Matayo

27 Nobwakaca, basilutwe babapaizi boonse abaalu babantu bakamvwana kujatikizya Jesu kuti bamujaye.+ 2 Eelyo nobakamwaanga, bakamutola akumusiya mumaanza aa Pilato mweendelezi.+

3 Mpoonya Judasi, sikumwaaba, naakabona kuti Jesu wapegwa mulandu wakuti ajaigwe, wakausa akwaapilusya mali aansiliva aali 30 kuli basilutwe babapaizi alimwi abaalu,+ 4 kati: “Ndakabisya nondakaaba muntu uutakwe mulandu.”* Lino bakati: “Ino tutyani swebo? Nciindi cako!”* 5 Aboobo wakasowa mali aansiliva mutempele akuzwa. Mpoonya wakaunka waakulisina.+ 6 Pele basilutwe babapaizi bakabweza mali aansiliva akwaamba kuti: “Tuuzumizyi mulawo ikuwaala mali aaya muciyobwedo calubono cisetekene, nkaambo mali aabulowa.” 7 Mpoonya nobakamvwana, mali aayo bakaabelesya kuula muunda wamubumbi kutegwa kabazikkila beenzu. 8 Aboobo muunda ooyu wali kwiitwa kuti Muunda wa Bulowa+ kusikila sunu. 9 Mpoonya akazuzikizyigwa majwi aayo aakaambwa kwiinda muli Jeremiya musinsimi kuti: “Alimwi bakabweza mali aansiliva aali 30, muulo ngobakabikkila muntu, imuntu ooyo bana Israyeli bamwi ngobakabikkila muulo, 10 eelyo bakaabelesya kuula muunda wamubumbi kweelana ambwaakandilailila Jehova.”*+

11 Jesu wakaimikila kumbele lyamweendelezi, mpoonya mweendelezi wakamubuzya kuti: “Sena uli Mwami waba Juda?” Jesu wakaingula kuti: “Yebo omwini waamba.”+ 12 Pele nobakali kumutamikizya basilutwe babapaizi alimwi abaalu, kunyina naakaingula pe.+ 13 Mpoonya Pilato wakati kulinguwe: “Sena tomvwide twaambo toonse ntobakutamikizya?” 14 Pele kunyina naakamwiingula noliba jwi lyomwe cakuti mweendelezi wakagambwa kapati.

15 Lino kufwumbwa ciindi nokwakali kuba Pobwe Lyakwiindilila, mweendelezi wakajisi cilengwa cakwaangununa mwaange omwe kunkamu yabantu, kufwumbwa ngobayanda.+ 16 Lino kuciindi eeco bakajisi mwaange wakali ampuwo mbyaabi kapati uutegwa Baraba. 17 Aboobo nobakabungana antoomwe, Pilato wakati kulimbabo: “Ino nguni ngomuyanda kuti ndimwaangunwide, Baraba naa Jesu ooyo wiitwa kuti Kristo?” 18 Nkaambo Pilato wakalizyi kuti bakamwaaba akaambo kamunyono. 19 Alimwi naakakkede acuuno calubeta, mukaintu wakwe wakatumya mulomo kulinguwe kati: “Kutabi ncomucita muntu ooyo mululami, nkaambo ndapenga kapati sunu muciloto akaambo kanguwe.” 20 Pele basilutwe babapaizi alimwi abaalu bakoongelezya makamu aabantu kuti basale Baraba,+ akuti Jesu ajaigwe.+ 21 Lino mukwiingula mweendelezi wakati kulimbabo: “Ino nguni akati kabaaba bobilo ngomuyanda kuti ndimwaangunwide?” Bakati: “Baraba.” 22 Pilato wakati kulimbabo: “Ino lino ndityani a Jesu ooyo wiitwa kuti Kristo?” Boonse bakati: “Aagagailwe acisamu!”*+ 23 Wakati: “Nkaambo nzi? Ino ncibi nzi ncaakacita?” Pele bakazumanana koompololesya kabati: “Aagagailwe acisamu!”+

24 Naakabona kuti tacigwasyi, pele kubuka buyo lupyopyongano, Pilato wakabweza maanzi akusamba kumaanza nkamu yabantu kailangilila akuti: “Mebo ndinyina mulandu wabulowa bwamuntu ooyu. Ooyo mulandu wanu.” 25 Bamvwe boobo, bantu boonse bakaingula kuti: “Bulowa bwakwe abube alindiswe aabana besu.”+ 26 Mpoonya wakabaangunwida Baraba, pele wakalailila kuti Jesu akwibbaulwe,+ kumane wakabapa kutegwa akajaigwe aacisamu.+

27 Mpoonya basikalumamba bamweendelezi bakatola Jesu muŋanda yamweendelezi akubunganya impi yoonse yabasikalumamba kulinguwe.+ 28 Eelyo bakamusamununa akumusamika cisani cilamfwu cisalala pyu,+ 29 alimwi bakapanga musini wamamvwa akumusamika kumutwe akumusyonka tete mujanza lyakwe lyalulyo. Lino kabafwugama kulinguwe, bakamufwubaazya akwaamba kuti: “Wabonwa, yebo O Mwami waba Juda!” 30 Bakamuswida mate+ akubweza tete akutalika kumuumya ndilyo amutwe. 31 Mpoonya, nobakamana kumufwubaazya, bakamusamununa cisani eeco cilamfwu akumusamika zisani zyakwe zyaatala, kumane bakamutola kuyoomugagaila aacisamu.+

