1 Samuele
19 Kumane Saulo wakaambila Jonatani mwanaakwe ababelesi bakwe boonse kuti uyanda kujaya Davida.+ 2 Akaambo kakuti Jonatani mwana wa Saulo wakali kumuyanda kapati Davida,+ Jonatani wakaambila Davida kuti: “Bataata bayanda kuti ujaigwe. Ndakomba ukacenjele mafwumofwumo, ukaunke kubusena busisikide akuzumanana ooko koyubide. 3 Mebo ndiyakuunka akwiima afwaafwi abataata musyokwe ooko nkoyooyubila. Ndiyoobaambila bataata kujatikizya nduwe, alimwi ikuti ndikamvwe cili coonse kujatikizya nduwe, masimpe ndiyookwaambila.”+
4 Aboobo Jonatani wakalumbaizya Davida+ kuli Saulo bausyi. Wakabaambila kuti: “Omwami utabisyi kujatikizya mubelesi wako Davida, nkaambo taakwe ncaakakubisizya; alimwi kufwumbwa ncaakucitila cakugwasya. 5 Wakabikka buumi bwakwe muntenda* ciindi naakajaya mu Filisiti,+ cakuti Jehova wakapa luzundo* lupati kubana Israyeli boonse. Wakalibonena ameso aako alimwi wakakkomana kapati. Aboobo ino nkaambo nzi ncoyanda kubisizya muntu uutajisi mulandu mbuli Davida, kwiinda mukumujaya kakunyina akaambo?”+ 6 Mpoonya Saulo wakaswiilila Jonatani, eelyo Saulo wakakonka kuti: “Mbubonya Jehova mbwali muumi, takoojaigwa pe.” 7 Kuzwa waawo Jonatani wakaita Davida akumwaambila zintu zyoonse eezyi. Aboobo Jonatani wakamuleta Davida kuli Saulo, eelyo wakazumanana kumubelekela mbuli lyoonse.+
8 Mukuya kwaciindi nkondo yakabuka alimwi, kumane Davida wakaunka kuyoolwana ba Filisiti akubanyonyoona kapati, eelyo bakatija kubusyu bwakwe.
9 Lino ciindi Davida naakali kulizya kantimbwa,+ muuya mubi wa Jehova wakamunjila Saulo+ ciindi naakakkede muŋanda yakwe kajisi asumo mujanza lyakwe. 10 Mpoonya Saulo wakasoleka kuyasilizya Davida kubwaanda, pele wakaleya aboobo sumo lyakayasa kubwaanda. Davida wakatija masiku aayo. 11 Kumane Saulo wakatuma batumwa kuŋanda ya Davida kuyoomuyubilila akuti bamujaye mafwumofwumo,+ pele Mikala mukaintu wakwe wakaambila Davida kuti: “Ikuti utatiji masiku aano, juunza unoofwide.” 12 Mpoonya aawo Mikala wakaselusya Davida awindo kutegwa atije. 13 Mikala wakabweza mutuni* akuulazika abulo, alimwi wakabikka lunsabwe lwaboya bwampongo aawo Davida mpaakali kubikka mutwe, kumane wakauvwumba amulembo.
14 Lino Saulo wakatuma batumwa kuti bakamulete Davida, pele Mikala wakati: “Waciswa.” 15 Aboobo Saulo wakatuma batumwa kuti bakamubone Davida akubaambila kuti: “Mumulete okuno abulo bwakwe kutegwa ajaigwe.”+ 16 Batumwa nibakanjila muŋanda bakajana kuti kuli mutuni* abulo alimwi alunsabwe lwaboya bwampongo aawo mpaakali kubikka mutwe wakwe. 17 Aboobo Saulo wakaambila Mikala kuti: “Ino nkaambo nzi ncoondicengela boobu akulekela sinkondoma+ kuti atije?” Mikala wakaingula Saulo kuti: “Walo mwini nguwandaambila kuti, ‘Kondileka nduunke, ikuti utandileki ndilakujaya!’”
18 Lino Davida wakalitijide akuloboka, eelyo wakaunka kuli Samuele ku Rama.+ Mpoonya wakamulwiida Samuele zyoonse nzyaakamucita Saulo. Kumane Davida a Samuele bakaunka akuyookkala ku Nayoti.+ 19 Mukuya kwaciindi Saulo wakaambilwa kuti: “Bona! Davida uli ku Nayoti ku Rama.” 20 Mpoonya aawo Saulo wakatuma batumwa kuti bakamujate Davida. Lino nibakabona basinsimi bapati balasinsima alimwi a Samuele kaimvwi alimwi akweendelezya akati kabo, muuya wa Leza wakabaselukila batumwa ba Saulo, eelyo abalo bakatalika kucita mbuli basinsimi.
21 Nibakamwaambila Saulo makani aaya, mpoonya aawo wakatuma batumwa bambi, abalo bakatalika kucita mbuli basinsimi. Aboobo Saulo wakatuma nkamu yatatu yabatumwa, abalo bakatalika kucita mbuli basinsimi. 22 Kumane awalo wakaunka ku Rama. Naakasika kucikala cipati cili ku Seku, wakabuzya kuti: “Ino Samuele a Davida bali kuli?” Bakaingula kuti: “Bali ku Nayoti+ ku Rama.” 23 Lino Saulo naakali kweenda kuzwa kooko kuya ku Nayoti ku Rama, muuya wa Leza wakamusikila awalo, eelyo wakeenda akucita mbuli musinsimi kusikila wasika ku Nayoti ku Rama. 24 Awalo wakasamununa zisani zyakwe akutalika kucita mbuli musinsimi kubusyu bwa Samuele, alimwi wakoona ooko kali mantanda* buzuba oobo boonse amasiku. Nkakaambo kaako bantu bakati: “Sena awalo Saulo waba musinsimi?”+