1 Samuele
30 Ciindi Davida abaalumi mbaakali limwi nobakasika ku Zikilaga+ mubuzuba bwatatu, bana Amaleki+ bakasaala nyika yakumusanza* alimwi amunzi wa Zikilaga, kumane bakaulwana munzi wa Zikilaga akuwuumpa. 2 Bakabweza bamakaintu+ abantu boonse ibakali mumo, bana abapati alimwi azintu zyoonse. Kunyina muntu ngobakajaya pe, pele bakababweza akubatola. 3 Lino Davida abaalumi mbaakali limwi nobakasika mumunzi, bakajana bawuumpa munzi alimwi bamakaintu babo abana babo basankwa abasimbi batolwa mubuzike. 4 Aboobo Davida abaalumi mbaakali limwi bakatalika koongolola kulila, mane limwi nguzu zyabo zyakulila zyakamana. 5 Abalo bamakaintu ba Davida bobilo bakatolwa mubuzike, Ahinoamu muna Jezreeli a Abigayeli muna Karimeli+ mukamufwu wa Nabala. 6 Davida wakapenga kapati mumoyo akaambo kakuti bantu bakali kuyanda kumupwaya mabwe, nkaambo baalumi boonse bakalilutide akaambo kabana babo basankwa abasimbi. Pele Davida wakaliyumya munguzu zya Jehova Leza wakwe.+
7 Mpoonya Davida wakati kuli Abiyatara+ mupaizi imwana wa Ahimeleki: “Koleta okuno kabaki kabupaizi.”+ Aboobo Abiyatara wakakaleta kabaki kabupaizi kuli Davida. 8 Davida wakabuzya Jehova kuti:+ “Sena ndizitandile zigwebenga eezyi zisaala? Sena ndiyoozyeenzya?” Mpoonya wakamwaambila kuti: “Kozitandila nkaambo masimpe uyoozyeenzya alimwi uyoozinyanga zyoonse nzyozyakabweza.”+
9 Mpoonya aawo Davida wakanyamuka abaalumi bali 600 + mbaakali limwi, eelyo bakeenda akusika ku Kalonga* ka Besori, mpoonya bamwi bakasyaala kukalonga ooko. 10 Davida wakazumanana kubatobela kali abaalumi bali 400, pele baalumi bali 200 ibakaalilwa kuzabuka Kalonga ka Besori akaambo kakukatala, bakasyaala.+
11 Mpoonya bakajana mwaalumi umwi muna Egepita musyokwe eelyo bakamubweza akumutola kuli Davida. Bakamupa cakulya kuti alye amaanzi aakunywa 12 alimwi akabunge kankuyu azibbuubbu zyobilo zyamisaansa miyumu. Naakamana kulya wakaba anguzu,* nkaambo tanaakalide naa kunywa maanzi kwamazuba otatwe syikati amasiku. 13 Lino Davida wakamubuzya kuti: “Ino uli muntu wani, alimwi wazwa kuli?” Eelyo wakati: “Ndili mubelesi muna Egepita imuzike wamuna Amaleki, pele simalelaangu wakandisiya akaambo kakuti ndakaciswa mazuba otatwe aainda. 14 Twakasaala nyika yakumusanza* yabana Kereti,+ nyika yaba Juda anyika yakumusanza* ya Kalebe+ alimwi munzi wa Zikilaga twakawuumpa.” 15 Mpoonya Davida wakati kulinguwe: “Sena inga wanditola kuzigwebenga zisaala eezyo?” Mwaalumi ooyu wakaingula kuti: “Ikuti naa ukonke kulindime muzina lya Leza kuti tokoondijaya akuti tokooyoondaaba kuli simalelaangu, ndilakutola kuzigwebenga zisaala.”
16 Aboobo wakamutola kuli basikusaala, ooko nkobakamwaikizyenye abusena oobo boonse, kabalya akunywa akusekelela pobwe akaambo kazintu zinji zyoonse nzyobakasaala mucisi caba Filisiti amucisi caba Juda. 17 Mpoonya Davida wakatalika kubajaya kuzwa mafwumofwumo kusikila kumangolezya; kunyina naba omwe wabo wakasyaala+ kunze lyabalombe bali 400 ibakatanta ankamela akutija. 18 Davida wakavwuna bantu azintu zyoonse bana Amaleki nzyobakabwezede,+ alimwi abamakaintu bakwe bobilo wakabavwuna. 19 Kunyina muntu wakasyaala, abe mwana naa mupati. Bakabajana bana babo basankwa abasimbi, alimwi azintu zyakatoledwe;+ Davida wakazipilusya zyoonse nzyobakabwezede. 20 Aboobo Davida wakabweza mbelele, mpongo alimwi aŋombe zyabana Amaleki, eezyo nzyobakabinga kumbele lyamatanga aabo ngobakabwezede bana Amaleki. Mpoonya bakati: “Eezyi nzisaalo zya Davida.”
21 Mukuya kwaciindi Davida wakasika ooko ikwakali baalumi bali 200 ibakakatala akwaalilwa kuunka anguwe, aabo ibakasyeede ku Kalonga ka Besori,+ eelyo bakaboola kuzoocinga Davida abantu mbaakali limwi. Lino Davida naakasika afwaafwi ambabo, wakabaanzya. 22 Nokuba boobo, baalumi boonse babuyo akati kabaabo bakaunkide a Davida bakati: “Akaambo kakuti tiibakaunkide andiswe, tatukoobapa zisaalo nzyotwakanununa ccita buyo kubapa umwi aumwi mukaintu wakwe abana bakwe kuti bababweze akuunka.” 23 Pele Davida wakati: “Peepe bakwesu, tamweelede kucita boobo pe kujatikizya zintu Jehova nzyaatupa. Wakatukwabilila akwaaba zigwebenga zisaala mumaanza eesu, eezyo izyakaboolede kutulwana.+ 24 Ino nguni uunga waazumina makani aayo? Caabilo camuntu wakaunkide kunkondo cileelana acaabilo camuntu wakasyeede kulindilila zintu.+ Boonse balapegwa zyaabilo zyeelene.”+ 25 Kuzwa buzuba oobo, eeci wakacibikka kuba mulawo ambeta mu Israyeli kusikila sunu.
26 Lino Davida naakapiluka ku Zikilaga, wakatumya zintu zimwi zyakasaalwa kubaalu bana Juda ibakali balongwe bakwe akwaamba kuti: “Nceeci cipego* canu kuzwa kuzintu zyakasaalwa zyabasinkondonyina Jehova.” 27 Wakatumya zipego kulibaabo ibakali ku Beteli,+ ku Ramoti waku Negebi,* ku Jatiri,+ 28 ku Aroeri, ku Sifimoti, ku Esitimoa,+ 29 ku Rakala, muminzi yabana Jerameli,+ muminzi yabana Keni,+ 30 ku Horima,+ ku Borasani, ku Ataki, 31 ku Hebroni,+ alimwi akumasena oonse ngaakeendeenda Davida abaalumi mbaakali limwi.