Jeremiya
15 Mpoonya Jehova wakandaambila kuti: “Nokuba kuti Musa a Samuele nobaliko akwiima kumbele lyangu,+ bantu aaba tandikonzyi kubakkomanina pe. Kobatanda kumbele lyangu. Abaunke. 2 Lino ikuti naa bakubuzye kuti, ‘Ino tuunke kuli?’ ubaambile kuti, ‘Mboobu mbwaamba Jehova:
“Kufwumbwa uubambilidwe cilwazi cijaya, aunke kucilwazi cijaya!
Kufwumbwa uubambilidwe panga, aunke kupanga!+
Kufwumbwa uubambilidwe nzala, aunke kunzala!
Alimwi kufwumbwa uubambilidwe buzike, aunke mubuzike!”’+
3 “‘Ndiyoobapa misyobo yone yamapenzi,’*+ mbwaamba Jehova, ‘ipanga kuti libajaye, babwa kuti babakwelaanye, bayuni bauluka mujulu alimwi abanyama baanyika kuti babalye akubanyonyoona.+ 4 Alimwi ndiyoobapa kuba cintu cigambya kumami oonse aamunyika+ akaambo ka Manase mwana wa Hezekiya, mwami wa Juda, akaambo kancaakacita mu Jerusalemu.+
5 Ino nguni uuyookufwida lubomba, O Jerusalemu,
Ino nguni uyookweetezya,
Alimwi ino nguni uuyakwiima kuti abuzye naa upona buti?’
6 ‘Yebo wandisiya,’ mbwaamba Jehova.+
Aboobo ndiyootandabika janza lyangu kulinduwe akukunyonyoona.+
Ndakatala kukufwida lubomba.*
7 Alimwi ndiyoobapupulula acipupuluzyo mumilyango yacisi.
Ndiyoobajaya bana babo.+
Ndiyoobanyonyoona bantu bangu,
Mbokunga bakaka kupiluka kuzwa kunzila zyabo.+
8 Kulindime bamukabafwu babo bayoovwula kapati kwiinda musenga wakulwizi.
Ndiyoobaletela sikunyonyoona masyikati, ndiyoomuleta kuli bamatumbu alimwi abalombwana.
Cakutayeeyelwa ndiyoobaletela manyongwe alimwi azintu ziyoosya.
9 Mukaintu iwakazyala bana bali ciloba wamaninwa nguzu;
Wawizuka kakwela muya.
Zuba lyamubbilila kalicili syikati,
Eeci caleta bweemya alimwi amasampu.’*
‘Alimwi aabo basyoonto basyeede akati kabo
Ndiyoobaaba kupanga lyabasinkondonyina,’ mbwaamba Jehova.”+
10 Maawe baama, nkaambo mwakandizyala,+
Mebo ndemuntu sikubwesyanya lyoonse alimwi sikuzwangana anyika yoonse.
Kunyina nindakweletesya naa kukweleta;
Pele boonse balanditukila.
11 Jehova wakaamba kuti: “Masimpe ndiyookubelekela kuti ujane bubotu;
Ncobeni ndiyookwiiminina kuli sinkondonyoko,
Muciindi camapenzi amuciindi camakatazyo.
12 Sena kuli muntu uukonzya kupwayaula butale,
Butale buzwa kulubazu lwakunyika, alimwi amukuba?
13 Lubono lwako azintu zyako ziyandisi ndiyoozyaaba kuti zisaalwe,+
Kakunyina muulo, pele akaambo kazibi zyako zyoonse nzyoocita muzilawo zyako zyoonse.
14 Basinkondonyoko ndiyoobapa zintu eezyi
Kuti bazitole kucisi ncotazyi.+
Nkaambo mulilo wayasyigwa abukali bwangu,
Wayasyilwa kuti muumpwe nywebo nobantu.”+
15 Yebo ulizyi, O Jehova,
Kondiyeeya, undibikkile maano.
Kondisubwida basikundipenzya.+
Utalekeli kuti ndilobe* akaambo kakumuka kunyema kwako.
Kozyiba kuti ndinyamwide masampu aaya akaambo kanduwe.+
16 Majwi aako akajanwa, eelyo ndakaalya;+
Ijwi lyako lyakandipa kusekelela akukondwa mumoyo wangu,
Nkaambo ndiitwa azina lyako, O Jehova Leza wamakamu.
17 Tandikkali munkamu yabasikulikondelezya mpoonya akutalika kusekelela ambabo.+
18 Ino nkaambo nzi macise aangu ncaatamani acilonda cangu ncocitasilikiki?
Nkaambo taciponi pe.
Sena yebo ulandibeda mbuli kasensa kamaanzi katasyomeki
Aako katakonzyi kusyomwa?
19 Aboobo mboobu mbwaamba Jehova:
“Ikuti naa upiluke, ambebo ndilakubukulusya,
Eelyo unakwiima kumbele lyangu kondikutaukila.
Ikuti naa uzandule zintu ziyandisi kuzintu zyabuyo,
Uyooba mbuli mulomo wangu.*
Balo mbabayoopiluka kulinduwe,
Pele yebo tokapiluki kulimbabo pe.”
20 “Yebo ndakupa kuba bwaanda bwamukuba buyumu nta kubantu aaba.+
Ncobeni bayookulwana,
Pele tabakakuzundi pe,+
Nkaambo ndilaanduwe, kuti ndikufwutule akukuvwuna,” mbwaamba Jehova.
21 “Ndiyookuvwuna kujanza lyabantu babi
Akukunununa kuzwa mujanza lyabantu basilunya.”