Isaya
8 Jehova wakandaambila kuti: “Kobweza cakulembela cipati cipapalete+ ulembe aalincico acilembyo cabantu-bantu buyo* kuti, ‘Maha-shala-hashi-bazi.’* 2 Alimwi bakamboni basyomeka, nkokuti Uriya+ mupaizi a Zekariya mwana wa Jeberekiya abandicitile bumboni kwiinda mukulemba.”
3 Mpoonya ndakaswaangana* amusinsimi mukaintu,* eelyo wakamita kumane mukuya kwaciindi wakatumbuka mwana musankwa.+ Kumane Jehova wakandaambila kuti: “Komuulika zina lyakuti Maha-shala-hashi-bazi, 4 nkaambo mulombe ooyo katanacizyiba kwiita kuti, ‘Taata!’ akuti ‘Baama!’ lubono lwaku Damasiko alimwi azintu zisaalwa zyaku Samariya ziyootolwa kumbele lyamwami wa Asuri.”+
5 Jehova wakandaambila alimwi kuti:
6 “Mbokunga bantu aaba bakaka maanzi aaku Silowa*+ aayenda asyoonto-syoonto
Alimwi balikondedwe akaambo ka Rezini alimwi amwana wa Remaliya,+
7 Nkokuti bona! Jehova ulabaletela
Maanzi manji alimwi aakunka canguzu aa Mulonga* kuti abapoomokele,
Nkokuti mwami waku Asuri+ abulemu bwakwe boonse.
Masimpe ulaboola kuzoofwasukila tulonga twakwe toonse
Akupaya munkomwe zyakwe zyoonse
8 Akukukulula mucisi ca Juda.
Maanzi aakwe ayoopaya akukunka, kaasika munsingo;+
Mababa aakwe aatandabikidwe ayoovwumba cisi cako,
9 Amunyonyoone, nywebo nobantu, pele mulapwayaulwa.
Amuswiilile, nywebo nyoonse nomuli mumasena aakule aanyika!
Amulibambile* kulwana nkondo, pele mulapwayaulwa!+
Amulibambile kulwana nkondo, pele mulapwayaulwa!
10 Amukanze, pele makanze aanu alajaigwa!
11 Nceeci ncaakandaambila Jehova kandijatilide ajanza lyakwe lyanguzu, kutegwa andicenjezye kuti nditatobeli nzila yabantu aaba, wakati:
12 “Tamweelede kucaamba kuti ncizuminano eeco bantu aaba ncobaamba kuti ncizuminano!
Mutayoowi ncobayoowa;
Mutakankami pe akaambo kancico.
13 Jehova wamakamu, ngonguwe ngomweelede kubona kuti ulasalala,+
Ngonguwe ngomweelede kuyoowa,
Alimwi ngonguwe weelede kumupa kukankama.”+
14 Walo uyooba mbuli busena busalala,
Pele alimwi uyooba mbuli bbwe nkobalinontola
Ambuli bbwe lilebya+
Kumaanda oonse obilo aa Israyeli,
Uyooba mbuli kooze ambuli kakole
Kulibaabo bakkala mu Jerusalemu.
15 Bantu banji akati kabo bayoolebwa akuwa akutyoka;
Bayoocegwa akujatwa.
17 Mebo ndinoolangila* Jehova,+ ooyo uusisa busyu bwakwe kuŋanda ya Jakobo,+ alimwi ndinoosyoma nguwe.
18 Amubone! Mebo alimwi abana aabo Jehova mbaandipa+ tuli mbuli zitondezyo+ alimwi amaleele mu Israyeli kuzwa kuli Jehova wamakamu, ooyo uukkede mu Cilundu ca Ziyoni.
19 Lino ikuti bamwaambila kuti: “Amubuzye kulibaabo baambaula amizimo naa kulibaabo basonda ibaambaula mbuli tuyuni tulila alimwi baambawida ansaansi,” sena bantu tabeelede kubuzya Leza wabo? Sena bantu bafwide beelede kubuzyigwa kuti bagwasye bantu baumi?+ 20 Muciindi caboobo, beelede kuvwuntauzya mulawo abumboni bulembedwe!
Ikuti kabataambi kweelana amajwi aaya, nkokuti tabajisi mumuni.*+ 21 Eelyo umwi aumwi uyakwiinda mucisi kakopene mumizeezo alimwi kafwide nzala;+ alimwi akaambo kanzala iimujisi alimwi akubijilwa, uyootukila mwami wakwe alimwi a Leza wakwe kalangide mujulu. 22 Mpoonya uyoolanga ansi akubona buyo mapenzi amudima, kadima-dima, ziindi zikatazya amudima uusiya mbi kakutakwe mumuni.