2 Bakorinto

6 Mbotubelekela antoomwe anguwe,+ aswebo tumukulwaizya kuti mutatambuli luzyalo lwa Leza akwaalilwa kubona kaambo ncoluliko.+ 2 Nkaambo waamba kuti: “Muciindi ceelede ndakakuswiilila, alimwi mubuzuba bwalufwutuko ndakakugwasya.”+ Amubone! Ecino ncobeni nceciindi ceelede. Amubone! Obuno mbobuzuba bwalufwutuko.

3 Tatuciti cintu cili coonse cityompya bamwi, kutegwa mulimo wesu utajaninwi kampenda;+ 4 pele muli zyoonse tulatondezya kuti tuli babelesi ba Leza,+ kwiinda mukuliyumya muzintu zinji, mbuli mapenzi, kubula ziyandika, buyumuyumu,+ 5 kuumwa, kubikkwa muntolongo,+ lupyopyongano, kubeleka canguzu, kutoona masiku, aziindi notunyina cakulya;+ 6 alimwi tulatondezya kuti tuli babelesi ba Leza kwiinda mubukkale busalala, mukuba aluzyibo, mukuliyumya cakukkazika moyo,+ mukuba aluzyalo,+ mukuba amuuya uusalala, mukuba aluyando lutali lwakuupaupa ameso,+ 7 mukwaamba zyamasimpe, mukutondezya nguzu zya Leza;+ kwiinda mukunyamuna zilwanyo zyabululami+ kujanza lyalulyo* alyalumwensyi.* 8 Alimwi tulacita oobo notulemekwa anotusampaulwa, notwaambwa kuti tuli babi akuti tuli babotu. Tubonwa kuti tuli basilweeno kakuli twaamba zyamasimpe, 9 kuti tatuzyibidwe pe, kakuli tulizyibidwe kabotu, kuti tufwa buya,* kakuli tucipona,+ kuti tulasubulwa kakuli tiitwaabwa kuti tujaigwe,+ 10 kuti tuluuside kakuli tulikondedwe lyoonse, kuti tuli bacete kakuli tuvwubya bantu banji, kuti taakwe ncotujisi kakuli tulijisi zintu zyoonse.+

11 Twamwaambila cakutainda mumbali nobana Korinto, alimwi myoyo yesu ilijalukide. 12 Swebo tatulesyi luyando* ndotujisi kulindinywe,+ pele nywebo mulesya luyando lwanu kulindiswe. 13 Aboobo, ikutegwa tupane maanzaasokwe, ndimwaambila mbuli bana bangu kuti anywebo amujalule myoyo yanu kulindiswe.+

14 Mutanjili mujoko lyomwe* abantu batasyomi.+ Nkaambo ino bululami buswaangene buti abubi?+ Naa, ino mumuni uswaangene buti amudima?+ 15 Kunze lyaboobo, ino nkweendelana kuli buti kuliko akati ka Kristo a Beliyali?*+ Naa, ino muntu uusyoma uswaangene buti amuntu uutasyomi?+ 16 Alimwi nkumvwana kuli buti nkolijisi tempele lya Leza amituni?+ Nkaambo tuli tempele lya Leza muumi;+ mbubonya Leza mbwaakaamba kuti: “Ndiyookkala akati kabo+ akweendeenda akati kabo, ndiyooba Leza wabo abalo bayooba bantu bangu.”+ 17 “‘Aboobo amuzwe akati kabo, akulyaandaanya,’ mbwaamba Jehova,* ‘alimwi amuleke kuguma cintu cisofweede’”;+ “‘eelyo ndiyoomutambula.’”+ 18 “‘Alimwi ndiyooba bauso,+ eelyo nywebo muyooba bana bangu basankwa abasimbi,’+ mbwaamba Jehova* Singuzuzyoonse.”