Intembauzyo
Lwiimbo lwa Davida.
141 O Jehova, ndiita nduwe.+
Kofwambaana kuboola undigwasye.+
Koswiilila nendikwiita.+
2 Mupailo wangu aube mbuli tununkilizyo+ tubambidwe kabotu kumbele lyako,+
Maanza aangu aatambikide mujulu aabe mbuli cituuzyo camaila cakumangolezya.+
3 O Jehova kobikka mulindizi kumulomo wangu,
Kobikka sikulinda mulyango wamilomo yangu.+
4 Utalekeli moyo wangu kuyanda cintu cili coonse cibi,+
Kuti ndicite micito mibi antoomwe abantu babi;
Nditalidomeneni budodoodo bwabo pe.
5 Ikuti mululami wanduuma, nkokuti unditondezya luyando lutamani;+
Ikuti wandisinsa, cili mbuli mafwuta aatilwa amutwe wangu,+
Aayo mutwe wangu ngwaatakonzyi kukaka.+
Ndilazumanana kupaila noliba leelyo nobali mumapenzi.
6 Nokuba kuti babetesi babo bawaalwa ansi kujeleele,
Bantu balakonzya kuswiilila majwi aangu, nkaambo mabotu.
7 Mbubonya mbokuba ciindi muntu nalima akupwayaula bulongo,
Mafwuwa eesu amwaigwa kumulyango wa Cuumbwe.*
8 Nokuba boobo, meso aangu alangide kulinduwe, O Mwami Singuzuzyoonse Jehova.+
Mebo ndayuba mulinduwe.
Utandinyangi buumi.
9 Kondivwuna kukakole nkobanditeya,
Kutooze twabasimucita zibi.
10 Ibabi boonse bayoocegwa mutunsabwe twabo beni+
Pele mebo ndiyakwiindilila buyo.