Mika
7 Maawe mebo! Ndili mbuli muntu uunga,
Nobamana kutebula micelo yacilimo
Akuvwulula kucitwa nobamana kutebula misaansa,
Tajani cikama camisaansa yakulya,
Noziba nkuyu zyakusaanguna nzyondilombozya.
2 Muntu uusyomeka waloba munyika;
Akati kabantu kunyina muntu uululeme.+
Boonse buyo bayubilila bamwi kuti batile bulowa.+
Umwi aumwi uvwima mwanookwabo alunsabwe.
3 Maanza aabo alicibwene kucita bubi;+
Silutwe uyanda kubbadelwa,
Mubetesi uyanda kupegwa bulumbu,+
Awalo uulemekwa waamba zintu nzyayanda walo mumoyo,+
Aboobo zintu eezyo bazicitila antoomwe.
4 Muntu mubotu kapati akati kabo uli mbuli mamvwa,
Ooyo uululeme kapati akati kabo mubi kwiinda lubaya lwamamvwa.
Buzuba bwabalindizi bako abwakusubulwa kwako bulasika.+
Aboobo lino balakopana.+
5 Utasyomi mweenzinyoko
Nokuba kusyoma mulongwe wako wakumoyo.+
Kocenjela nobandika ayooyo uuyaama acamba cako.
6 Nkaambo mwana musankwa usampaula bausyi,
Mwana musimbi ubukila banyina,+
Awalo mukamwana ubukila banyinazyala;+
Basinkondo bamuntu mbantu bamuŋanda yakwe.+
7 Pele mebo ndinoolangila Jehova.+
Cakukkazika moyo ndinoolindila Leza walufwutuko lwangu.+
Leza wangu uyoondimvwa.+
8 Utakondwi akaambo kandime, yebo osinkondoma.*
Nokuba kuti ndawa, ndiyoonyamuka alimwi;
Nokuba kuti ndikkede mumudima, Jehova uyooba mumuni wangu.
9 Ndiyooliyumya kubukali bwa Jehova
—Nkaambo ndamubisyila+—
Kusikila mane akabeteke kaambo kangu akundicitila cabululami.
Uyoondigwisya akundileta kumumuni;
Eelyo ndinoolanga bululami bwakwe.
10 Sinkondoma awalo uyoocibona,
Aboobo nsoni ziyoomujaya ooyo wakali kundaambila kuti:
“Ino uli kuli Jehova Leza wako?”+
Meso aangu ayoomubona sinkondoma ooyo.
Lino uyoolyataukwa mbuli mankanda munzila.
11 Bunooli buzuba bwakuyaka malambo aako aamabwe;
Mubuzuba oobo munyinza uyookwakwabulwa.*
12 Mubuzuba oobo bayooboola kulinduwe
Kuzwa kooko ku Asuri akuminzi yaku Egepita,
Kuzwa ku Egepita kusikila ku Mulonga;*
Kuzwa kulwizi kusikila kulwizinyina, alimwi akuzwa kucilundu kusikila kucilundunyina.+
13 Cisi ciyooba matongo akaambo kabantu bakkala mumo,
Akaambo kazintu nzyobacita.*
14 Koembela bantu bako amusako wako, ibutanga bwambelele zyalukono lwako,+
Ibwakali kukkala buyo bulikke musyokwe—akati kamuunda wazisamu zyamicelo.
Azicele mu Basani amu Gileadi+ mbubonya mbuli kumazuba aakaindi.
15 “Ndiyoomutondezya zintu zigambya
Mbubonya mbuli kumazuba aalya nomwakazwa mucisi ca Egepita.+
16 Bantu bamasi bayoobona akugunwa nokuba kuti balaanguzu zinji.+
Bayoolijata kumulomo;
Aalo matwi aabo ayoosinka.
17 Bayoomyankuta lusuko mbubonya mbuli nzoka;+
Mbuli banyama baanyika bakalaba bayoozwa mumampangala aabo kabakankama.
Bayooboola kuli Jehova Leza wesu kabayoowede kapati,
Alimwi bayookuyoowa yebo.”+
18 Ino nguni Leza uuli mbuli nduwe,
Uujatila milandu akulekelela nsotoko+ zyabasyeede balukono lwakwe?+
Yebo tozumanani kukalala mane kukabe kutamani,
Nkaambo ulalukkomanina luyando lutamani.+
19 Yebo uyootufwida luse alimwi;+ milandu yesu uyakwiimanizya.*
Alimwi zibi zyesu zyoonse uyoozisowela mumpisi zyalwizi.+
20 Uyoosyomeka kuli Jakobo,
Akutondezya luyando lutamani kuli Abrahamu,
Mbubonya mbookakonka kuli bamatata kumazuba aakaindi.+