Ciyubunuzyo
22 Mpoonya wakanditondezya mulonga wamaanzi aabuumi+ uubalangala mbuli bbwe libalangala, kaukunka kuzwa kucuuno cabwami ca Leza alimwi aca Mwanaambelele+ 2 kuyaansi akati kamugwagwa mupati wamunzi ooyo. Alimwi mumabali oonse obilo aamulonga kwakali zisamu zyabuumi izyakali kuzyala micelo ziindi zili 12 amwaka, izyakali kuzyala micelo yanzizyo mwezi amwezi. Alimwi matuvwu aazisamu eezyi akali aakuponya masi.+
3 Lino takukabi limbi kusinganizyigwa. Pele cuuno cabwami ca Leza aca Mwanaambelele+ cinooli mumunzi ooyo, alimwi bazike bakwe bayoomubelekela mulimo uusetekene; 4 eelyo bayoobona busyu bwakwe,+ alimwi zina lyakwe liyooba ankumo zyabo.+ 5 Kunze lyaboobo, takukabi limbi masiku,+ alimwi tabakayandiki mumuni walambe nouba mumuni wazuba, nkaambo Jehova* Leza uyoobamunikila,+ alimwi bayoolela kabali bami lyoonse mane kukabe kutamani.+
6 Mpoonya wakandaambila kuti: “Imajwi aaya alasyomeka alimwi ngamasimpe;+ inzya, Jehova,* Leza iwakasololela basinsimi+ amuuya watuma mungelo wakwe kuti atondezye bazike bakwe zintu izyeelede kucitika lino-lino. 7 Amubone! Ndilaboola cakufwambaana.+ Ulikkomene kufwumbwa ooyo uutobela majwi aabusinsimi bwabbuku lyakuvwunga eeli.”+
8 Mebo nde Johane, ndime ndakali kumvwa akubona zintu eezyi. Lino nindakazimvwa akuzibona, ndakaliwaala ansi kumaulu aamungelo ooyo iwakali kunditondezya zintu eezyi kuti ndimukombe. 9 Pele wakandaambila kuti: “Peepe! Utaciti oobo pe! Mebo ndili muzike buyo mbubonya mbuli nduwe abanabokwanu ibasinsimi alimwi abaabo ibatobela majwi aamubbuku lyakuvwunga eeli. Komba Leza.”+
10 Alimwi wakandaambila kuti: “Utaanamatiki majwi aabusinsimi bwabbuku lyakuvwunga eeli, nkaambo ciindi cibikkidwe cilaafwaafwi. 11 Ooyo uutaluleme azumanane kucita zitaluleme, alimwi ooyo uusesemya azumanane kucita zisesemya; pele ooyo mululami azumanane kucita bululami, alimwi ooyo uusalala azumanane kusalala.
12 “‘Amubone! Ndilaboola cakufwambaana, alimwi ndilijisi bulumbu mbondipa, kutegwa umwi aumwi ndimupe kweelana amulimo wakwe.+ 13 Ndime Alefa a Omega,+ imutaanzi amusyaalizi, imatalikilo amamanino. 14 Balikkomene aabo ibawasya zisani zyabo zilamfwu,+ kutegwa babe anguzu zyakuunka kuzisamu zyabuumi+ alimwi akuti banjile mumunzi ooyo kwiinda mumilyango yanguwo.+ 15 Kunze kuli babwa* alimwi abaabo ibasyoma mizimo, basibwaamu,* bajayi, basikukomba mituni abaabo boonse ibayandisya alimwi ibazumanana kubeja.’+
16 “‘Mebo, nde Jesu, ndakatuma mungelo wangu kuti nywebo amupe bumboni bwazintu eezyi zyambungano. Ndili muyanda alunyungu lwa Davida,+ alimwi antanda iimwekesya.’”+
17 Lino muuya alimwi anabwiinga+ bazumanana kwaamba kuti, “Boola!” Eelyo kufwumbwa ooyo uumvwa aambe kuti, “Boola!” Alimwi kufwumbwa ooyo uufwide nyota+ aboole; kufwumbwa ooyo uuyanda anywe maanzi aabuumi kakunyina kubbadela.+
18 “Ndicitila bumboni kumuntu woonse uumvwa majwi aabusinsimi bwabbuku lyakuvwunga eeli: Ikuti umwi wayungizya kuzintu eezyi,+ Leza uyoomuyungizizya zipenzyo zilembedwe mubbuku eeli;+ 19 lino ikuti umwi wagusya cili coonse kuzwa kumajwi aabbuku lyabusinsimi oobu, Leza uyoogusya cibeela cakwe kuzwa kuzisamu zyabuumi+ alimwi akuzwa mumunzi uusalala,+ izintu eezyo zilembedwe mubbuku eeli.
20 “Ooyo uucitila bumboni bwazintu eezyi waamba kuti, ‘Inzya, Ndilaboola cakufwambaana.’”+
“Ameni! Koboola, O Mwami Jesu.”
21 Iluzyalo lwa Mwami Jesu alube abasalali.