2 Bakorinto
11 Ndilombozya kuti mulandilekelela akaambo kakufwubaala kwangu kusyoonto. Pele mubwini mulacita oobo! 2 Nkaambo ndilaabuzuba kulindinywe mbubonya mbuli Leza,* nkaambo mebo lwangu ndakamusyomezya cikwati kumwaalumi omwe kutegwa ndikamupe kuli Kristo kamuli nakalindu uusalala.+ 3 Pele ndililibilikide kuti mbubonya nzoka mboyakoongelezya Eva mubucenjezu bwayo,+ mizeezo yanu inga ilasofwaazyigwa akumupa kuleka kusyomeka camoyo woonse akusalala nkomweelede kutondezya Kristo.+ 4 Nkaambo ikuti naa kwasika muntu umwi uukambauka Jesu uumbi ikutali yooyo ngotwakakambauka, naa ikuti mwatambula muuya uumbi ikutali wooyo ngomwakatambula naa makani mabotu aambi ikutali yaayo ngomwakazumina,+ mulafwambaana kuzitobela nzyaamba muntu ooyo. 5 Nkaambo ndiyeeya kuti kunyina cintu nociba comwe ncobandiinda baapostolo banu bacibwene kwiinda boonse.+ 6 Pele nokuba kuti tandicizyi kwaambaula,+ mubwini luzyibo lwalo ndilijisi; masimpe luzyibo ndotujisi twakalutondezya kulindinywe munzila zyoonse alimwi amuzintu zyoonse.
7 Naa sena ndakalubizya nindakalicesya kutegwa nywebo musumpulwe, nkaambo ndakalikkomene kwaambilizya makani mabotu aa Leza kulindinywe kakunyina kubbadelwa?+ 8 Ndakapa kuti mbungano zimwi zibulizye nindakazumina kupegwa zintu zyakuligwasya kutegwa ndigwasye ndinywe.+ 9 Pele nindakali andinywe kandibulizyide kunyina muntu ngondakaminya, nkaambo bakwesu ibakazwa ku Makedoniya bakandipa zintu zyoonse nzindakabulizyide.+ Inzya, munzila zyoonse kunyina nindakayanda kuba mukuli uuminya kulindinywe alimwi ndilazumanana mbubonya oobo.+ 10 Masimpe mbubonya kasimpe ka Kristo mbokali mulindime, tandikooleka pe kulidunda+ boobu muzyooko zyaku Akaya. 11 Ino nkaambo nzi? Sena nkaambo kakuti tandimuyandi? Leza ulizyi kuti ndilamuyanda.
12 Pele ndilazumanana kucita ncondicita,+ ikutegwa ndimanizye kulicengeezya kwabaabo ibayanda kubonwa kuti baleelene andiswe kwiinda mukulidunda akaambo kazintu* nzyobajisi. 13 Nkaambo bantu bali boobo mbaapostolo babeji, mbaasimilimo basilweeno, ibalicengeezya kuba mbuli baapostolo ba Kristo.+ 14 Alimwi eeci tacigambyi pe, nkaambo Saatani lyoonse ulalicengeezya kuba mbuli mungelo wamumuni.+ 15 Aboobo tacigambyi pe ikuti naa abalo babelesi bakwe lyoonse balalicengeezya kuba mbuli babelesi babululami. Pele mamanino aabo ayooba mbubonya mbuli milimo yabo.+
16 Ndaamba alimwi kuti: Kutabi muntu uuyeeya kuti ndili mufwubafwuba. Pele nokuba kuti mbomuyeeya oobo, amunditambule mbuli muntu mufwubafwuba, ikutegwa andime ndilidunde asyoonto. 17 Eezyi nzyondaamba lino tanditobeli cikozyanyo ca Mwami pe, pele ndaamba mbubonya mbwakonzya kwaamba muntu mufwubafwuba, uulidunda akulisyoma. 18 Mbwaanga banji balalidunda akaambo kazintu zyamunyika,* andime ndilalidunda. 19 Akaambo kakuti mulibona kuti mulanyoneka kapati, calukkomano mulabalekelela bantu bafwubafwuba. 20 Mubwini, mulamulekelela muntu uuli woonse uumubikka mubuzike, naba yooyo uumulida lubono lwanu naa uumunyanga nzyomujisi, naba yooyo uulisumpula akati kanu, alimwi naba yooyo uumuuma kumeso.
21 Ncamasampu kulindiswe kwaamba boobu, mbwaanga kuli bamwi inga caboneka mbuli kuti tatujisi nguzu.
Pele ikuti bantu bamwi bacita cabusicamba—ndaamba cabufwubafwuba—andime lwangu ndicita cabusicamba. 22 Sena mba Hebrayo? Andime ndili mu Hebrayo.+ Sena mbana Israyeli? Andime ndili muna Israyeli. Sena mbalunyungu lwa Abrahamu? Andime ndili walunyungu lwakwe.+ 23 Sena mbabelesi ba Kristo? Ndiingula mbuli muntu uusondokede, kuti mebo ndabainda: ndacita milimo minji,+ ndaangwa muntolongo ziindi zinji,+ ndaumwa zyuumo zitabaliki, alimwi ndaba muntenda zyalufwu zinji.+ 24 Ziindi zyosanwe ba Juda bakanduuma zimboko zili 39,+ 25 ziindi zyotatwe ndakaumwa amisako,+ ciindi comwe ndakapwaigwa mabwe,+ ziindi zyotatwe bwato mbondakatantide bwakanyonyooka,+ ciindi cimwi ndakali mukati kalwizi syikati amasiku; 26 ndakali munyendo kanji-kanji, muntenda zyamumilonga, muntenda kuzigwebenga, muntenda kubantu bamusyobo wangu,+ muntenda kubantu bamasi,+ muntenda mumunzi,+ muntenda munkanda, muntenda mulwizi, muntenda akati kabakwesu babeji, 27 mukubeleka milimo iikatazya alimwi iiminya, mukutoona masiku kanji-kanji,+ mukufwa nzala anyota,+ mukubula cakulya ziindi zinji,+ mukufwa mpeyo amukubula zisani.*
28 Kunze lyazintu zyoonse eezyo, kuli cimbi cindikatazya buzuba abuzuba:* nkokuti kulibilika kujatikizya mbungano zyoonse.+ 29 Ino nguni uutajisi nguzu pele mebo kandijisi nguzu? Ino nguni wakalebwa pele mebo kanditabijilwi?
30 Ikuti naa ndeelede kulidunda, ndilalidunda akaambo kazintu zitondezya kubula nguzu kwangu. 31 Leza alimwi Usyi wa Mwami Jesu, ooyo iweelede kutembaulwa kukabe kutamani, ulizyi kuti tandibeji pe. 32 Ku Damasiko imweendelezi ngwaakabikkide mwami Areta wakali kulindilila munzi wa Damasiko kutegwa andijate, 33 pele ndakainzyigwa awindo lyakubwaanda bwamunzi+ akuselusyigwa mumutaanga, aboobo ndakaloboka kuzwa kumaanza aakwe.