32 Nobakali kuyaabweenda bakajana muntu muna Kurene uutegwa Simoni. Mwaalumi ooyu bakamusinikizya kunyamuna cisamu cakupenzyezya* ca Jesu.+ 33 Mpoonya nobakasika kubusena butegwa Gologota, nkokuti, Busena bwa Cipapa Camutwe,+ 34 bakamupa waini uuvwelene amululwe kuti anywe;+ pele naakalabila, wakakaka kunywa. 35 Eelyo nobakamugagaila acisamu, bakaabana zisani zyakwe zyaatala kwiinda mukuuma cisolo,+ 36 alimwi bakakkala ooko kabamulindilila. 37 Kunze lyaboobo, bakabikka cikwankwani atala aamutwe wakwe cilembedwe mulandu ngobakamupa wakuti: “Ooyu ngu Jesu Mwami Waba Juda.”+

38 Mpoonya zigwebenga zyobilo zyakabikkwa azisamu mumabali aakwe, cimwi kululyo lwakwe acimwi kulumwensyi lwakwe.+ 39 Lino bantu ibakali kwiinda munzila bakali kumusampaula+ akugunya-gunya mitwe+ 40 kabaamba kuti: “Yebo ookonzya kumwaya tempele akuliyakulula mumazuba otatwe,+ kolifwutula we! Ikuti koli mwana wa Leza, koseluka acisamu cakupenzyezya!”*+ 41 Mbubonya buyo, abalo basilutwe babapaizi abalembi abaalu bakatalika kumufwubaazya kabati:+ 42 “Bamwi wakali kubafwutula; pele walo mwini takonzyi kulifwutula! Mwami wa Israyeli;+ amumuleke lino aseluke acisamu cakupenzyezya,* aboobo tulamusyoma. 43 Usyoma muli Leza; amumuleke lino amuvwune ikuti kamuyanda,+ nkaambo waamba kuti, ‘Ndili Mwana wa Leza.’”+ 44 Mbubonya buyo, noziba zigwebenga izyakali azisamu antoomwe anguwe azyalo zyakali kumusampaula.+

45 Lino kutalikila kuwoola lyacisambomwe,* kwakaba mudima mucisi coonse kusikila kuwoola lyafwuka.*+ 46 Ciindi kacilondelela kuwoola lyafwuka, Jesu wakoongolola kuti: “Eli, Eli, lama sabakitani?” Ooku nkokwaamba kuti, “Leza wangu, Leza wangu, ino wandilekelezyela nzi?”+ 47 Nobakamvwa boobo, bamwi babaabo ibakaimvwi waawo bakatalika kwaamba kuti: “Ooyu muntu wiita Elija.”+ 48 Mpoonya aawo umwi wabo wakabalika akuleta nsinsa akwiinyika muwaini uulula, eelyo wakaibikka kutete akumupa kuti anywe.+ 49 Pele bamwi bakati: “Komuleka! Tulabona naa Elija ulaboola kuzoomufwutula.” 50 Alimwi Jesu wakoongolola ajwi pati, mpoonya wakafwa.+

51 Mpoonya mulembo wamutempele+ wakayauka akati,+ kuzwa atala mane kusikila aansi,+ alimwi nyika yakazungaana, amyala yakaanduka. 52 Aboobo zyuumbwe zyakajaluka alimwi mibili minji yabasalali bakafwide yakavwukkuka 53 akulibonya kubantu banji. (Eelyo bantu ibakali kuzwa kunamaumbwe musyule lyakubusyigwa kwakwe bakanjila mumunzi uusalala.) 54 Pele silutwe wabasikalumamba alimwi abaabo mbaakali limwi nibakali kulindilila Jesu nobakabona kuzungaana kwanyika azintu zyakali kucitika, bakayoowa kapati akwaamba kuti: “Ncobeni ooyu wali Mwana wa Leza.”+

55 Alimwi kwakali bamakaintu banji ibakali kulangilila alaale, ibakamutobela Jesu kuzwa ku Galilaya kuti kabamukutaukila;+ 56 akati kabo kwakali Mariya Magadalene alimwi a Mariya banyina Jakobo a Jose, kubikkilizya abanyina babana ba Zebedayo.+

57 Lino mbwaanga zuba lyakali afwaafwi kubbila, kwakaboola muntu umwi muvwubi waku Aremateya uutegwa Josefa, lino iwakali sikwiiya wa Jesu.+ 58 Muntu ooyu wakaunka kuli Pilato akulomba mubili wa Jesu.+ Mpoonya Pilato wakalailila kuti muntu ooyu apegwe.+ 59 Aboobo Josefa wakaubweza mubili, wauzambaila mumulembo mubotu uunyina tombe,+ 60 akuulazika mucuumbwe cakwe cipya,+ calo ncaakasyide mumwala. Eelyo wakakunkulisya bbwe lipati kumulyango wacuumbwe akuunka. 61 Pele Mariya Magadalene alimwi a Mariya umbi bakali mpoonya aawo kabakkede kumbele lyacuumbwe.+

62 Lino nibwakaca, mubuzuba butobela Buzuba bwa Kulibambila,+ basilutwe babapaizi aba Farisi bakabungana antoomwe kuli Pilato, 63 bakati: “Mwami, twayeeya kuti silweeno ulya kacili muumi wakaamba kuti, ‘Kwainda mazuba otatwe ndiyoobusyigwa.’+ 64 Aboobo kolailila kuti cuumbwe cilindwe kusikila mubuzuba bwatatu, kutegwa basikwiiya bakwe bataunki kuyoomubba+ akwaambila bantu kuti, ‘Wabusyigwa kubafwu!’ Eelyo lweeno lwamamanino oolu luyoobija kwiinda lwakusaanguna.” 65 Pilato wakati kulimbabo: “Mulakonzya kubikka balindizi. Aboobo kamuya mukacilinde kabotu kweelana ambomuzyi.” 66 Mpoonya bakaunka kuyoocilinda cuumbwe kwiinda mukusinka bbwe akubikka balindizi.