bakajaigwa a Davida alimwi ababelesi bakwe.+