Intembauzyo
Lwiimbo. Lwiimbo lwakwaaba ŋanda. Intembauzyo ya Davida.
30 Ndilakutembaula O Jehova, nkaambo wandifwutula;*
Tonoolekela kuti basinkondoma bakondwe akaambo kamapenzi aangu.+
2 O Jehova Leza wangu, ndakakoompolweda kuti undigwasye, eelyo yebo wakandiponya.+
3 O Jehova, wandigusya mu Cuumbwe.*+
Wandipa kuzumanana kupona; wandilesya kuselemukila mucilindi.*+
4 Amwiimbe nyimbo zyakutembaula Jehova, nywebo nobantu bakwe basyomeka,+
Amulumbaizye zina* lyakwe lisalala;+
5 Nkaambo kusikilwa bukali bwakwe nkwaciindi buyo cisyoonto,+
Pele kukkomaninwa anguwe nkwamazuba oonse aabuumi bwabantu.+
Kumangolezya inga kwaba kulila, pele cifwumofwumo kulaba kusekelela.+
6 Ciindi nondakanyina mapenzi, ndakaamba kuti:
“Kunyina nondiyoozungaanizyigwa pe.”
7 O Jehova, nowakali kundikkomanina wakandipa kuyuma mbuli cilundu.+
Pele nowakasisa busyu bwako, mebo ndakayoowa kapati.+
8 O Jehova, ndakazumanana kukwiita;+
Alimwi ndakali kumukombelezya Jehova kuti andifwide luzyalo.
9 Ino kuli mpindu nzi ikuti ndafwa,* ikuti ndaselemukila mucilindi?*+
Sena bulongo inga bwakutembaula na?+ Sena inga bwaambilizya kusyomeka kwako?+
10 Koswiilila, O Jehova, akundifwida luzyalo.+
O Jehova, koba mugwasyi wangu.+
11 Kulila kwangu wakusandula kuba kuzyana;
Wandisamununa cisani camasaka, akundisamika lukkomano,
12 Kutegwa ndikwiimbile* nyimbo zyakukutembaula, nditaumuni buyo pe.
O Jehova Leza wangu, ndinookutembaula lyoonse mane kukabe kutamani.